Lukas 1:39-45

 Ang Santos nga Ebanghelyo sumala ni San Lukas 1:39-45 (Sun. Dec. 22, 2024)

Unya nangandam si Maria ug midali pag-adto sa usa ka lungsod sa kabukiran sa Judea. Miadto Siya sa balay ni Zacarias ug nakighimamat kang Elisabet. Sa pagkabati ni Elisabet sa pangomusta ni Maria, milihok ang bata sulod sa iyang tiyan. Unya napuno sa Espiritu Santo si Elisabet ug misulti sa kusog nga tingog, “Bulahan Ka sa tanang mga babaye ! Bulahan ang bata nga Imong ipanganak ! Pagkadako sa akong kalipay nga ang inahan sa akong Ginoo miduaw kanako ! Kay pagkadungog ko gayod sa Imong pangomusta, milukso sa kalipay ang bata nga akong gisabak. Bulahan Ka nga mituo nga matuman gayod ang mensahe sa Ginoo Kanimo !”

Pamalandong :

UNSA MANG BUTANGA ANG ATONG TINGUHAON  NING PASKO ?

Kabulahan ba ana nga magtiayon !  Puro professional ang mga anak.  Mga buotan pa jud !  Ang ila intawong silingan, maka-afford unta mopaeskwela pero ang mga anak puro nagbinuang.  Wa juy nakahuman.”  “Kabulahan ba nila !  Naa nay 13th month pay, naa pay bonus.  Kami intawon payslip lang... kay pag-abot sa “pay” mo-“slip” lang dayon.  Di paigo bayad sa utang.”  Sagad nato malambigit ang pagkabulahan (blessedness) sa maayo, nindot, kahayahay, kaabunda, ug kalipay.  Ug ang binalī niini ingnon nato nga “malas.”

Sa Ebanghelyo nato karong ika-4 nga Domingo sa Adbiyento ug Ika-7 nga Misa de Gallo, si Isabel nga puno sa Espiritu Santo miingon sa makusog nga tingog, “Bulahan ka sa mga babayeng tanan, ug bulahan ang bunga sa imong sabakan” (v. 42).  Tinuod man jud nga bulahan si Maria kay siya ang gipili nga mamahimong inahan sa Dios, bisan wala kaayo siya makasabot sa mensahe sa anghel, siya nalipay pag-ayo tungod niining dakong prebilihiyo.  Apan sayud usab kita nga ang iyang pagkabulahan mamahimong bangkaw nga molagbas sa iyang kasing-kasing kay makita niya ang iyang Anak nga magbitay sa Krus.  

Sa ato pa, kun pilion diay kita sa Ginoo usa kini ka korona sa kalipay ug krus sa pag-antus sa samang higayon.  Ang Dios diay kung mopili ug tawo, iya kining gamiton.  Ug kun mag-antus man siya isip resulta sa maong pagpili, dili kini niya angay ikaguol kay kining iyang gi-antus alang sa Ginoo.  Mianhi si Kristo dili aron himoong sayon ang kinabuhi, kundili aron himoong bantogan ang mga tawo.  Ang pagka-dili-masabot nga pagkabulahan, mao kini ang naghatag sa usa ka tawo ug dakong kalipay ug dakong tahas sa samang higayon.

Ang pagkaginikanan, pananglitan, usa ka dakong prebilihiyo ug dakong tahas sa samang higayon.  Sa pagkatawo sa bata, lipay kaayo ang mga ginikanan.  Pero ang pag-atiman, pagpadako, pagpaeskwela, ug pagmatoto niini sa hustong pamatasan usa ka dakong tahas ug sakripisyo.  Matud pa ni Spiderman, “With great power comes great responsibility.”  Ako nagtoo nga ingon jud niana ang balaod sa kinabuhi.  Matag prebilihiyo nagtangag ug tahas.

Mga Igsoon, matag-usa kanato naa juy prebilihiyo nga gikalipay ug kini nagtangag ug dakong tahas.  Makaila unta kita sa mga prebilihiyo nga gihatag kanato sa Ginoo, ug makahibalo usab unta kita sa mga tahas nga gitangag niini aron mamahimo kitang mga maayong instrumento sa katukoran sa Iyang Gingharian dinhi sa yuta.

Sdrap