Marcos 11:27-33

 Ang Santos nga Ebanghelyo sumala ni San Marcos 11:27-33 (Sat. June 1, 2024)

Unya namalik sila sa Jerusalem. Samtang naglakaw si Jesus sulod sa Templo, giduol Siya sa kadagkoan sa mga pari ingon man sa mga magtutudlo sa Balaod ug sa mga pangulo sa mga Judio. Nangutana sila Kaniya, “ Unsa may Imong katungod sa pagbuhat niini ? Kinsa may naghatag Kanimo sa maong katungod ?” Miingon si Jesus kanila, “Usa lang ang Akong pangutana kaninyo ug kon makatubag kamo, tug-anan Ko kamo sa unsang katungod Ako nagbuhat niining mga butanga. Tug-ani Ako, diin man gikan ang katungod ni Juan sa iyang pagpamunyag ? Gikan ba sa Dios o gikan ba sa tawo ?” Unya gitimbangtimbang nila ang ilang itubag Kaniya : “ Unsa may atong itubag ? Kon motubag kita nga gikan sa Dios, mosumbalik Siya pagpangutana, ‘Unya ngano man nga wala kamo motuo kang Juan ?’ Apan unsa may atong itubag, ‘Gikan sa tawo ?’ ” (Nangahadlok sila sa mga tawo kay ang tanan nagtuo man gayod nga si Juan tinuod nga propeta.) Busa mitubag sila kang Jesus, “Ambot lang !” Ug miingon si Jesus kanila, “Sa ato pa, dili Ko usab kamo tug-anan kon sa unsang katungod Ako nagbuhat niining mga butanga.”

Pamalandong :

GIILA BA NATO ANG GAHUM UG KATUNGOD NI JESUS SA ATONG KINABUHI ? 

Human gibadlong ug giabog ni Jesus ang mga nagnegosyo sa templo, gipangutana Siya sa mga kadagkoan sa mga Hudiyo kon kinsay naghatag Kaniya og katungod sa pagbuhat niini. Wala sila makasabot nga si Jesus, ang bugtong Anak sa Dios, maoy naghupot sa katungod sa pagdumala sa moral nga kinabuhi sa mga tawo. Isip mga sumusunod ni Kristo, angay natong ilhon kining maong katungod sa Dios nga modumala sa atong moral nga panimuyo. Siya, dili kita, ang magbuot unsay maayo ug daotan. Ang Iyang mga sugo ug pagtulon-an maoy atong sundon tungod kay kini ang kahayag sa dalan nga atong gilaktan. Ang Libro sa Panultihon nag-ingon, “ We can make our plans, but the Lord determines our steps."

pohsiBtebAyU