Marcos 8:27-35

 Ang Santos nga Ebanghelyo sumala ni San Marcos 8:27-35 (Sun. Sept. 15, 2024 Ikakawhaag-Upat nga Domingo sa Ordinaryong Panahon)

Unya si Jesus ug ang Iyang mga tinun-an miadto sa mga balangay sa Cesarea Filipo. Samtang naglakaw sila Iyang gipangutana ang Iyang mga tinun-an, “Kinsa man kuno Ako sumala sa mga tawo?” Mitubag sila, “Ang uban miingon nga Ikaw mao si Juan nga Magbubunyag. Ang uban usab miingon nga Ikaw mao si Elias. Ug miingon pa gayod ang uban nga Ikaw usa sa mga propeta.” Apan kamo, unsa may inyong ikasulti ? Kinsa man Ako ?” Nangutana si Jesus kanila. Ug mitubag si Pedro, “Ikaw mao ang Mesiyas.” Unya gidid-an sila ni Jesus sa pagpanugilon kang bisan kinsa mahitungod Kaniya. Unya gisuginlan ni Jesus ang Iyang mga tinun-an nga mag-antos pag-ayo ang Anak sa Tawo ug isalikway Siya sa mga pangulo sa mga Judio ingon man sa kadagkoan sa mga pari ug sa mga magtutudlo sa Balaod. Patyon Siya apan sa ikatulo ka adlaw mabanhaw. Gisulti Niya kini sa Iyang mga tinun-an sa walay lipudlipod. Tungod niini gipalayo Siya ni Pedro sa uban ug gibadlong. Apan miatubang si Jesus ug mitan-aw sa Iyang mga tinun-an, unya gibadlong Niya si Pedro, “Pahawa Satanas ! Ang imong hunahuna iya sa tawo, dili sa Dios !” Unya gitawag ni Jesus ang katawhan ug ang Iyang mga tinun-an ug giingnan sila, “Bisan kinsa nga buot mahimo nga Akong tinun-an kinahanglan nga kalimtan niya ang iyang kaugalingon, pas-anon niya ang iyang krus ug mosunod siya Kanako. Kay ang buot moluwas sa iyang kaugalingong kinabuhi mawad-an hinuon niini. Apan kadtong maghalad sa iyang kinabuhi alang Kanako ug sa Maayong Balita dili mawad-an niini. Unsa may makuha sa usa ka tawo kon maangkon niya ang tibuok kalibotan apan kawad-an siya sa iyang kinabuhi ? Wala gayod ! Walay bisan unsa nga ikabugti sa usa ka tawo aron mabawi niya ang iyang kinabuhi. 

Pamalandong :

ANGAY BA GAYOD KITANG MAGPASIGARBO SA ATONG KAPASIDAD ?

Usa ka pari ang nahimong inila nga magwawali. Bisan asa siya magmisa, modugok ang mga tawo nga gustong maminaw kaniya. Inig kahuman niya'g wali, manindog ang tanan ug mamakpak sa ilang mga kamot. Nanghambog kining maong pari sa iyang obispo. “Bishop, ang mga tawo malipay pag-ayo kon ako ang magmisa. Pakpakan ko nila inig human nako’g wali.” “Oo padre, nabalitaan nako”, matud sa obispo. “Pero, naglibog ko. Human nimo'g wali, mamakpak ang mga tawo. Pero human sa pagwali ni  Kristo, gibiaybiay, gisakit ug gipapatay  hinoon Siya sa mga tawo.” Sa pagsangyaw, ang pari angay nga mosulti sa tinuod, dili sa unsay ganahan nga madunggan sa mga tawo. Ang kamatuoran usahay sakit paminawon. Ug tungod niini, ang usa ka matinud-anong magwawali, sama kang Kristo, usahay pagasakiton ug patyon tungod sa kamatuoran nga iyang gisangyaw. Sa Ebanghelyo karong Domingoha, atong nasayran nga nagkalain-lain ang pag-ila sa mga tawo kang Jesus. Tungod sa Iyang mainitong pagsangyaw, ang mga tawo motandi Kaniya kang Juan nga Magbubunyag, kang Elias ug sa ubang mga propeta. Apan, walay usa nga nakatugkad sa Iyang tinuod nga pagka-Siya. Busa si Jesus nangutana sa Iyang mga tinun-an, “Para kaninyo kinsa man Ako ?” Ug si Pedro miingon, “Ikaw mao ang Kristo (o Mesiyas) !” Sakto ang tubag ni Pedro, apan ang iyang pagsabot mahitungod sa Mesiyas lahi kaysa pagsabot ni Jesus sa iyang kaugalingon. Sa dihang si Jesus naghisgot sa Iyang umaabut nga pag-antos ug kamatayon gikan sa kamot sa mga lederes, mga pangulong pari ug mga magtutudlo sa Balaod, gibadlong Siya ni Pedro, “Ginoo, dili kana mahitabo kanimo !” Si Pedro ug ang mga Hudiyo adunay kaugalingong pagsabut mahitungod sa Mesiyas. Ang Kristo, para kanila, usa ka political ug military leader nga makig-away para kanila ug moluwas kanila batok sa tanang mga kaaway. Apan, para kang Jesus, ang Mesiyas moluwas sa tawo pinaagi sa paghalad sa iyang kinabuhi. Gipangutana ni Pope John Paul II ang grupo sa mga kabataan : “Unsa man ang pinakaunang letra sa Alpabeto sa Ginoo?” Ang mga bata mitubag: “Letra nga 'A'!” Apan ang Santo Papa miingon : “Dili. Para sa Ginoo, ang labing una nga letra mao ang “t” tungod kay dinhi makita ang timaan sa krus.” Sa mga mata sa kalibutan, ang krus maoy simbolo sa kabangis ug kamatayon, apan sa mata sa Dios, ang krus maoy timaan sa dakong gugma ug kinabuhi. Para sa mga tawo, ang krus simbolo sa kaulawan ug kapildihan, apan para sa Dios, ang krus maoy timaan sa himaya ug kadaogan. Gani, ang gugma mahimo lamang tinuod kon kini andam magsakripisyo ug maghatag sa kaugalingon para sa uban. Mao kini ang matang sa gugma nga gipakita ni Jesus kanato.  “Para kaninyo si kinsa man Ako?” Kining pangutana ni Jesus para sa Iyang mga tinun-an magpahinumdum kanato sa kabililhon ug sakto nga pag-ila Kaniya. Ang sakto nga pag-ila sa Dios makatabang kanato sa pagsabot sa atong kinabuhi ug misyon diha sa Simbahan. Samtang ang sayop nga pag-ila sa Dios kasagaran maoy hinungdan sa sayop nga pagsabot sa kinabuhing Kristohanon.

Duha ka bata ang nagtindog atubangan sa larawan sa Sacred Heart of Jesus. Nakabantay ang usa kanila nga bisan asa sila mobarog, ang mga mata sa Ginoo motan-aw kanila. Gipangutana niya ang kauban, “Ngano man nga bisan asa kita mobarog magsunodsunod ang mga mata ni Jesus kanato ?” Ug mitubag ang laing bata sa pag-ingon, “Magsigi man gud na siya og bantay kon aduna kitay sayop nga buhaton.” Apan miingon ang unang bata : “Dili tingali oy. Magsunodsunod ang mga mata ni Jesus kanato tungod kay magbantay man na Siya nga walay daotang mahitabo kanato.” Kon magtoo kita nga si Jesus usa ka mahukmanong Dios, malagmit magpuyo kita kanunay nga puno sa kahadlok Kaniya. Mosunod kita sa balaod dili tungod kay nasayod kita nga kini ang sakto kondili tungod lamang sa kahadlok sa silot sa Ginoo. Apan, kon mailhan nato si Jesus nga usa ka Maayong Magbalantay, malagmit nga magpuyo kita nga masaligon ug malipayon. Mosunod kita sa Iyang mga sugo dili tungod sa kahadlok sa silot sa impyerno kondili tungod kay kumbinsido kita nga kini maoy sakto. Kon ang atong pag-ila ni Jesus usa lamang ka Dios nga harianon, labing siguro magpunay kita'g hunahuna unsaon paglipay Kaniya. Kanunay kitang maproblema kon unsang matang sa mga butang o bahandi ang ihalad nato ngadto Kaniya. Apan, kon makita nato kang Jesus ang usa ka mahigugmaong Dios, malagmit mabati nato sa matag adlaw ang Iyang pag-amoma ug pagpahiluna sa atong kinabuhi. Tungod niini, angay gayod nga magmapasalamaton kita ug magmatarong agi'g balos sa Iyang kaayo ug dili hitupngang gugma kanato.

pohsiBtebAyU