Marcos 16:15-20

 Ang Santos nga Ebanghelyo sumala ni San Marcos 16:15-20 (Sun. May 12, 2024)

Miingon Siya kanila, “Panglakaw kamo sa tibuok kalibotan ug isangyaw kining Maayong Balita ngadto sa tanang mga tawo. Ang motuo ug magpabunyag maluwas, apan ang dili motuo, silotan. Ug mao kini ang mga timaan nga mabatonan sa mga motuo : sa Akong ngalan maghingilin silag mga yawa ug manulti silag lainlaing mga sinultihan. Makakupot silag mga halas ug kon makainom silag hilo, dili sila maunsa. Itapion nila ang ilang mga kamot sa mga masakiton ug mangaayo sila.” Human makigsulti kanila ang Ginoong Jesus, gibayaw Siya ngadto sa langit ug milingkod sa tuo sa Dios. Ug nanglakaw ang mga tinun-an ug nagsangyaw sa Maayong Balita sa tanang dapit. Mitabang gayod kanila ang Ginoo ug nagpamatuod sa ilang giwali pinaagi sa paghatag kanila ug gahom sa pagbuhat ug ilhanan.

Pamalandong :

UNSA MAY ATONG MISYON SA KINABUHI ?

Aron ang tawo maningkamot ug makakita'g kahulogan sa kinabuhi, kinahanglan makasabot siya sa iyang misyon ning kalibotan. Diha kang Cristo, atong nasayran nga ania kita ning kalibotan dili aron magpalabig inum, sugal, pangbabae, o pangitag kwarta, kondili aron sa pagpaambit sa gugma sa Ginoo ngadto sa isigkatawo. Sa Iyang ministeryo publiko, atong nasabtan ang matang ug ang kadako sa gugma sa Dios para sa matag tawo. Sa Iyang Pagsaka sa Langit, gibilin Niya kanato ang misyon sa pagsangyaw ning maong gugma ngadto sa atong isigkaingon pinaagi sa pulong ug buhat. Busa, kon gusto kitang magmalipayon, atong sugdan pagtuman ang atong misyon karon.

Sa laing bahin usab, Ang pagpamunyag maoy usa ka dakong sugo nga gibilin ni Jesus sa iyang Simbahan. Pinaagi ning sakramento, ang tawo nga mabunyagan makaambit sa dignidad ug misyon ni Kristo. Una, tungod sa bunyag nahimo kitang mga sinagop nga mga anak sa Dios ug manununod sa Iyang gingharian. Mao kini ang atong dignidad nga dili angayng pabayloag kwarta ug sa bisan unsang butang. Ug ikaduha, tungod sa bunyag nahimo kitang mga propeta, pari ug pangulo. “Propeta” tungod kay kita adunay katungdanan sa pagsangyaw sa Maayong Balita ; “Pari” tungod kay kita adunay katungdanan sa pag-ampo ug paghalad og mga sakrispisyo ngadto sa Dios ; ug “Pangulo” tungod kay kita adunay katungdanan sa pagpanguna diha sa pagpangalagad sa katawhan. Matod pa ni Jim Elliot, " He is no fool who gives up what he cannot keep, to gain that which he cannot lose."

pohsiBtebAyU