Lukas 22:14-23:56

 Ang Pasyon sa atong Ginoo sumala ni San Lukas 22:14-23:56 (Sun. Apr. 13, 2025 Semana Santa / Bendita Sa Lukay)

Sa pag-abot sa takna sa panihapon, mitambong si Jesus sa kan-anan uban sa mga apostoles. Ug miingon Siya kanila, “Dako kaayo ang Akong tinguha sa pagkaon uban kaninyo niining panihapon sa Kasaulogan sa Pagsaylo sa dili pa Ako mag-antos. Kay sultihan Ko kamo nga dili na gayod Ako mokaon niini hangtod nga himoon kini didto sa Gingharian sa Dios.” Unya mikuha si Jesus ug kupa, nagpasalamat sa Dios ug miingon, “Dawata kini ug bahina ninyo kay sultihan Ko kamo nga sukad karon dili na Ako moinom niining bino hangtod nga moabot ang Gingharian sa Dios.” Gikuha Niya ang pan ug nagpasalamat Siya sa Dios unya gipikaspikas Niya kini ug gihatag kanila nga nag-ingon, “Mao kini ang Akong lawas nga gihatag alang kaninyo. Buhata ninyo kini aron paghandom Kanako.” Human sa panihapon, gikuha usab Niya ang kupa ug nagpasalamat Siya sa Dios. Gihatag Niya kini kanila ug miingon Siya, “Kining kupa mao ang bag-ong kasabotan sa Dios, tiniman-an sa Akong Dugo nga giula alang kaninyo. “Apan angay ninyong hibaloan nga ang nagbudhi Kanako ania dinhi mitambong sa lamisa ! Kay mamatay ang Anak sa Tawo sumala sa pagbuot sa Dios apan pagkaalaot niadtong tawo nga nagbudhi Kaniya !” Unya nagpangutan-anay sila kon kinsa kaha kanila ang magbudhi Kaniya. Unya naglalis ang mga tinun-an kon kinsa kanila ang isipon nga labing dako sa tanan. Ug miingon si Jesus kanila, “Ang mga hari niining kalibotana nagmando sa ilang mga ginsakopan, ug ang mga namunoan gitawag ug ‘Mga Dangpanan sa mga Tawo.’ Apan ayaw ninyo kini buhata. Hinuon, ang labing dako kaninyo kinahanglan magpakasama sa kinamanghoran ug ang pangulo kinahanglan magpakasama sa sulugoon. Kinsa man ang labaw, ang gisilbihan ba sa pagkaon o ang nagsilbi kaniya ? Ang gisilbihan gayod ! Apan Ako ania nagsilbi kaninyo. “Miunong kamo Kanako sa tanang mga pagsulay nga Akong naagian ug sama nga ang Akong Amahan naghatag Kanako ug katungod sa paghari, ihatag Ko usab kaninyo ang maong katungod. Mangaon kamo ug manginom didto sa Akong lamisa sa Akong Gingharian ug manglingkod unya kamo sa mga trono aron paghukom sa 12 ka banay sa Israel. “Simon, Simon ! Pagbantay ! Si Satanas gitugotan sa pagsulay kaninyong tanan sama sa usa ka mag-uuma nga maglain sa trigo gikan sa uhot. Apan nag-ampo Ako alang kanimo, Simon, aron dili mabuntog ang imong pagtuo. Ug inigbalik na nimo Kanako, kinahanglan lig-onon mo ang imong kaigsoonan.” Si Pedro mitubag, “Ginoo, andam ako pag-unong Kanimo hangtod sa bilanggoan ug sa kamatayon !” Miingon si Jesus, “Sultihan Ko ikaw, Pedro, nga dili motuktugaok ang manok niining adlawa hangtod nga ilimod mo Ako sa makatulo.”Unya miingon si Jesus kanila, “Sa dihang gipadala Ko kamo kaniadto nga walay dalang puntil o bag o sandalyas, may nakulang ba kaninyo ? “Wala gayod,” mitubag sila. “Apan karon,” miingon si Jesus, “kadtong adunay puntil o bag kinahanglan magdala niini. Kadtong walay espada kinahanglan nga ibaligya niya ang iyang kupo ug ang halin ipalit ug espada. Kay sultihan Ko kamo nga ang bahin sa Kasulatan nga nag-ingon, ‘Gitipon Siya sa mga kriminal,’ kinahanglan matuman dinhi Kanako. Kay ang nasulat bahin Kanako nagsugod na pagkatuman.” Ang mga tinun-an miingon, “Tan-awa, Ginoo, aniay duha ka espada !” Ug mitubag Siya, “Igo na kana !” Milakaw si Jesus ug miadto sa Bungtod sa mga Olibo sumala sa Iyang nabatasan. Mikuyog Kaniya ang Iyang mga tinun-an. Sa nahiabot na sila didto, miingon Siya kanila, “Pag-ampo kamo aron dili kamo madaog sa panulay.” Unya mibiya Siya kanila ngadto sa dili kaayo halayo ug miluhod Siya ug nag-ampo. “Amahan,” miingon Siya, “kon buot Ka, kuhaa kining kupa gikan Kanako. Apan dili ang Akong pagbuot kondili ang Imo maoy matuman.” [ May anghel nga mitungha gikan sa langit nga milig-on Kaniya. Ug samtang nag-antos Siya sa hilabihang kasakit, nag-ampo Siya sa labi pa ka mainiton gayod. Ang Iyang singot sama sa dagkong tulo sa dugo nga nangahulog sa yuta.]

Human sa Iyang pag-ampo, mitindog Siya ug mibalik ngadto sa Iyang mga tinun-an. Nakita Niya sila nga nahikatulog tungod sa hilabihang kasubo. Ug miingon Siya kanila, “Nganong nangatulog man kamo ? Bangon ug pag-ampo kamo aron dili kamo madaog sa panulay." Samtang nagsulti pa Siya, nahiabot ang usa ka panon sa mga tawo. Si Judas, usa sa 12 ka tinun-an, nag-una kanila ug miduol siya kang Jesus aron paghalok Kaniya. Apan si Jesus miingon, “Judas, budhian ba diay nimo ang Anak sa Tawo pinaagi sa usa ka halok ?” Sa dihang nakita sa mga tinun-an ni Jesus nga kauban niya kon unsa ang mahitabo, miingon sila, “Ginoo, tigbason ba namo sila ?” Ug usa kanila mitigbas sa ulipon sa Pangulong Pari ug naputol ang iyang tuong dalunggan. Apan si Jesus mitubag, “Husto na !” Ug gihikap ni Jesus ang dalunggan sa ulipon ug giayo siya. Unya miingon si Jesus sa mga kadagkoan sa mga pari ug sa mga opisyal sa mga guwardiya sa Templo ug sa mga pangulo sa mga Judio nga miadto didto aron pagdakop Kaniya, “Tulisan ba Ako nga nagdala man kamog mga espada ug mga puspos sa pagdakop Kanako ? Matag adlaw uban Ako kaninyo didto sa Templo ug wala Ako ninyo dakpa. Apan kining taknaa inyo ug sa gahom sa kangitngit.” Unya gidakop nila si Jesus ug gidala ngadto sa balay sa Pangulong Pari. Si Pedro misunod nga nagpaantaw. Sa taliwala sa hawanan may hinaling nga kalayo ug mitipon si Pedro sa mga naglingkod libot niini. Sa pagkakita sa usa sa mga babayeng sulugoon kang Pedro nga naglingkod duol sa kalayo, mitutok siya kang Pedro ug miingon, “Kining tawhana kauban usab Niya !” Apan gipanghimakak kini ni Pedro nga nag-ingon, “Day, wala ako makaila Kaniya !” Sa wala madugay, may usa ka tawo nga nakamatikod kaniya ug miingon, “Kauban ka usab nila !” Apan mitubag si Pedro, “Dili, uy ! Dili ako kauban nila !” Unya paglabay sa mga usa ka takna, dihay laing tawo nga miinsistir sa pag-ingon, “Walay duhaduha kining tawhana kauban gayod Niya kay taga-Galilea man usab siya ! ”Apan mitubag si Pedro, “Uy, wala koy kalibotan sa imong gipanulti !” Samtang nagsulti pa siya, may manok nga mituktugaok. Milingi ang Ginoo ug mitutok kang Pedro, ug nahinumdom si Pedro sa gisulti sa Ginoo kaniya, “Sa dili pa motuktugaok ang manok karong adlawa, ilimod mo na Ako sa makatulo.” Migula si Pedro ug mihilak sa hilabihang pagbasol. Unya gibugalbugalan ug gibunalan si Jesus sa mga tawo nga nagbantay Kaniya. Gitaptapan nila ang Iyang mata ug gipangutana Siya, “Tag-ana kinsay nagbunal Kanimo ?” Ug daghan pa ang ilang gisulti sa pagpanamastamas Kaniya. Sa pagkabuntag na, nagtigom ang mga punoan sa mga Judio ug ang mga kadagkoan sa mga pari ingon man ang mga magtutudlo sa Balaod ug gidala si Jesus ngadto sa ilang Labawng Hukmanan. “Sultihi kami,” miingon sila, “Ikaw ba ang Mesiyas ?” Mitubag Siya, “Kon sultihan Ko kamo, dili kamo motuo Kanako, ug kon pangutan-on Ko kamo, dili kamo motubag. Apan sukad karon ang Anak sa Tawo maglingkod sa tuo sa Dios nga Labing Gamhanan.” Ug miingon silang tanan, “Ikaw ba gayod diay ang Anak sa Dios ?” Siya mitubag kanila, “Giingon ninyo nga Ako mao.” Unya miingon sila, “Wala na kita magkinahanglan pag mga saksi ! Nadungog gayod nato gikan sa Iyang kaugalingong baba !” Ang tanan mitindog ug gidala nila si Jesus sa atubangan ni Pilato. Ug didto gisumbong nila Siya. Miingon sila, “Hisakpan namo kining tawhana nga nagpasalaag sa atong mga tawo ug nag-awhag kanila sa dili pagbayad ug buhis ngadto sa Emperador ug miangkon nga Siya mao ang Mesiyas nga usa ka hari.” Si Pilato nangutana Kaniya, “Ikaw ba ang hari sa mga Judio ?” Si Jesus mitubag, “Giingon Mo.” Unya miingon si Pilato sa mga kadagkoan sa mga pari ug sa mga tawo, “Wala akoy nakaplagang katarongan nga silotan kining tawhana.” Apan misamot hinuon sila sa pag-ingon, “Nagpasiugda Siya'g kagubot sa mga tawo tungod sa Iyang pagtulon-an. Nagsugod Siya sa Galilea unya milibot sa tibuok Judea ug karon ania na dinhi.” Sa pagkabati ni Pilato niini, nangutana siya, “Taga-Galilea ba kining tawhana ?” Ug sa pagkasayod niya nga si Jesus gikan diay sa dapit nga gimandoan ni Herodes, gipadala niya si Jesus ngadto kang Herodes nga didto sa Jerusalem niadtong panahona. Nalipay pag-ayo si Herodes sa pagkakita niya kang Jesus kay nakabalita na man siya mahitungod Kaniya ug dugay na siyang nagtinguha sa pagpakigkita Kaniya. Nangandoy usab siyang motan-aw kang Jesus nga maghimog milagro. Busa gipangutana ni Herodes si Jesus bahin sa daghang mga butang apan wala gayod motubag si Jesus. Miduol ang mga kadagkoan sa mga pari ug ang mga magtutudlo sa Balaod ug mipasakag bug-at nga mga sumbong batok kang Jesus. Unya gibugalbugalan Siya ug gibiaybiay ni Herodes ug sa iyang mga sundalo. Gisul-oban Siya nilag harianong bisti ug gipadala balik kang Pilato. Niadto gayong adlawa, nagkahigala si Herodes ug si Pilato nga kaaway kaniadto. Unya gipatawag ni Pilato ang mga kadagkoan sa mga pari, ang mga pangulo ug ang mga tawo. Giingnan niya sila, “Inyong gidala dinhi kanako kining tawhana ug miingon kamo nga nagpasalaag Siya sa mga tawo. Giimbistigar ko Siya dinhi sa inyong atubangan apan nakaplagan nako nga dili Siya sad-an sa bisan unsa sa mga daotang buhat nga gisumbong ninyo batok Kaniya. Si Herodes wala usab makakaplag Kaniya nga sad-an kay gipadala man niya kining tawhana pagbalik kanato. Wala Siyay nabuhat nga angay silotan sa kamatayon. Busa ipalatos ko lang Siya ug unya buhian.” Apan misinggit ang tibuok pundok sa mga tawo, “Patya Siya ! Si Barabas maoy buhii !” (Si Barabas gibilanggo gumikan sa usa ka pag-alsa sa mga tawo nga nahitabo sa siyudad ug tungod kay nakapatay siya.) Buot ni Pilato nga buhian si Jesus, busa misulti siya pag-usab ngadto sa mga tawo. Apan misinggit sila pagtubag kaniya, “Ilansang Siya sa krus ! Ilansang Siya sa krus !” Sa ikatulo ka higayon miingon si Pilato kanila, “Apan unsa bay sala nga Iyang nahimo ? Wala akoy nakaplagan bisag unsa nga angay sa silot sa kamatayon ! Ipalatos ko Siya ug unya buhian.”

Apan nagpadayon sila pagsinggit ug namugos nga si Jesus ilansang gayod sa krus ug milampos gayod sila sa kataposan. Busa gipahamtang ni Pilato kang Jesus ang silot nga ilang gipangayo. Ug gibuhian niya ang tawo nga ilang gipili, ang gibilanggo tungod sa pagpanggubot ug sa pagpatay. Ug gitugyan niya si Jesus ngadto kanila aron buhaton nila ngadto Kaniya ang ilang gusto. Samtang gidala nila si Jesus, gikasugat nila ang usa ka tawo nga ginganlag Simon nga taga-Cirene nga nagpadulong sa siyudad gikan sa balangay gawas sa siyudad. Gidakop nila siya ug gipapas-an sa krus ug gipasunod kang Jesus. May dakong panon sa mga tawo nga misunod kang Jesus ug ang uban kanila mga babaye nga naghilak ug nagminatay tungod Kaniya. Unya milingi si Jesus kanila ug miingon, “Mga babaye sa Jerusalem, ayaw Ako ninyog hilaki ! Hilaki hinuon ang inyong kaugalingon ug ang inyong mga anak. Kay moabot ang mga adlaw nga moingon ang mga tawo, ‘Bulahan ang mga babaye nga dili manganak ug ang mga babaye nga wala makapanamkon ug ang wala gayod makapasuso ug mga bata !’ Mao kadtong panahona nga ang mga tawo moingon sa mga bukid, ‘Pangatumpag ngari kanamo !’ ug ngadto sa mga bungtod, ‘Taboni kami !’ Kay kon kining mga butanga gibuhat sa lunhaw pa ang kahoy, unsa kahay mahitabo kon laya na kini ?”

Nagdala usab sila ug laing duha ka tawo nga kriminal aron patyon uban kang Jesus. Sa pag-abot nila sa dapit nga ginganlag “Ang Kalabera,” gilansang nila si Jesus ug ang duha ka kriminal—ang usa diha sa Iyang tuo ug ang usa sa Iyang wala. Unya miingon si Jesus, “Amahan, pasayloa sila  kay wala sila mahibalo sa ilang gibuhat.” Ug gibahinbahin nila ang iyang sapot pinaagi sa ripa. Nagtindog didto ang mga tawo nga nagtan-aw, samtang nagbugalbugal Kaniya ang mga kadagkoan sa mga Judio nga nag-ingon, “Giluwas Niya ang uban, ipaluwas Niya ang Iyang kaugalingon kon Siya mao man ang Mesiyas nga pinili sa Dios !”

Gibugalbugalan usab Siya sa mga sundalo : miduol sila ug gitunolan Siyag aslom nga bino ug giingnan, “Kon ikaw ang hari sa mga Judio, luwasa ang Imong kaugalingon !” Sa ibabaw sa krus gisulat nila kining mosunod : “Kini Siya mao ang Hari sa mga Judio.” Unya, usa sa mga kriminal nga nagbitay didto mibiaybiay Kaniya, “Dili ba Ikaw mao man ang Mesiyas ? Luwasa ang Imong kaugalingon ug kami !” Apan gibadlong siya sa iyang kauban nga nag-ingon, “Wala ka ba mahadlok sa Dios ? Ania kita dinhi gisilotan sa mao rang silot. Apan angay kanato ang silot nga gipahamtang kanato kay tukma man kini sa atong nabuhat apan Siya walay sala.” Ug miingon siya kang Jesus, “Jesus, hinumdomi intawon ako kon maghari Ka na !” Miingon si Jesus kaniya, “Sultihan Ko ikaw, karong adlawa adto ka sa Paraiso uban Kanako.”

Mga alas dose na kadto ang takna sa dihang mihunong pagdan-ag ang adlaw ug mitabon ang kangitngit sa tibuok kayutaan hangtod sa alas tres ug napikas ang tabil nga nagbitay didto sa Templo. Unya sa kusog nga tingog misinggit si Jesus, “Amahan, itugyan Ko sa Imong mga kamot ang Akong Espiritu !” Human Siya makasulti niini, namatay Siya. Ang opisyal sa mga sundalo nakakita sa nahitabo ug gidayeg niya ang Dios, sa pag-ingon, “Tinuod gayod nga Siya maayong tawo !”

Sa dihang nakakita sa nahitabo ang mga tawo nga nagtapok didto aron pagtan-aw, namauli silang tanan nga nagpamukpok sa ilang dughan sa kasubo. Ang tanang kaila ni Jesus, lakip ang mga babaye nga misunod Kaniya gikan sa Galilea, nagpaantaw didto aron pagtan-aw sa mga nanghitabo. May tawo nga ginganlag Jose nga taga-Arimatea nga usa ka lungsod sa mga Judio. Maayo ug ligdong siya nga pagkatawo ug nagpaabot sa paghari sa Dios. Ug bisan tuod sakop siya sa Labawng Hukmanan sa mga Judio, wala siya mouyon sa ilang hukom ug sa ilang gibuhat. Miadto siya kang Pilato ug gipangayo niya ang lawas ni Jesus. Unya gikuha niya ang lawas gikan sa krus ug giputos niyag panapton nga lino ug gibutang sa usa ka lubnganan nga gilungag diha sa pangpang nga bato—usa ka lubnganan nga wala pa gayod magamit. Adlaw kadto sa Pagpangandam ug hapit na magsugod ang Adlawng Igpapahulay. Ang mga babaye nga misunod kang Jesus gikan sa Galilea mikuyog kang Jose ug nakita nila ang lubnganan ug giunsa pagpahimutang didto ang lawas ni Jesus. Unya namauli sila ug ilang giandam ang mga pahumot ug ang mga igdidihog sa Iyang lawas. 

Pamalandong :

Karong adlawa gitawag kini og “Domingo sa Lukay”.

Bendisyonan sa pari ang mga lukay sa dili pa ang Misa aron paghandum sa katawhan sa Jerusalem nga nagdala'g mga lukay aron pagsugat nga mahinangpon kang Jesus didto sa ilang siyudad. Apan, gitawag usab kining maong adlaw og “Domingo sa Pagpasakit” tungod kay diha sa Misa, ato usab nga gihandum pagbalik ang pagsalikway ug pagkondena nga nasinati ni Jesus sa mga kamot sa mga Hudiyo. Subo palandungon nga ang katawhan nga nidawat kang Jesus mao usab ang katawhan nga nisalikway Kaniya. Ang “liturhiya sa mga lukay” ug ang “liturhiya sa pagpasakit,” gahulagway lamang sa dili makanunayon natong pagsanong kang Kristo. Usahay, atong dawaton si Jesus sa atong kinabuhi ; sa ubang panahon ato Siyang isalikway ug dili paminawon. Ang pangutana mao kini : Unsa may hinungdan ning pag-usab-usab sa atong pagsunod kang Kristo ? Nganong dili man makanunayon ang atong pagpakig-uban Kaniya ?

Usa ka posible nga hinungdan mao ang pagkalaog sa tawo. Ang katawhan sa Jerusalem adunay linaog nga tinguha sa pagdawat kang Jesus. Interesado sila Kaniya tungod kay nadunggan man nila ang mga milagro nga Iyang gihimo. Gidawat nila si Jesus tungod kay nagtoo sila nga ang kaayohan nga Iyang gibuhat sa uban, buhaton usab Niya sa Jerusalem. Daghan ang naghunahuna nga Siya mao ang hari nga magluwas kanila gikan sa mga banyagang Romano. Apan, sa dihang nasuta nila nga si Jesus moluwas sa paagi nga lahi sa ilang gusto, ila Siyang gitalikdan. Gani, ang katawhan wala na diha sa dihang si Kristo nanginahanglan sa ilang pagpakig-uban.

Kita aduna usay kalaog sama sa katawhan sa Jerusalem. Usahay, atong isipon ang Ginoo nga murag emergency unit. Mosangpit lang ta Niya kon anaa kita sa kalisod, o sa panahon nga adunay problema. Pero, sa kalipay ug kahamugaway, maglisod kita’g pangita'g panahon sa Ginoo ug sa Simbahan. Kon dapiton ta sa Dios sa pagpangalagad sa Iyang katawhan, dili gani kita maminaw. Ang lain nga posibleng rason sa pag-usab-usab sa tawo mao ang kahadlok sa kalisod ug pag-antos. Nausab ang baroganan sa katawhan sa Jerusalem sa dihang nasabtan nila nga ang panggamhanan nagtinguha sa pagdakop ug pagpatay kang Jesus. Taliwala sa pagpanglutos, dili na sila gusto nga mailhan nga sumusunod ni Kristo. Bisan si Pedro, tungod sa kahadlok, gipanghimakak na si Jesus.

Usahay, kita sama usab kang Pedro ug sa katawhan sa Jerusalem. Gusto ta nga molikay sa mga pagsuway, hagit, ug pakigbisog sa atong pagsunod kang Kristo. Moapil lang kita sa mga kalihokan sa Simbahan kon kini hamugaway ug kon kita dili mahasol. Apan, dili na kita manginlabot kon kita tawgon na sa pagbarog sa kamatuoran, o paglihok alang sa kaayohan sa mga kabos ug dinaugdaog. Malimot kita nga ang debosyon ug pagsimba mahimo lamang makahuloganon kon kini ubanan sa pagpangalagad ug paglihok alang sa kaayohan sa tanan.

Aduna pa gyoy laing posibleng hinungdan ngano nga mausab ang tawo sa iyang pagsunod kang Kristo. Kini mao ang kakulang sa pagsalig. Daghan sa mga Hudiyo nga nitagbo kang Jesus didto sa Jerusalem nitoo sa Iyang mga milagro, pero ang ilang pagsalig Kaniya dili lig-on. Sa dihang si Jesus nagpakita nga Siya andam nga makigbatok sa mga kadagkoan sa mga Hudiyo ug sa mga Romano, nahadlok ang Iyang mga sumusunod. Unsa ra may mahimo Niya batok sa mga kadagkoan sa templo ug sa gobyerno ? Wala sila mosalig nga si Jesus adunay gahum labaw sa tanang mga butang ug nga Siya lamang ang makaluwas kanila batok sa sala ug kamatayon. Pila ba ka higayon nga nagkulang usab kitag pagsalig sa makaluwas nga gahum ni Kristo ? Mag-ampo kita kon aduna kitay pangayoon, pero kon ang atong pag-ampo dili dayon dunggon, magsugod dayon kita'g duhaduha kon ang Ginoo anaa ba. Sa panahon sa mga aksidente ug katalagman, mangutana ta kon ang Dios nagpakabana ba. Ang atong kakulang sa pagsalig sa Dios maoy magdala kanato ngadto sa mga patoo-too ug sa mga tambalan. Pagkagamay sa atong pagtoo ! Kon nidawat kita nga si Jesus Anak sa Dios ug nga Siya ang Hari sa uniberso, nganong ato mang hagiton ang Iyang kabubut-on ? Kon nitoo ta nga Siya ang Maayong Magbalantay, o Manggiloloy-ong Amahan, nganong mabalaka pa man kita ?

Ning panahon sa Semana Santa, ang Simbahan nagdasig kanato sa pagpamalandong sa pagka-Dios ni Jesus, ug sa pagpasalamat Kaniya tungod sa Iyang pagpakita kanato unsa ang tinuod nga anak sa Dios ? Tulo ka butang ang atong hataga’g pagtagad karon :

Una, ang tinuod nga anak sa Dios mao siya nga makamaong maghunahuna sa uban ug dili laog. Bisan sa pinakalisod Niyang kahimtang, si Hesus nagpadayon sa paghunahuna sa kaayohan sa uban : Iyang gidasig ang mga tinun-an (Lukas 22:28-30), gi-alam-alaman ang mga babaye sa Jerusalem (23:27-31), gipasaylo ang mga nagpasakit Kaniya (23:34), ug gisaara’g kaluwasan ang nagbasol nga tulisan (23:42-43). 

Ikaduha, ang tinuod nga anak sa Dios andam nga mag-antos para sa kaayohan sa uban. Si Jesus nasayod nga sa Iyang pagsulod sa Jerusalem tabla ra nga Iyang gitugyan ang kaugalingon sa kasakitan, nga magdala Kaniya sa hinanaling kamatayon. Pero, si Jesus wala mahadlok sa pagsulod sa siyudad ni David tungod kay nabati Niya nga kinahanglan Niyang dasigon ang mga tawo sa pagdawat sa maayong balita kalabot sa paghari sa Dios.

Ug sa katapusan, ang tinuod nga anak sa Dios mao siya nga mohatag sa iyang kinatibuk-ang pagsalig sa Ginoo. Si Jesus nagpabiling lig-on samtang Siya nag-atubang sa pinakadakong pagsuway sa Iyang kinabuhi. Didto sa tanaman sa Getsemane, si Jesus gipaningot og dugo samtang Siya nag-ampo sa lawom nga paagi : “Amahan, kon mahimo kuhaa kining kupa sa kasakit Kanako ; apan, dili ang Ako kondili ang Imong kabubut-on maoy matuman (Lukas 22:42). Unya, human sa mga oras sa grabeng kasakitan didto sa krus, si Jesus misinggit sa makusog nga tingog, “Amahan Ko, sa Imong mga kamot itugyan Ko ang Akong Kalag” (Lukas 23:46). Aniay Anak nga nagpabiling masaligon sa Iyang Langitnong Amahan kutob sa katapusan.

pohsiBtebAyU