Mateo 5:20-26

 Ang Santos nga Ebanghelyo sumala ni San Mateo 5:20-26 (Thu. June 13, 2024)

Busa sultihan Ko kamo nga dili kamo makasulod sa Gingharian sa langit kon ang inyong pagtuman sa kabubut-on sa Dios sama lamang sa gihimo sa mga magtutudlo sa Balaod ug sa mga Pariseo. “Nasayod kamo nga ang mga tawo giingnan kaniadto, ‘Ayaw pagpatay ; ang magpatay manubag niini sa hukmanan.' Apan karon sultihan Ko kamo nga ang masuko sa iyang isigkatawo dad-on ngadto sa maghuhukom ug ang maghingala'g kuwanggol sa iyang isigkatawo manubag niini ngadto sa Labaw'ng Hukmanan ug bisan kinsa nga moingon nga buang ang iyang isigkatawo malagmit nga mahiagom sa kalayo sa impiyerno. Busa inigdala na nimo sa imong halad ngadto sa halaran unya didto mahinumdoman mo nga nasilo kanimo ang imong isigkatawo, biyai ang imong halad atubangan sa halaran ug adtoa dayon ang imong isigkatawo ug pakig-uli una kaniya. Unya balik sa halaran ug padayona ang imong paghalad sa Dios. “Kon may mokiha kanimo ug dad-on ka niya sa hukmanan, pakighusay dayon kaniya samtang may panahon pa ug wala pa kamo moabot didto kay kon moabot na kamo sa hukmanan, itugyan ka niya sa huwes ug ang huwes motugyan kanimo sa polis ug bilanggoon ka niya. Ug magpabilin ka didto hangtod nga mabayran nimo ang tanan mong multa.

Pamalandong :

UNSA MAY MAGHIMO SA TAWO NGA MATARONG ATUBANGAN SA DIOS ? 

Para sa mga Pariseo, ang pagsunod sa mga letra sa Balaod maoy maghimo kanilang matarong. Apan alang kang Kristo, dili pa kini igo. Ang tawo mahimo lamang nga matarong kon siya matinud-anon sa iyang mga gipangbuhat. Himoon niya ang pag-ampo, pagpangayo’g pasaylo, pagpakig-uli, pagtabang sa kabos, ug pag-amping sa kinaiyahan tungod kay nasayod siya nga kini ang sakto. Buhaton niya kini bisan kon walay mga tawo nga nagtan-aw kaniya. Si Kristo nagtudlo nga kon magbuhat kita’g maayo aron lamang daygon, mahisama kita sa “pinaputing lubnganan” nga limpyo lamang sa gawas apan hugaw ang sulod. Si Douglas Adams nag-ingon, “To give real service, you must add something which cannot be bought or measured with money, and that is sincerity and integrity.”

pohsiBtebAyU