Marcos 10:46-52

 Ang Santos nga Ebanghelyo sumala ni San Marcos 10:46-52 (Thu. June 1, 2023)

Miabot sila sa Jerico. Ug sa diha nga mobiya na si Jesus uban sa Iyang mga tinun-an ug sa dakong panon sa katawhan, may buta nga makililimos nga ginganla'g Bartimeo nga anak ni Timeo nga naglingkod daplin sa dalan. Sa pagkabati niya nga mao diay kadto si Jesus nga taga-Nazaret, misinggit siya, “Jesus ! Kaliwat ni David, kaluy-i intawon ako !” Daghan ang mibadlong ug mipahilom kaniya, apan misamot hinuon siya pagsinggit, “Kaliwat ni David, kaluy-i intawon ako !” Mihunong si Jesus ug miingon, “Tawga siya.” Busa gitawag nila siya. Giingnan nila ang buta, “Paglipay ! Tindog, kay gitawag ka Niya.” Ug giwakli niya ang iyang kupo, milukso siya ug miduol kang Jesus. Nangutana si Jesus kaniya, “Unsay ipabuhat mo Kanako ?” Mitubag ang buta, “Magtutudlo, gusto unta ako nga makakita pag-usab.” Ug giingnan siya ni Jesus, “Lakaw na, ang imong pagtuo nakaayo kanimo.” Dihadiha nakakita ang buta ug mikuyog siya kang Jesus.

Pamalandong :

SA UNSA MANG PAGKABUTA KITA ANGAY NGA MAMAAYO ?

Ang milagrosong pagkaayo ni Bartimeo dili lamang pisikal kondili espiritwal usab. Gisubli ni Jesus dili lamang ang kahayag sa mga mata ni Bartimeo ang naalim apan apil usab niini ang kahayag sa iyang kalag. Matod pa sa Ebanghelyo, “Dihadiha nakakita ang buta ug nisugod pagsunod kang Jesus.” Ang pagsunod kang Jesus maoy timailhan sa bag-ong kinabuhi nga gisugdan pagpuyo ni Bartimeo, usa ka kinabuhi nga nahayagan na sa Ginoo. Kasagaran kanato walay problema sa mga mata, apan adunay problema sa kalag, nga maoy hinungdan sa atong pagpakasala. Matod pa ni Helen Keller: “The only thing worse than being blind is having sight but no vision.” Mag-ampo kita sa Ginoo nga ayohon unta ang atong panglantaw aron makakita kita unsa gayod ang kinabuhi nga angay natong subayon.

pohsiBtebAyU