Mateo 26:14-27:66/27:11-54

 Ang Santos nga Ebanghelyo sumala ni San Mateo 26:14-27:66 / 27:11-54 (Apr. 2, 2023 Domingo Sa Pasyon Sa Atong Ginoo/Bendita Sa Lukay)

Si Jesus nagtindog atubangan sa Romanhong Gobernador ug gipangutana Siya sa Gobernador, “Ikaw ba ang hari sa mga Judio?” Si Jesus mitubag, “Gisulti nimo.” Apan wala Niya tubaga ang mga sumbong sa kadagkoan sa mga pari ug sa mga punoan sa mga Judio. Busa miingon si Pilato Kaniya, “Wala Ka ba makadungog sa tanan nilang mga sumbong batok Kanimo ?” Apan wala motubag si Jesus bisag usa ka pulong, busa natingala pag-ayo ang Gobernador. Matag Kasaulogan sa Pagsaylo, nabatasan sa Gobernador ang pagbuhig usa ka binilanggo nga pinangayo sa mga tawo. Niadtong panahona may bantogang binilanggo nga ginganlag Barabas. Sa nagkatigom na ang mga tawo, nangutana si Pilato kanila, “Kinsa may inyong gusto nga akong buhian ? Si Barabas ba o si Jesus nga ginganlag Mesiyas ?” Nangutana si Pilato niini kay nasayod man siya nga ilang gitugyan si Jesus kaniya tungod sa kasina. Samtang naglingkod si Pilato didto sa lawak-hukmanan, nagpadala kaniyag mensahe ang iyang asawa nga nag-ingon, “Ayaw paghilabti kanang Tawhana nga walay sala kay nasamok ako pag-ayo tungod sa akong damgo mahitungod Kaniya.” Gidani sa kadagkoan sa mga pari ug sa mga pangulo sa mga Judio ang mga tawo sa pagpangayo kang Pilato nga buhian niya si Barabas ug ipapatay si Jesus. Unya nangutana pag-usab ang Gobernador kanila, “Kinsa man niining duha ang inyong gusto nga akong buhian ?” Sila mitubag, “Si Barabas !” Si Pilato nangutana kanila, “Unya, unsa may akong buhaton kang Jesus nga ginganlag Mesiyas ?” Silang tanan nanubag, “Ilansang sa krus !” Unsa may Iyang sala ?” nangutana si Pilato. Apan sa makusog nga tingog naninggit sila, “Ilansang Siya sa krus !” Sa pagkakita ni Pilato nga wala siyay mahimo ug malagmit mahitabo ang dakong kagubot, mikuha siyag tubig ug nanghunaw atubangan sa mga tawo ug miingon, “Wala akoy labot sa dugo niining tawhana ! Inyo kining gusto !” Unya ang tanang mga tawo nanubag kaniya, “Kami ug ang among mga anak maoy dat-ogi sa silot sa Iyang Dugo !” Unya gibuhian ni Pilato si Barabas apan gipalatos niya si Jesus ug gitugyan aron ilansang sa krus. Unya gidala si Jesus sa mga sundalo ngadto sa palasyo ni Pilato nga Gobernador ug didto gialirongan Siya sa mga sundalo. Gihuboan nila si Jesus sa Iyang bisti ug gisul-oban sa bisting dagtom-pula. Ug naghimo silag korona gikan sa mga sangang tunokon ug gipahaom nila kini sa Iyang ulo. Gipakuptan nila sa Iyang tuong kamot ang usa ka bugang. Nangluhod sila sa Iyang atubangan ug gibugalbugalan Siya. Miingon sila, “Mabuhi ang Hari sa mga Judio !” Unya gilud-an nila Siya ug gikuha nila ang lipak ug gibunal sa Iyang ulo. Human nila bugalbugali si Jesus gihukasan nila Siya sa bisting dagtom-pula ug gisul-oban sa Iyang kaugalingong bisti unya gidala sa gawas aron ilansang sa krus. Sa ilang pagpanggula sa siyudad hisugatan nila ang usa ka tawo nga ginganlag Simon nga taga-Cirene ug gipugos nila siya sa pagpas-an sa krus ni Jesus. Unya miabot sila sa usa ka dapit nga ginganlag Golgota, nga sa ato pa, “Ang Dapit sa Kalabera.” Didto ila Siyang gitunolag bino nga sinagolag apdo aron Iyang imnon. Apan tapos Niya tilawi kini, wala Siya moinom niini. Unya gilansang nila Siya sa krus ug gibahinbahin nila ang Iyang sapot pinaagi sa ripa. Tapos nanglingkod sila ug nagbantay Kaniya. Ibabaw sa Iyang ulo gibutang nila ang karatola sa sumbong batok Kaniya : “Mao kini si Jesus, ang Hari sa mga Judio.” Unya tupad kang Jesus gilansang nila sa laing duha ka krus ang duha ka tulisan, ang usa sa iyang tuo ug ang usa sa iyang wala. Ang mga tawo nga nanglabay nagpanglingo ug gibiaybiay nila si Jesus : “Ikaw ba kadtong moguba sa Templo ug motukod niini pag-usab sulod sa tulo ka adlaw ? Kon Ikaw ang Anak sa Dios, luwasa ang Imong kaugalingon ug kanaog sa krus !” Gibugalbugalan usab Siya sa kadagkoan sa mga pari ug sa mga magtutudlo sa Balaod ug sa mga namunoan sa mga Judio. Sila miingon, “Giluwas Niya ang uban apan dili Siya makaluwas sa Iyang kaugalingon ! Kon tinuod nga Siya ang Hari sa Israel kinahanglang manaog Siya sa krus karon dayon aron motuo kita Kaniya ! Misalig Siya nga ubanan Siya sa Dios ug miingon nga Siya Anak sa Dios. Tan-awon kuno nato kon luwason ba Siya sa Dios karon !” Ug bisan ang mga tulisan nga gilansang uban Kaniya mibiaybiay usab Kaniya.

Sa pagkaudtong tutok, mitabon sa tibuok yuta ang kangitngit nga milungtad ug tulo ka oras. Ug sa pagkaalas tres sa hapon mituaw si Jesus, “Eli, Eli, lama sabachthani ?” nga sa ato pa, “Dios Ko, Dios Ko, nganong gibiyaan Mo Ako ?” Ang ubang mga tawo nga nagbarog didto nakadungog Kaniya ug miingon sila, “Nagtawag Siya kang Elias !” Dihadiha usa kanila ang midagan aron pagkuhag espongha nga iyang gihumod sa baratohong bino ug gitaod sa tumoy sa usa ka bugang ug gitunol ngadto kang Jesus aron ipainom Kaniya. Apan may miingon, “Ayaw una, tan-awon nato kon moanhi ba si Elias aron pagluwas Kaniya !” Unya si Jesus misinggit pag-usab ug namatay. Unya ang tabil sa Templo nagisi gikan sa taas ngadto sa ubos. Nauyog ang yuta ug nangapikas ang mga bato. Ang mga lubnganan nangaabli ug daghan sa nangamatay na nga katawhan sa Dios ang nangabanhaw ug nanggula sa ilang lubnganan. Miadto sila sa Balaang Siyudad human mabanhaw si Jesus ug didto nakit-an sila sa daghang mga tawo. Sa diha nga ang opisyal ug ang iyang mga sundalo nga nagbantay kang Jesus nakamatikod sa linog ug sa tanan nga nahitabo, nangahadlok sila pag-ayo ug miingon, “Siya gayod ang Anak sa Dios !”

Pamalandong :

Talagsaon kining Domingoha tungod kay duha ka Ebanghelyo ang gibasa : ang una atong nadungog sa wala pa magsugod ang misa, samtang ang ikaduha atong nadungog sulod sa misa. Nganong duha man ang Ebanghelyo karon ? Ang tubag anaa sa duha ka hitabo nga atong gihatagan pag-usab og kinabuhi ning Domingoha.

Una, gitawag nato kining adlawa og Palm Sunday (Domingo sa Lukay), kanus-a atong gisaulog og balik ang mahimayaong pagsulod ni Kristo sa Jerusalem, diin ang katawhan naglatad og mga lukay sa dalan nga giagian sa Ginoo. Ang unang Ebanghelyo (Mateo 21:1-11) maoy nagsaysay niini kanato. Ikaduha, gitawag nato kining maong adlaw og Passion Sunday (Domingo sa Pagpasakit), kanus-a atong bati-on pag-usab ang mga kasakitan nga gidawat ni Kristo didto sa Jerusalem alang sa atong kaluwasan. Kini ang gisaysay sa ikaduhang Ebanghelyo karon (Mateo 26:14 - 27:66). Giisip sa simbahan kining semanaha nga pinakabalaan nga semana sa tibuok tuig. Busa gitawag kini’g Holy Week. Mas balaan pa kini sa pasko tungod kay ning maong semana mahitabo ang Paschal Mystery – ang dakong misteryo sa pagpasakit, kamatayon ug pagkabanhaw ni Kristo. Sa Tagalog, tawgon kining maong semana og Mahal na Araw. "Mahal" dili tungod kay ning semanaha momahal ang mga palaliton, kondili tungod kay ning mga adlawa luwason kita ni Kristo pinaagi sa pag-ula sa Iyang Dugo. Grabe kamahal ang bayad sa atong kaluwasan. Ang unang Semana Santa puno sa  kaguol, puno sa kasakit, puno sa pagbudhi, ug puno sa pagbiya. Apan, nagpadayag kini sa gugma sa Dios nga dili maparisan ug dili matupngan. Ang katapusang mga gutlo sa kinabuhi ni Jesus dinhi sa kalibotan puno sa kasakitan, apan puno usab kini sa gugma para kanatong tanan. Full of passion, but also full of compassion for you and me.

Unsa may ikabalos nato ning sobra kadako nga gugma ?

Dihay duha ka managsoon nga nagpuyo sa usa ka apartment. Ang magulang buotan ug matarong, apan ang manghod dagha'g bisyo ug hilabihan ka buyagon. Ang magulang nagsigi og hangyo sa manghod nga magbag-o na sa iyang kinabuhi, apan wala kini paminawa. Usa ka gabii niana, nauli ang manghod nga nagkadugo, nagkurog sa kalisang samtang naghawid og kutsilyo. “Tabangi ko bro kay nakapatay ko og tawo. Wala nako tuyoa, nabuhat lang nako tungod sa kahubog. Luwasa intawon ko !” matod sa manghod. Wala madugay, diha nay nadungog nga siren sa patrol car ug nangabot ang kapulisan. Nagpakilooy ang manghod ngadto sa magulang, “Bro, unsa may akong buhaton, tabangi ko !” Unya, sa dakong kalooy ang magulang nakig-ilis og sinina sa iyang manghod. Ang nagkadugong sinina sa iyang manghod maoy iyang gisul-ob, ug siya ang gidakop sa mga pulis. Ang magulang nahukman sa korte nga bitayon tungod sa sala nga pagpatay. Samtang ang manghod nalibre ug nabuhi bisan siya ang nakasala. Karon, ang pangutana : Unsa may angay nga buhaton sa manghod human siya luwasa sa iyang magulang ? 

Ang gibuhat sa magulang diha sa maong estorya mao usab ang gibuhat ni Kristo para kanato. Siya ang mibayad sa sala nga atong nahimo. Gihalad Niya ang Iyang kinabuhi alang sa atong kaluwasan. Karon, human kita makaamgo niini, unsa may atong ibalos Kaniya ? Kini ang pangutana nga angay nga mogiya kanato ning semanaha. Ang tanan natong buhaton ning Semana Santa -- pag-ampo, pagpuasa, paghinulsol, pagbisita Iglesia, paghatag og limos, ug uban pa -- unta atong himoon agi’g pagpasalamat sa Dios nga nag-antos og munamuna para sa atong kaluwasan. Subo palandungon nga nag-anam kadaghan ang mga tawo karon nga wala na maghatag og saktong bili sa Semana Santa ? Imbis nga magbisita iglesia, mga tourist spots naman hinoon ang suroy-suroyon. Imbis nga muadto sa mga simbahan aron mag-ampo, muadto naman hinuon sa mga malls aron magshopping ug maglakwatsa. Imbis nga mamalandong, magsigi naman hinuon og katulog, ang uban magsugal ug mag-inom. Ang "mahal na araw" nahimong barato tungod sa mga tawo nga kulang na sa pagtuo. Isip katawhan nga nakasabot sa dakong gugma sa Dios, atong tahuron ang kabalaan ning maong semana. Moapil kita sa mga liturhikanhong kalihokan sa Simbahan. Atong buhaton pag-usab ang mga makahuloganong tradisyon sama sa pagbisita sa mga simbahan, pagpugong sa kaugalingon, paghatag og limos, pagkumpisal ug pag-ampo sa estasyon sa Krus. Hinumduman nato ang giingon sa usa ka inilang misyonero nga si Charles T. Studd : "If Jesus Christ is God and died for me, then no sacrifice can be too great for me to make for him." Have a blessed Holy Week everyone !

pohsiBtebAyU