Mateo 13:24-30

 Ang Santos nga Ebanghelyo sumala ni San Mateo 13:24-30 (Sat. July 27, 2024)

Unya misugilon si Jesus kanila'g laing sambingay : “Ang paghari sa Dios nahisama sa usa ka tawo nga nagpugas ug maayong binhi didto sa iyang uma. Usa niana ka gabii, samtang nangatulog ang tanan, usa ka kaaway ang miadto ug misabod ug liso sa mga sagbot sagol sa trigo ug unya mibiya. Sa nakatubo na ang mga tanom ug misugod na pagbuswak ang mga uhay, diha pa mailhi ang mga sagbot. Ang mga sulugoon sa tag-iya miduol kaniya ug miingon, ‘Sir, maayo man unta ang binhi nga imong gipugas apan diin man gikan ang mga sagbot ?' Siya mitubag, ‘Usa ka kaaway ang naghimo niini.’ Sila nangutana kaniya, ‘Gusto ka bang mangadto kami ug pangibton namo ang mga sagbot ?’ Siya mitubag, ‘Ayaw ! Kay sa inyo unyang pag-ibot sa mga sagbot, basig maapil ug kaibot ang trigo. Pasagdi ninyo nga ang trigo ug ang mga sagbot magdunga'g tubo hangtod sa ting-ani kay ingnon ko ra unya ang mga tig-ani : Ibta ninyo pag-una ang mga sagbot, bugkosa kini ug ilabay ngadto sa kalayo. Apan tigoma ang trigo ug hiposa didto sa akong kamalig.’ ”

Pamalandong :

UNSA MAN NGA PUWERSA ANG NAGHARI DIHA SA ATONG KINABUHI KARON – KATARONG BA O KADAOTAN ?

Ang Ebanghelyo ni San Mateo migamit og daghang hulagway aron ipasabut kanato ang Gingharian sa Langit. Usa niini mao ang Sambingay sa Trigo ug sa Sagbot nga atong nadungog karong adlawa. Diha sa Ebanghelyo, si Cristo mipasabut sa kahulugan sa sambingay pinaagi sa pag-ingon : “Ang tawo nga nagsabwag sa maayong binhi walay lain kondili Ako nga Anak sa Tawo. Ang yuta nga gisabwagan mao ang kalibotan. Ang maayong binhi mao ang mga tawo nga nagapasakop sa paghari sa Dios. Ug ang mga sagbot mao ang mga tawong sakop ni satanas. Si satanas mao ang kaaway nga nagsabwag sa mga sagbot. Ang ting-ani mao ang kataposan sa kalibotan, ug ang mga mag-aani mao ang mga anghel. Sama nga ang mga sagbot ibton ug unya sunogon mao usab unya ang mahitabo sa kataposan sa kalibotan. Ako nga Anak sa Tawo magpadala sa Akong mga anghel aron tigomon ug pagawason gikan sa Akong gingharian ang tanang nagbuhat ug daotan nga nahimong hinungdan sa pagpakasala sa uban. Ug itambog sila ngadto sa kalayo sa impiyerno. Ug didto maghilak sila ug magkagot ang ilang mga ngipon. Ang mga matarong mosidlak sama sa adlaw didto sa gingharian sa ilang Amahan. Kinahanglan sabton gayod ninyo kining inyong nadungog !” Unsa man ang kalambigitan sa maong sambingay sa atong kinabuhi karon ? Una sa tanan, naandan natong gihunahuna ang Gingharian sa Langit nga usa ka lugar (geographical location) diin adto mopadulong ang mga matarong. Pinaagi sa Sambingay sa Trigo ug sa Sagbot, atong masabtan nga ang Gingharian sa Langit dili lamang usa ka lugar kondili usa ka kahimtang sa kinabuhi kanus-a ug diin ang kabubut-on sa Dios maoy maghari. Ang Gingharian sa Langit diay angay natong sabton isip presensya o paghari sa Dios. Ikaduha, diha sa sambingay atong masabtan nga ang Gingharian sa Langit nagpabiling abli kanunay  bisan aduna pay sala ug kadaotan ang mga tawo. Kini tungod kay si Cristo walay hunong nga nanawagan sa pagbasol ug nagpasaylo sa mga sala. Ang Gingharian o ang Paghari sa Dios nagsugod na karon dinhi sa kalibotan tungod kay matag karon ug unya adunay mga tawo nga mobiya sa daotang kinabuhi ug mosugod pagsunod sa saktong dalan nga gisubay ni Cristo. Ikatulo, atong mabati diha sa sambingay ang dakong pasensya sa Ginoo alang sa mga sagbot sa katilingban. Ang tawhanong reaksyon atubangan sa mga daotan mao ang dinaliang pagpaibot sa mga sagbot. Kon dunay masayop o makasala, ato dayong kondenahon, papahawaon o kaha patyon. Apan dili ingon niini molihok ang Dios. Andam Siya nga mohulat o mohatag og kahigayonan sa sagbot o sa makasasala nga mausab ug mamahimong trigo. Ang sambingay naghagit kanato nga magbaton ug pasensya sama sa Dios. Pasensyahan nato ang atong kaugalingon tungod kay aduna man kitay mga kahuyangon. Walay bisan usa kanato nga perpekto tungod kay kada tawo adunay sagbot sa sulod. Pasensyahan usab nato ang atong isigkatawo, ilabi na kadtong wala pa makakita'g kahayag, o sila nga giisip natong mga hugaw sa katilingban. Pinaagi sa Diosnong pasensya, daghang makasasala ang makakita'g kahayag ug makabato'g kaluwasan. 

Sa katapusan, ang Sambingay usa ka dakong hagit para kanato nga maningkamot nga magpabiling trigo diha sa katilingban sa Dios. Gihimo kita sa Ginoo nga maayong binhi, gitanum sa kalibotan, ug gilaomang makapamunga og daghang kaayohan. Mag-ampo kita nga sa pag-abut sa dakong Adlaw sa Paghukom, makaplagan kita sa mga anghel sa Ginoo nga angayang pasudlon sa Iyang gingharian.

pohsiBtebAyU