Mateo 16:13-23

 Ang Santos nga Ebanghelyo sumala ni San Mateo 16:13-23 (Thu. Aug. 8, 2024)

Unya miadto si Jesus sa yuta duol sa lungsod sa Cesarea Filipo ug didto nangutana Siya sa Iyang mga tinun-an, “Sumala sa mga tawo, kinsa man ang Anak sa Tawo ?” Sila mitubag, “May nag-ingon nga Siya mao si Juan nga Magbubunyag. Ang uban nag-ingon nga Siya mao si Elias samtang ang uban nag-ingon nga Siya mao si Jeremias o laing propeta.” Si Jesus nangutana kanila, “Apan kamo, unsa may inyong ikasulti ? Kinsa man Ako ?” Ug mitubag si Simon Pedro, “Ikaw mao ang Mesiyas, ang Anak sa Dios nga buhi.” Giingnan siya ni Jesus, “Bulahan ka gayod, Simon nga anak ni Jonas. Kay kining maong kamatuoran wala moabot kanimo pinaagi sa bisan unsang tawhanong pamaagi. Ang Akong Amahan nga atua sa langit mao ang naghatag niini kanimo. Busa sultihan Ko ikaw : ikaw si Pedro ug ibabaw niining bato tukoron Ko ang Akong simbahan ug bisan gani ang kamatayon dili gayod makabuntog niini. Ihatag Ko kanimo ang mga yawi sa Gingharian sa langit : ang imong idili dinhi sa yuta, idili usab didto sa langit. Ug ang imong itugot dinhi sa yuta, itugot usab didto sa langit.” Unya gipasidan-an ni Jesus ang Iyang mga tinun-an nga dili isaba kang bisan kinsa nga Siya mao ang Mesiyas. Sukad niadtong higayona, giklaro na gyod ni Jesus pagsulti ngadto sa Iyang mga tinun-an : “Kinahanglang moadto Ako sa Jerusalem aron paantuson pag-ayo sa mga namunoan sa mga Judio ug sa mga pangulong pari ingon man sa mga magtutudlo sa Balaod. Patyon Ako nila apan sa ikatulo ka adlaw mabanhaw Ako.” Tungod niini gidala Siya ni Pedro layo sa uban ug giingnan, “Dili unta kana mahitabo Kanimo, Ginoo !” Miatubang si Jesus ug miingon kang Pedro, “Pahawa, Satanas ! Usa ikaw ka babag sa Akong agianan kay ang imong hunahuna, hunahuna sa tawo ug dili sa Dios !”

Pamalandong :

ASA MAN GIKAN ANG ATONG PAGKAILA NI KRISTO ? 

Giingnan ni Jesus si Pedro : “Simon, anak ni Jonas, bulahan ka, tungod kay ang nagsulti kanimo niini dili tawo kondili ang Akong Amahan nga atua sa langit.” Kining Ebanghelyo karon nagtudlo kanato nga ang atong pagkaila ni Kristo usa ka dakong grasya, bunga sa inspirasyon nga nagagikan sa Dios Amahan. Makadasig ug makapahimo natong mapaubsanon kining maong kamatuoran. “Makadasig” tungod kay kini nagpasabot nga wala kita mag-inusara sa atong pagpangita sa kamatuoran ug kaluwasan. Aduna diay Dios Amahan nga nagtultol kanato sa dalan padulong sa Iyang Anak. Makapahimo natong “mapaubsanon” tungod kay kini nagpasabot nga sa atong kaugalingong katakos dili nato mailhan ang Dios diha kang Kristo ug dili nato madawat ang Iyang kaluwasan. Matod pa sa tambag ni Charles Spurgeon," If you wish to know God, you must know His Word. If you wish to perceive His power, you must see how He works by his Word. If you wish to know His purpose before it comes to pass, you can only discover it by His Word.

pohsiBtebAyU