Lukas 21:5-11

 Ang Santos nga Ebanghelyo sumala ni San Lukas 21:5-11 (Tue. Nov. 28, 2023 )

Dihay pipila kanila nga naghisgot bahin sa Templo kon unsa kini katahom tan-awon nga gidayandayanan sa maanindot nga mga bato ug sa mga gasa nga gihalad ngadto sa Dios. Unya miingon si Jesus, “Nakita ninyo kining tanan apan moabot ang panahon nga walay bisan usa ka bato nga magpabilin sa nahimutangan niini kay ang tanan tumpagon gayod.” “Magtutudlo,” nangutana sila, “kanus-a ba kini mahitabo ? Ug unsa man ang ilhanan nga moabot na ang panahon nga kini matuman ?” Si Jesus miingon, “Pagbantay kamo ug ayaw kamo palimbong kay daghan ang moanhi sa Akong ngalan nga mag-ingon, ‘Ako mao si Cristo !’ ug moingon usab, ‘Miabot na ang panahon !’ Apan ayaw sila tuohi. Ayaw kamo kahadlok kon makadungog kamo'g mga gubat ug mga kagubot kay kining mga butanga kinahanglan nga mahitabo gayod pag-una apan wala kini magpasabot nga mao na kini ang kataposan.” Mipadayon Siya pag-ingon, “Ang usa ka nasod makiggubat sa laing nasod ug ang usa ka gingharian mosulong sa laing gingharian. Mahitabo unya ang makalilisang nga mga linog, gutom ug kamatay sa lainlaing dapit ingon man ang makahahadlok nga mga butang ug mga dagkong ilhanan gikan sa langit.

Pamalandong :

UNSA MAY MOLAHUTAY SA MGA BUTANG NGA ATONG GIHUPTAN ? 

Ang mga panagna ni Kristo kalabot sa pagkatumpag sa templo ug sa ubang katalagman magpahinumdum kanato nga ang tanang butang adunay katapusan. Ang tawo makahimo’g dagko ug nindot nga mga edipisyo, apan kining tanan mangawala sa paglabay sa panahon. Bisan ang kaanyag, kusog, gahum ug bahandi adunay kinutoban. Nindot kini nga pahimangno tungod kay usahay maghunahuna kita nga kontrolado nato ang tanan ug nga kita magpabilin ning kalibotan. Sayop. Ang Ginoo lamang, uban sa Iyang gugma, ang walay utlanan. “Everything changes, only God is permanent.” Busa, angay natong huptan ang dakong pagtoo sa Dios ug magpabilin kita sa Iyang gugma aron atong maangkon ang kinabuhing malungtaron uban Kaniya. Matod pa ni Rose Kennedy," The most important element in human life is faith ; if God were to take away all his blessings - health, physical fitness, wealth, intelligence and leave me with but one gift, I would ask him for faith. For with faith in him and his goodness, mercy and love for me, and belief in everlasting life, I believe I could suffer the loss of all my other gifts and still be happy."

pohsiBtebAyU