Mateo 5:27-32

 Ang Santos nga Ebanghelyo sumala ni San Mateo 5:27-32 ( Fri. June 14, 2024)

“Nakadungog kamo nga giingon kaniadto, ‘Ayaw panapaw.’ Apan karon sultihan Ko kamo nga bisan kinsay motan-aw sa usa ka babaye uban sa daotang tinguha nakapanapaw na ngadto kaniya sulod sa iyang kasingkasing. Busa kon ang imong tuong mata makaangin kanimo sa pagpakasala, lugita kini ug ilabay kay mas maayo pa nga kawad-an ang imong lawas ug usa ka bahin kay sa itambog ang tibuok mong lawas ngadto sa impiyerno. Kon ang imong tuong kamot makaangin kanimo sa pagpakasala, putla kini ug ilabay ! Mas maayo pa nga kawad-an ka ug usa ka kamot kay sa itambog ang tibuok mong lawas ngadto sa impiyerno. “Giingon usab kaniadto, ‘Ang makigbulag sa iyang asawa kinahanglan nga maghatag kaniya ug sinulat nga pahibalo sa pakigbulag.’ Apan karon sultihan Ko kamo nga kinsa kadtong mobulag sa iyang asawa bisan wala magluib kaniya makasala kay siya man ang hinungdan sa pagpanapaw unya sa iyang asawa kon magminyo kini pag-usab. Bisan ang mangasawa kaniya makapanapaw usab.

Pamalandong :

UNSA MAY ATONG BUHATON SA MGA TAWO NGA MAGDANI KANATO SA PAGPAKASALA ? 

Si Jesus miingon : “Kon ang imong tuong mata makaangin kanimo sa pagpakasala lugita kini ug ibalibag, kay mas maayo pa kanimo nga kawad-an ang imong lawas og usa ka bahin kaysa itambog ang tibuok mong lawas ngadto sa impiyerno.” Kining maong panultihon dili angay sabton sa iyang mga letra kondili sa iyang nagpaluyo nga mensahe. Ang mga tawo nga magdasig kanato sa pagbuhat og daotan angay gayod nPatong likayan ug biyaan. Ang atong mga higala atong unongan sa maayong binuhatan, apan dili sa daotan. Si San Pablo nag-ingon : “Ayaw kamo patunto. Ang daotang mga kauban makadaot sa maayong pamatasan” (1 Cor 15:33). Sakto ang giingon, “We cannot hang out with bad people and expect a good, moral life.”

pohsiBtebAyU