Marcos 14:1-15:47

 Ang Pasyon sa atong Ginoo sumala ni San Marcos 14:1-15:47 (Sun. Mar. 24, 2024 Palm Sunday)

Duha ka adlaw na lamang sa dili pa himoon ang Kasaulogan sa Pagsaylo ug ang Kasaulogan sa Pan nga Walay Patubo. Ang kadagkoan sa mga pari ug ang mga magtutudlo sa Balaod nangita ug paagi sa pagdakop kang Jesus sa tago aron ilang patyon. Sila miingon, “Dili ta kini buhaton sa panahon sa kasaulogan kay tingali unyag magubot ang katawhan.” Didto si Jesus sa Betania, sa balay ni Simon nga sanlahon. Samtang nagkaon Siya, miabot ang usa ka babaye nga may dalang tibod nga alabastro. Puno kini sa mahalon kaayong pahumot nga hinimo gikan sa lunsayng nardo. Gibuak niya ang tibod ug gibubo ang pahumot sa ulo ni Jesus. Apan nangasuko ang pipila sa mga tawo nga didto niadtong higayona ug nag-ingnanay, “Pagkausik gayod sa pahumot ! Ikabaligya man unta kanag kapin sa tulo ka gatos ka denario ug ang halin ikahatag sa mga kabos !” Ug ilang gisaway pag-ayo ang babaye. Apan miingon si Jesus kanila, “Pasagdi ninyo siya ! Nganong samukon man ninyo siya ? Usa ka maayong butang ang iyang gibuhat alang Kanako. Kanunay ninyong ikauban ang mga kabos ug bisan unsang panahona makatabang kamo kanila kon buot ninyo. Apan Ako dili ninyo kanunay nga ikauban. Gihimo niya ang kutob sa iyang maabot. Gipahumotan niya ang Akong lawas agi ug pangandam alang sa umaabot nga paglubong. Ug timan-i kini : bisag asang dapita sa kalibotan iwali kining Maayong Balita, ang nahimo niining maong babaye hisgotan gayod aron paghandom kaniya.” Unya si Judas Iscariote nga usa sa napulog-duha ka tinun-an miadto sa kadagkoan sa mga pari aron pagtugyan kang Jesus ngadto kanila. Ug sa pagkadungog nila niini, nalipay sila ug misaad paghatag kaniyag salapi. Busa si Judas nangitag maayong higayon sa pagbudhi kang Jesus. Sa unang adlaw sa Kasaulogan sa Pan nga Walay Patubo, ang adlaw nga maoy ting-ihaw sa mga karnero nga ihalad sa panahon sa Kasaulogan sa Pagsaylo, ang mga tinun-an nangutana kang Jesus, “Asa man kami Nimo paadtoa aron andamon namo ang panihapon ?” Ug gisugo ni Jesus ang duha kanila ug giingnan, “Pangadto kamo sa siyudad ug matagbuan ninyo ang usa ka tawo nga naglukdo ug usa ka banga nga tubig. Kuyog kamo kaniya ngadto sa balay nga iyang adtoan ug ingna ang tag-iya sa balay nga ang Magtutudlo nag-ingon, ‘Hain ang kuwarto alang Kanako diin Ako makigsalo sa Akong mga tinun-an sa panihapon sa Kasaulogan sa Pagsaylo ?’ Unya tultolan kamo niya sa usa ka dakong kuwarto sa itaas nga sangkap sa galamiton ug inandam na. Didto andama ang tanan alang Kanato.” Ug miadto ang mga tinun-an sa siyudad ug ilang nakit-an ang tanan sumala sa giingon ni Jesus. Didto giandam nila ang panihapon. Sa pagkakilomkilom na, miabot si Jesus uban sa napulog-duha ka tinun-an. Samtang nangaon sila, miingon si Jesus, “Sultihan Ko kamo : usa kaninyo nga nakigsalo Kanako magbudhi Kanako.” Tungod niini nangasubo ang mga tinun-an ug nangutana Kaniya ang tagsatagsa kanila, “Ako ba ang gipasabot Nimo?” Mitubag si Jesus, “Ang nagtunlob sa pan uban Kanako niining panaksan. Ang Anak sa Tawo mamatay gayod sumala sa giingon sa Kasulatan apan alaot ang tawo nga magbudhi Kaniya ! Maayo pa nga wala siya matawo !” Samtang nangaon sila, mikuha si Jesus ug pan, nagpasalamat ug gipikaspikas Niya kini ug gihatag ngadto sa Iyang mga tinun-an. Miingon Siya, “Kan-a ninyo kini. Kini mao ang Akong Lawas.” Unya gikuha Niya ang kupa ug gipasalamatan ang Dios. Gitunol Niya kini kanila ug silang tanan nanginom niini. Miingon si Jesus, “Kini mao ang Akong Dugo nga giula alang sa daghan ug naglig-on sa kasabotan sa Dios. Ug sultihan Ko kamo nga dili na gayod Ako moinom pag-usab niining bino hangtod sa adlaw nga moinom Ako sa bag-ong bino didto sa Gingharian sa Dios.” Unya nag-awit sila ug usa ka awit sa pagdayeg sa Dios ug nangadto sa Bungtod sa mga Olibo. Si Jesus miingon kanila, “Motalikod unya kamong tanan ug mamiya Kanako kay ang kasulatan nag-ingon, ‘Patyon ko ang magbalantay ug magkatibulaag ang mga karnero.’ Apan human Ako mabanhaw mouna Ako kaninyo ngadto sa Galilea.” Si Pedro mitubag, “Dili gayod ako mobiya kanimo bisan pag biyaan ka sa tanan !” Miingon si Jesus kang Pedro, “Timan-i kini sa dili pa gani motuktugaok ang manok sa makaduha karong gabhiona, imo na Akong ilimod sa makatulo.” Apan mipasalig gayod si Pedro, “Bisan pag patyon ako uban Kanimo, dili ko gayod Ikaw ilimod !” Ug nanumpa ang tanan sa samang mga pulong. Miabot si Jesus sa tanaman sa Getsemane uban sa Iyang mga tinun-an ug miingon Siya kanila, “Panglingkod kamo dinhi samtang mag-ampo Ako.” Unya Iyang gipauban kaniya sila si Pedro, si Santiago ug si Juan. Gibati Niya ang hilabihang kaguol ug kabalaka ug miingon Siya kanila, “Dako kaayo ang Akong kasubo nga halos ikamatay Ko. Pabilin kamo dinhi ug pagtukaw.” Mipadayon Siya sa unahan ug mihapa sa yuta ug nag-ampo nga kon mahimo ilikay Siya sa takna sa pag-antos. Miingon Siya, “Amahan Ko, mahimo Mo ang tanan. Kuhaa kining kupa gikan Kanako. Apan dili ang Akong pagbuot maoy matuman kondili ang Imo.” Unya mibalik Siya ngadto sa Iyang mga tinun-an ug Iyang naabtan nga nangatulog silang tulo. Si Jesus miingon kang Pedro, “Simon, natulog ka diay ? Dili ka ba gayod makahimo pagtukaw bisag usa lamang ka oras ?” Ug Siya miingon kanila, “Pagtukaw ug pag-ampo aron dili kamo madaog sa panulay. Andam ang espiritu apan luya ang lawas.” Unya mibiya na usab Siya ug nag-ampo sa mao gihapong pag-ampo. Human niini mibalik na usab Siya ngadto sa Iyang mga tinun-an ug naabtan na usab Niya sila nga nangatulog tungod kay katulgon man sila kaayo. Wala sila masayod kon unsay ilang itubag Kaniya. Sa ikatulo Niyang pagbalik, miingon Siya kanila, “Nangatulog ba gihapon kamo ug namahulay ? Husto na ! Miabot na ang oras nga itugyan ang Anak sa Tawo ngadto sa kamot sa mga makasasala. Bangon na kamo kay mangadto na kita. Tan-awa, ania na ang nagbudhi Kanako !” Samtang nagsulti pa si Jesus, miabot si Judas nga usa sa napulog-duha ka tinun-an. Kuyog kaniya ang usa ka panon sa katawhan nga nagdalag mga pinuti ug mga puspos. Mga sinugo sila sa kadagkoan sa mga pari ug sa mga magtutudlo sa Balaod ug sa mga pangulo sa mga Judio. Ang mabudhion naghatag kanila ug usa ka ilhanan : “Ang tawo nga akong hagkan mao ang inyong gipangita. Dakpa Siya ug unya dad-a ninyo ug bantayi pag-ayo.” Sa pag-abot gayod ni Judas, miduol siya kang Jesus ug miingon, “Magtutudlo !” ug mihalok siya Kaniya. Busa ilang gidakop si Jesus ug gigunitan pag-ayo. Apan usa niadtong diha nagtindog sa duol miibot sa iyang pinuti ug gitigbas niya ang ulipon sa Pangulong Pari ug naputol ang usa ka dalunggan niini. Unya miingon si Jesus kanila, “Tulisan ba Ako nga nagdala man kamog mga pinuti ug mga puspos sa pagdakop kanako ? Adlaw-adlaw nagtudlo Ako didto sa Templo uban kaninyo ug wala Ako ninyo dakpa. Apan kinahanglan gayod matuman ang giingon sa Kasulatan.” Ug mibiya Kaniya ang tanan Niyang mga tinun-an ug nanagan. May usa ka batan-on nga nagkupo lamang ug habol nga misunod kang Jesus. Dakpon unta nila siya apan kupo lamang ang ilang nagunitan ug nakadagan siya nga hubo. Unya gidala nila si Jesus ngadto sa balay sa Pangulong Pari. Didto nagtigom ang mga pari, ang mga pangulo sa mga Judio ug ang mga magtutudlo sa Balaod. Misunod si Pedro nga nagpaantaw ug miadto siya sa hawanan sa balay sa Pangulong Pari. Milingkod siya didto uban sa mga guwardiya ug nagpaduol siya sa kalayo aron mainitan. Ang mga pari ug ang tanang sakop sa Labawng Hukmanan nangita ug kamatuoran batok kang Jesus aron ilang mapatay siya apan wala silay nakit-an. Daghang mga saksi ang misultig bakak batok Kaniya apan wala magkatakdo ang ilang mga pahayag. Unya may mga tawo nga mitindog ug misultig bakak batok kang Jesus. Sila miingon, “Nadunggan namo Siya nga nag-ingon, ‘Gub-on Ko kining Temploha nga binuhat sa tawo, ug sulod sa tulo ka adlaw patindogon Ko ang lain nga templo nga dili binuhat sa tawo.’” Apan wala gihapon magkatakdo ang ilang gipanulti. Unya mitindog ang Pangulong Pari atubangan sa tanan ug nangutana kang Jesus, “Wala Ka bay ikatubag sa sumbong nga ilang gipasaka batok Kanimo ?”Apan naghilom lamang si Jesus. Nangutana pag-usab ang Pangulong Pari Kaniya, “Ikaw ba ang Mesiyas nga Anak sa Dalaygon nga Dios ?” Si Jesus mitubag, “Ako ! Ug makita unya ninyo ang Anak sa Tawo nga maglingkod sa tuo sa makagagahom nga Dios ug moabot uban sa mga panganod sa langit !” Ug gigisi sa Pangulong Pari ang iyang kaugalingong bisti ug miingon, “Wala na kita magkinahanglan ug dugang pang mga saksi batok Kaniya ! Nadungog ninyo ang Iyang pagpasipala sa Dios. Unsa may inyong hukom?” Ug mihukom silang tanan nga sad-an Siya ug angay gayong patyon. Unya gilud-an sa pipila kanila si Jesus ug gitaptapan nila ang Iyang mata ug gisumbag Siya. Miingon sila, “Tag-ana kon kinsay nagsumbag Kanimo !” Ug gikuha Siya sa mga guwardiya ug gitabangag tamparos. Didto pa si Pedro sa hawanan sa dihang milabay ang usa sa mga sulugoong babaye sa Pangulong Pari. Sa pagkakita niya kang Pedro nga didto duol sa kalayo, mitutok ang babaye kaniya ug miingon, “Kauban ka usab ni Jesus nga Nazaretnon.” Apan milimod si Pedro nga nag-ingon, “Wala ako makaila Kaniya ug wala ako makasabot sa imong gipanulti.” Migawas siya ug unya may manok nga mituktugaok. Didto hikit-an siya pag-usab sa babaye ug miingon ang babaye ngadto sa mga tawo nga nagbarog didto, “Kauban kana siya nila !” Apan milimod na usab si Pedro. Pagkataudtaod miingon na usab ang mga tawo kang Pedro, “Dili ka gayod makalimod nga kauban ka nila kay taga-Galilea ka man usab.” Niining higayona, nanumpa si Pedro, “Bisag mamatay pa ko karon dayon ! Wala gayod ako makaila nianang Tawo nga inyong gihisgotan !”Unya mituktugaok ang manok sa ikaduhang higayon ug nahinumdom si Pedro sa giingon ni Jesus kaniya, “Sa dili pa motuktugaok ang manok sa makaduha, imo na Akong ilimod sa makatulo.” Ug mihilak siya. Nianang sayo sa buntag ang kadagkoan sa mga pari nakigsabot sa mga punoan sa mga Judio ug sa mga magtutudlo sa Balaod ug sa tanang sakop sa Labawng Hukmanan. Gigapos nila si Jesus, gidala ug gitugyan ngadto kang Pilato. Nangutana si Pilato Kaniya, “Ikaw ba ang hari sa mga Judio ?” Si Jesus mitubag, “Giingon mo.” Gipasanginlan sa kadagkoan sa mga pari si Jesus sa daghang mga butang. Busa nangutana pag-usab si Pilato Kaniya, “Dili Ka ba lamang motubag ? Daghan kaayo ang ilang gipasangil Kanimo !” Apan wala gihapon motubag si Jesus, busa nahibulong pag-ayo si Pilato. Sa matag Kasaulogan sa Pagsaylo sa mga Judio, nabatasan ni Pilato ang pagbuhi ug usa ka binilanggo nga pangayoon sa mga tawo. Niadtong panahona may usa ka tawo nga ginganlag Barabas nga gibilanggo kay usa man siya sa mga misukol sa kagamhanan. Nakapatay siya sa panahon sa usa ka kagubot. Sa dihang nagkapundok na ang mga tawo, gipangayo nila kang Pilato nga himoon na niya ang nabatasan niyang buhaton. Ug nangutana si Pilato kanila, “Buot ba kamo nga buhian nako ang hari sa mga Judio ?” Nasayod man gud si Pilato nga si Jesus gitugyan sa kadagkoan sa mga pari tungod sa kasina. Apan gihulhogan sa kadagkoan sa mga pari ang mga tawo nga pangayoon nila kang Pilato nga si Barabas maoy buhian. Nangutana pag-usab si Pilato sa mga tawo, “Unsa man diay ang akong buhaton niining inyong gitawag nga hari sa mga Judio ?”Ug misinggit sila, “Ilansang Siya sa krus !” “Kay unsa man diay ang sala nga Iyang nahimo ?” nangutana si Pilato. Apan misamot hinuon sila pagsinggit, “Ilansang Siya sa krus !” Buot ni Pilato nga mahimuot kaniya ang mga tawo busa iyang gibuhian alang kanila si Barabas. Unya gipalatos niya si Jesus ug gitugyan ngadto kanila aron ilansang sa krus. Gidala si Jesus sa mga sundalo ngadto sa hawanan sa palasyo sa gobernador ug gipapundok nila ang ubang mga sakop sa tropa. Unya gisul-oban nila si Jesus ug kupo nga dagtom-pula. Naghimo silag purongpurong sa mga sangang tunokon ug gibutang nila kini sa Iyang ulo. Unya misugod sila pagyukboyukbo Kaniya nga nag-ingon, “Mabuhi ang Hari sa mga Judio !” Ug gibunalan nilag lipak ang Iyang ulo, gilud-an Siya, giluhodluhoran ug giyukboyukboan. Human nila bugalbugali si Jesus, gihuboan nila Siya sa kupo nga dagtom-pula ug gisul-oban pagbalik sa Iyang kaugalingong sapot. Unya gidala nila Siya sa gawas aron ilansang sa krus. Samtang naglakaw sila, gikasugat nila ang usa ka tawo nga ginganlag Simon nga taga-Cirene. Amahan siya ni Alejandro ug ni Rufo. Mao pa gayoy pag-abot niya sa siyudad gikan sa layong dapit ug gipugos nila siya sa pagpas-an sa krus ni Jesus. Gidala nila si Jesus ngadto sa usa ka dapit nga ginganlag Golgota, nga sa ato pa, “Ang Dapit sa Kalabera.” Ug didto misulay sila paghatag Kaniya ug bino nga sinagolag mira apan midumili si Jesus pag-inom niini. Unya gilansang nila Siya sa krus ug gibahinbahin ang Iyang sapot ug nagripa sila kon unsang bahina sa sapot ni Jesus ang ilang maangkon. Alas nuybe kadto sa buntag sa dihang gilansang nila Siya sa krus. Ang sumbong nga nahisulat sa karatola mao kini : “Ang Hari sa mga Judio.” May duha usab ka tulisan nga ilang gilansang sa mga krus uban ni Jesus, ang usa sa Iyang tuo ug ang usa sa Iyang wala. Ang mga tawo nga nanglabay nagyango-yango sa ilang mga ulo ug gibugalbugalan nila si Jesus, “Aha ! Ikaw diay kadtong moguba sa Templo ug motukod niini pag-usab sulod sa tulo ka adlaw ! Karon kanaog sa krus ug luwasa ang Imong kaugalingon !” Ang kadagkoan sa mga pari ug ang mga magtutudlo sa Balaod nagbugalbugal usab kang Jesus nga nag-ingnanay, “Nakaluwas Siya sa uban apan dili Siya makaluwas sa Iyang kaugalingon ! Tan-awon nato kon ang Mesiyas, ang hari sa Israel, manaog ba karon sa krus aron makatuo kita Kaniya !” Ug ang duha nga gilansang sa krus uban ni Jesus nagbugalbugal usab Kaniya. Sa pagkaudtong tutok, nalukop sa kangitngit ang tibuok dapit nga milungtad ug tulo ka oras. Ug sa pagkaalas tres mituaw si Jesus sa makusog, “Eloi, Eloi, lama sabachthani?” nga sa ato pa, “Dios Ko, Dios Ko, nganong gibiyaan Mo Ako ?” Dihay mga tawo nga nakadungog Kaniya ug miingon sila, “Pamati kamo, nagtawag Siya kang Elias !” Unya midagan ang usa kanila nga nagdalag espongha nga iyang gihumod ug aslom nga bino ug gitaod sa tumoy sa usa ka dughit. Ug iya kining giisa ngadto sa mga ngabil ni Jesus ug miingon, “Hulat sa ! Tan-awon ta kuno kon manaog ba si Elias aron pagkuha Kaniya gikan sa krus !” Misinggit si Jesus sa kusog nga tingog ug namatay. Unya ang tabil sa Templo nagisi gikan sa itaas ngadto sa ubos. Ang kapitan sa mga sundalo nagbarog sa atubangan sa krus. Nakita niya ang pagkamatay ni Jesus ug miingon siya, “Tinuod gayod nga kining Tawhana Anak sa Dios !” Didto may pipila usab ka babaye nga nagpaantaw. Uban kanila si Salome, si Maria Magdalena ug si Maria nga inahan sa batan-ong Santiago ug ni Jose. Mao kini sila ang nag-uban-uban ug nagtabang kang Jesus samtang didto pa Siya sa Galilea. Ug may daghan pa gayong mga babaye didto nga mikuyog Kaniya sa Jerusalem. Sa hapit na mosalop ang adlaw sa bisperas sa Adlawng Igpapahulay, miabot si Jose nga taga-Arimatea, usa ka tinamod nga sakop sa Labawng Hukmanan ug nagpaabot usab sa paghari sa Dios. Gipangahasan ni Jose ang pag-atubang kang Pilato aron pangayoon ang patayng lawas ni Jesus. Nahibulong si Pilato sa pagkabati niya nga si Jesus patay na diay. Iyang gipatawag ang kapitan ug gipangutana kon taudtaod na bang patay si Jesus. Sa pagkadungog ni Pilato sa taho sa kapitan, gitugotan niya si Jose sa pagkuha sa lawas ni Jesus. Mipalit si Jose ug panapton nga lino ug gikuha niya ang lawas. Giputos niya kini sa panaptong lino ug gipahimutang sa usa ka lubnganan nga gibangag sa pangpang nga bato. Unya giligid niya ang usa ka bato aron itabon sa pultahan sa lubnganan. Si Maria Magdalena ug si Maria nga inahan ni Jose nagtan-aw diin nila ilubong si Jesus.

Pamalandong :

Ang Domingo sa Lukay, nga tawgon usab nato'g Domingo sa Pagpasakit sa Ginoo, mao ang sinugdanan sa Semana Santa. Para natong mga Kristiyanos, kini ang pinakabalaang Semana sa Tuig tungod kay nasulod dinhi ang dakong Misteryo sa Pagpasakit, Pagpakamatay ug Pagkabanhaw sa Ginoo (Paschal Mystery)

Ang pagsaulog sa Semana Santa diha sa atong panimalay, kapilya o sa simbahan mas maayo  kay sa magsaulog og Holy Week ngadto sa mga beach resorts o sa mga tourists destinations. Dili ba nauso naman karon sa modernong mga tawo nga panahon sa Holy Week mobiyahe ug magbakasyon ? Angay ba kini mahitabo ? Dili gayod. Kalain ba nga samtang ang Ginoo nagpasakit ug nag-antos, kita maglulinghayaw ug maglipaylipay. Matag Holy Week, bisan asa kita dapit, kita angay moduyog sa kasaulogan sa tibuok Simbahan pinaagi sa pag-ampo ug pagpamalandong sa dakong gugma sa Dios para kanatong tanan. 

Mga kaigsoonan, ang Simbahan mao ang sakramento sa gugma sa Dios. Taliwala sa atong malisod nga kahimtang, maningkamot kita nga mas mapadayag pa nato ang gugma sa Dios sa matag usa, ilabina ning malisod nga panahon. Dili nato kalimtan nga kita, ang katawhan sa Dios, mao ang Simbahan, dili lamang ang mga obispo, pari ug madre. Isip katawhan sa Dios, kita ang sakramento, kita ang magpakita ug magpabati sa gugma sa Dios dinhi sa kalibotan. Busa, buhaton nato kutob sa atong mahimo nga mas makahuloganon ang atong selebrasyon sa Semana Santa karong panahona, taliwala sa hadla sa kasamok, kalisdanan ug mga tentasyon.

Sa laing bahin usab, hinaut unta nga maningkamot ang matag panimalay nga makahupot ug benendisyonang Palma/Lukay, nga maoy simbolo sa kadaugan ni Kristo batok sa daotan, batok sa sala, ug batok sa kamatayon. Mga igsoon, kini ang nindot nga hulagway sa Simbahan o katawhan nga nahiusa sa gugma sa Dios. Matag usa kanato nahimong taytayan, agianan sa grasya sa Dios. Ug angay nato kining himoon dili lamang panahon sa Palm Sunday, kondili sa inadlaw-adlaw natong kinabuhi. Hunahunaa ra god, kon diha sa gagmay'ng kristohanong kasilinganan, diha sa mga BECS, ang mga sakop magpakabana ug magtinabangay. Kinsa tong naglisod, tabangan. Dili lang sa materyal nga panginahanglan, kondili sa espiritwal ug emosyonal usab. Kon dili mahimo sa cluster o purok, ipaabot ang problema ngadto sa chapel leader kay basin ang mga sakop sa kapilya adunay ikatabang. Kon ang problema dako gayod, ipaabot kini ngadto sa padre kura, nga mao na poy modasig sa mga sakop sa parokya nga molihok sa pagtabang sa usa ka pamilya nga nanginahanglan. Para nako, kini ang magpamatuod sa usa ka Kristohanong Katilingban.

Sa Pasyon sa atong Ginoo, adunay Hudas, adunay Pilato, adunay Caipas, adunay katawhan nga mosinggit "Hosanna", aduna poy katawhan nga mosinggit "ilansang Siya sa krus", adunay mga sundalo nga mabangis ug mabiay-biayon, adunay Simon Cireneo, adunay Pedro ug mga tinun-an, adunay mga higala nga matinud-anon, ug aduna poy Maria, usa ka mapinanggaong inahan.

Sa panahon sa kalisdanan, unta si Jesus maanaa diha sa mga nag-antos tang mga kaigsoonan, mga tawo nga apektado kaayo sa mga grabeng kasakitan. Unsa may atong papel ning panahona ? Hudas ba ta nga maghunahuna lang gihapon sa unsang paagi kita makasapi ug makapahimulos sa sitwasyon ? Pilato ba ta nga manghunaw ug dili manginlabot sa nagakahitabo ? Caipas ba ta nga mosugot lang nga isakripisyo ang kinabuhi sa mga inosente alang sa "mini" nga kalinaw ? Katawhan ba ta nga mosinggit sa pagdayeg sa Dios, pero walay gibuhat nga maayo ? Katawhan ba ta nga magbiay-biay pinaagi sa pagpahayahay taliwala sa kalisdanan sa uban ? Pedro ba ta nga maayo lang sa estorya pero motalaw sa peligro ug kalisdanan ? O, Simon Cireneo ba ta nga andam motabang sa mga nagpas-an og mga krus sa kinabuhi ? O higala ba ta nga tinuod ni Jesus nga mounong, motabang, ug moduyog sa kasakitan sa uban ? O inahan ba ta nga andam angkonon ang tanang kasakit sa minahal nga mga anak ? Adunay naga-ingon, "No pain, no palm ; no thorns, no throne ; no gall, no glory ; no cross, no crown."

Mga igsoon, kita ang motubag niining mga pangutana diha sa atong kahiladman.

pohsiBtebAyU