Marcos 14:12-16,22-26

 Ang Santos nga Ebanghelyo sumala ni San Marcos 14:12-16,22-26 (Sun. June 2, 2024 Solemnidad Sa Lawas Ug Dugo Ni Cristo)

Sa unang adlaw sa Kasaulogan sa Pan nga Walay Patubo, ang adlaw nga maoy ting-ihaw sa mga karnero nga ihalad sa panahon sa Kasaulogan sa Pagsaylo, ang mga tinun-an nangutana kang Jesus, “Asa man kami Nimo paadtoa aron andamon namo ang panihapon ?” Ug gisugo ni Jesus ang duha kanila ug giingnan, “Pangadto kamo sa siyudad ug matagbuan ninyo ang usa ka tawo nga naglukdo ug usa ka banga nga tubig. Kuyog kamo kaniya ngadto sa balay nga iyang adtoan ug ingna ang tag-iya sa balay nga ang Magtutudlo nag-ingon, ‘Hain ang kuwarto alang Kanako diin Ako makigsalo sa Akong mga tinun-an sa panihapon sa Kasaulogan sa Pagsaylo ?’ Unya tultolan kamo niya sa usa ka dakong kuwarto sa itaas nga sangkap sa galamiton ug inandam na. Didto andama ang tanan alang kanato.” Ug miadto ang mga tinun-an sa siyudad ug ilang nakit-an ang tanan sumala sa giingon ni Jesus. Didto giandam nila ang panihapon. Samtang nangaon sila, mikuha si Jesus ug pan, nagpasalamat ug gipikaspikas Niya kini ug gihatag ngadto sa Iyang mga tinun-an. Miingon Siya, “Kan-a ninyo kini. Kini mao ang Akong lawas.” Unya gikuha Niya ang kupa ug gipasalamatan ang Dios. Gitunol Niya kini kanila ug silang tanan nanginom niini. Miingon si Jesus, “Kini mao ang Akong dugo nga giula alang sa daghan ug naglig-on sa kasabotan sa Dios. Ug sultihan Ko kamo nga dili na gayod Ako moinom pag-usab niining bino hangtod sa adlaw nga moinom Ako sa bag-ong bino didto sa Gingharian sa Dios.” Unya nag-awit sila ug usa ka awit sa pagdayeg sa Dios ug nangadto sa Bungtod sa mga Olibo.

Pamalandong :

KINSA MAN ANG ATONG GIDAWAT DIHA SA EUKARISTIYA ?

Niining Solemnidad sa Lawas ug Dugo ni Cristo, kita gipahinumduman kon kinsa ang atong gidawat diha sa Eukaristiya ug kon unsa ang atong gibuhat diha sa pagkalawat. Ang atong gidawat diha sa Santos nga Misa mao si Cristo mismo. Ang Ebanghelyo nagsaysay mahitungod sa Katapusang Panihapon kanus-a gitukod ni Cristo ang Eukaristiya. Mikuha Siya og pan, nagpasalamat sa Dios Amahan, mipikas niini ug miingon sa Iyang mga tinun-an: “Dawata ninyo kini. Kini mao ang Akong lawas.” Unya, mikuha Siya sa kalis, nagpasalamat sa Dios Amahan ug mitunol niini ngadto sa mga tinun-an ug miingon: “Kini ang Akong dugo, ang dugo sa kasabotan nga iula alang sa daghang katawhan”. Klaro kaayo sa mga lihok ug pulong ni Cristo nga ang Eukaristiya nga Iyang gihimo maoy usa ka buhat sa dakong pagsakripisyo. Gawasnon Niya nga gihalad ang Iyang tibuok kinabuhi alang sa kaluwasan sa mga tawo. 

Sa Balaang Kasulatan, ang Kasabotan (covenant) maoy usa ka solemne nga pagpanumpa sa duha ka partido nga magmatinud-anon sa ilang gikauyonan. Pananglitan, sa kasabotan tali sa Dios ug sa katawhan sa Israel, ang Ginoo nanumpa nga mag-amoma ug manalipud sa katawhan sa Israel. Sa ilang bahin, ang katawhan sa Israel nanaad nga tumanon nila ang tanang sugo sa Ginoo. Matag solemneng kasabotan adunay ilhanan. Ang bangaw maoy nahimong ilhanan sa kasabotan sa Dios ug ni Noe; ang pagtuli maoy timailhan sa kasabotan sa Dios ug ni Abraham; ug, sumala sa unang pagbasa, ang pagsablig sa dugo gikan sa hinalad nga mga mananap maoy nahimong ilhanan sa kasabotan sa Dios ug ni Moises. Sa ikaduhang pagbasa, ang sulat para sa mga Hebreo nagpasabut nga sa bag-ong Kasabotan, dili na dugo sa mga mananap ang giula kondili dugo mismo ni Cristo. Ang maong dugo gihatag dili aron isablig kondili aron imnon sa mga tawo alang sa ilang kaluwasan. Si Cristo mao ang naghimo sa paghalad, ug ang gihalad mao ang Iyang kinabuhi. Kon ang dugo sa mga mananap gitoohan sa mga tawo nga makahugas sa ilang tawhanong kahugaw, unsa na lang kaha ang kalimpyo sa tawo nga mahugasan sa dugo sa Anak sa Dios. Diha ni Cristo, wala nay bili ang paghalad ug pagpadugo sa mga mananap. Atubangan sa Dios, wala nay laing mas bililhon pa nga halad kaysa Santos nga Misa. Buhata kini aron sa paghandum kanako.” Tungod sa gibiling sugo ni Cristo, ang Eukaristiya nahimong walay kinutubang handumanan sa sakripisyo sa kinabuhi nga Iyang gihalad. Dili kini ordinaryong handumanan tungod kay sa matag higayon nga kini saulogon maghatag kini og grasya ug kaluwasan sa mga tawo nga magsaulog niini ug sa mga tawo nga gipahinungdan niini.

Unsa man ang atong gibuhat diha sa pagkalawat?

Diha sa atong pagkalawat, kita gawasnon nga misulod sa usa ka Kasabutan uban sa Dios. Diha sa atong pagdawat sa lawas ug dugo ni Cristo, sama ra nga kita miingon: “Oo Ginoo, gusto ako nga mahiusa Kanimo.” Sa Iyang kabahin, si Cristo nagsaad kanato: “Ang mukaon sa Akong lawas ug moinum sa Akong dugo makabaton sa kinabuhing walay katapusan.”

Sa Ingles, ang pagkalawat gitawag nato og communion, usa ka nindot nga pulong nga nagpasabut og kahiusahan. Diha sa atong pagkalawat, kita nahiusa uban kang Cristo ug sa Kristohanong katilingban. Kining kahiusahan dili lang sa bangkite o sa pagkaon kondili kahiusahan sa kinabuhi ug misyon ni Cristo dinhi sa kalibutan. Kon kita makig-uban ni Cristo sa matag adlaw sa atong kinabuhi, makasiguro kita nga makadawat sa walay katapusan nga kinabuhi ug kalipay nga Iyang gisaad. 

pohsiBtebAyU