Juan 6:24-35

 Ang Santos nga Ebanghelyo sumala ni San Juan 6:24-35 (Sun. Aug. 4, 2024 Ikanapulog-Walo nga Domingo sa Ordinaryong Panahon)

Sa pagkamatikod sa mga tawo nga wala didto si Jesus ug ang Iyang mga tinun-an, nanakay sila sa mga sakayan ug nangadto sa Capernaum aron pagpangita Kaniya. Sa nakit-an na nila si Jesus didto sa tabok sa lanaw, miingon sila Kaniya, “Magtutudlo, kanus-a Ka pa mahiabot dinhi ?” Si Jesus mitubag, “Sultihan Ko kamo : nangita kamo Kanako dili tungod kay nakasabot kamo sa mga milagro nga Akong nahimo kondili tungod kay nakakaon man kamo sa pan ug nangabusog. Ayaw kamo paghago alang sa pagkaon nga madaot, kondili sa pagkaon nga molungtad ngadto sa kinabuhing walay kataposan. Kining pagkaona ihatag kaninyo sa Anak sa Tawo, kay anaa Kaniya ang pag-uyon sa Dios nga Amahan.” Busa gipangutana nila Siya, “Unsa may among buhaton aron pagtuman sa mga ipabuhat sa Dios ?” Si Jesus mitubag, “Ang buluhaton nga ipabuhat sa Dios kaninyo mao nga motuo kamo sa Iyang gipadala.” Sila mitubag, “Unsa mang milagroha ang Imong ipakita kanamo aron manuo kami Kanimo ? Unsa may Imong himoon ? Ang among mga katigulangan nangaon ug mana didto sa kamingawan, sumala gayod sa giingon sa kasulatan: ‘Gihatagan Niya sila'g pan gikan sa langit.’” Si Jesus miingon, “Sultihan Ko kamo : dili si Moises ang naghatag kaninyo ug pan gikan sa langit ; ang Akong Amahan mao ang naghatag naghatag kaninyo sa matuod nga pan gikan sa langit. Kay ang pan nga gihatag sa Dios mao Siya nga nanaog gikan sa langit ug naghatag ug kinabuhi sa kalibotan.” Sila miingon Kaniya, “Sir, hatagi kami kanunay niining maong pan.” Si Jesus miingon kanila, “Ako mao ang Pan nga naghatag sa Kinabuhi. Ang moari Kanako dili na gayod gutomon ug ang motuo Kanako dili na gayod uhawon. 

Pamalandong :

ADUNAY DUHA KA MATANG SA KAGUTOM : ANG LAWASNON UG ANG ESPIRITUHANON

Ang lawasnon nga kagutom mao ang masinati sa mga tawong wala o gamay lang ang makaon. Tungod sa kawad-on, daghang mga tawo ang makasinati sa lawasnong kagutom. Samtang ang espirituhanong kagutom mao ang mabati sa mga tawo nga wala pa makaila sa Ginoo, O kanila nga nangandoy pa sa tinuod nga kalipay, O sa mga tawo nga nangita pa sa kamatuoran. Ang mga pobre maoy kanunay’ng makasinati sa lawasnong kagutom. Kinahanglan nga magkugi sila sa pagtrabaho matag adlaw aron makakaon. Kung walay swerte, hasta ang bitok mapasmo sa kagutom. Apan, mapobre O madato, ang tawo usahay makasinati sa espirituhanong kagutom. Mangandoy kini sa tinuod nga kalipay. Mangita kini sa tinuod nga kahulugan sa kinabuhi. Daghang mga tawo nga dili magmalipayon bisan anaa na kanila ang bahandi, dungog ug gahum. Ngano man kini ? Ang Ebanghelyo adunay tubag niini : “Ang tawo dili mabuhi sa pan lamang, kondili sa matag Pulong nga magagikan sa baba sa Dios.” Ang kalibutanong pan – salapi, butang, tawhanong relasyon, ug uban pa – dili igo nga makatagbaw sa tawo. Ang tawo manginahanglan gayod sa Dios tungod kay siya gikan man sa Dios. Si San Agustin nakaamgo niini ug siya nakapamulong : “O Ginoo, gihimo Mo kami para sa Imong kaugalingon, ug ang among mga kasingkasing magpabilin nga dili mahiluna hangtud nga kini dili makapahulay uban Kanimo.” Kon adunay duha ka matang sa kagutom, aduna puy duha ka klase nga pagkaon : ang materyal ug ang espiritwal. Ang tawo, sanglit binuhat nga lawasnon ug espirituhanon, kinahanglan nga mokaon sa materyal ug espiritwal nga pagkaon aron makabaton og tinuod nga kinabuhi. Unsa man kining espiritwal nga pagkaon ug asa man kini makuha ? Alang kanatong mga may pagtoo, ang espiritwal nga pagkaon mao ang Pulong sa Dios nga makuha diha sa Balaang Kasulatan ug diha sa persona ni Cristo. Diha sa Ebanghelyo karon, si Jesus nagkanayon : “Ako ang pan sa kinabuhi. Ang mosunod Kanako dili na gyud gutomon. Ang motoo Kanako dili na gayud uhawon.” Unsa may Iyang gipasabut niini ? Si Jesus mao ang buhing Pulong sa Dios nga nagpakatawo. Pinaagi Kaniya atong masabtan ang kinatibuk-ang mensahe sa Dios. Siya ang pinakabililhong Pagkaon nga Espiritwal nga gihatag kanato aron nga kita makabaton sa kinabuhing walay katapusan. Sa unsa mang paagi nato madawat si Jesus, ang Pan sa Kinabuhi ? Atong madawat si Jesus sa Iyang kinatibuk-an diha sa Eukaristiya. Pinaagi sa pagkalawat, ang atong kinabuhi mahiusa kang Jesus ug sa tibuok Simbahan. Ug kining maong kahiusahan mahatagan og kahulugan kon kita magsugod sa pagsunod sa kinabuhi ug panig-ingnan ni Jesus. Pinaagi lamang niini kita makasinati sa tinuod nga kalipay ug makabaton sa katagbawan. Sa gikaingon na ni Jesus: “Ang mosunod Kanako dili na gyud gutomon. Ang motoo Kanako dili na gayud uhawon.” Adunay mga tawo nga igo-igo lang ang kahimtang. Mag-overtime gyud sa pagtrabaho aron adunay ikapakaon sa pamilya. Apan, bisan pa sa kadaghan sa ilang trabaho, aduna gihapon silay panahon para sa Ginoo. Makatandog kaayo hunahunaon nga haloyo sa kadaghan sa ilang giatiman, makalugar gihapon sila sa pag-adto sa Simbahan aron mag-ampo, mosimba ug mag-apil sa kalihokang apostolado. Aduna usa'y mga tawong nagsobra na ang kwarta apan mokayod pa gihapon sa pagtrabaho ug pagnegosyo. Wala na hinuo'y panahon para sa Ginoo. Wala pud gani silay panahon para sa pamilya. Subo kaayo palandungon nga bisan sa ilang kaugalingon, dili na sila makaatiman tungod kay naulipon sa trabaho ug sa bahandi. Kining klaseha sa mga tawo dili makakita sa katagbawan ug sa tinuod nga kalipay tungod kay sa gikaingon na ni Jesus: “Ang tawo dili mabuhi sa pan lamang, kondili sa matag pulong nga magagikan sa baba sa Dios." Ang mga butang kalibutanon gihatag kanato sa Ginoo aron kita magmalipayon. Apan, sa atong paggamit kanila, angay kita nga magmabinantayon ug magmaalamon. Ang daghang mga butang makadisturbo kanato ug makahurot sa atong panahon para sa Ginoo. Usahay gani, tungod sa bahandi, ang tawo makalimot na nga aduna siya'y panginahanglan sa Dios. Unya na pud kita mahinumdum pagsangpit sa Ginoo kon magkaproblema na, kon masakit na, O kon himalatyon na. Busa, angay gayud natong hatagan og dakong pagtagad ang mga pulong ni Jesus sa Ebanghelyo karong adlawa : “Paghago kamo, dili alang sa kalan-ong madunot, kondili sa kalan-ong molungtad ug makahatag sa kinabuhing dayon.”

Mga punto nga angay natong hinuklogan ug maayo :

1. Unsa may hinungdan sa atong mga kaguol ug kakulang sa kalipay karong panahona ?

2.  Lawasnon ba o espiritwal nga kagutom kining atong nasinati karon ?

3. Asa man kita nangita'g kalipay ug katagbawan – sa materyal ba o sa espiritwal nga pagkaon ?

pohsiBtebAyU