Juan 19:25-34

 Ang Santos nga Ebanghelyo sumala ni San Juan 19:25-34 (Mon. May 20, 2025)

Duol sa krus ni Jesus nagbarog ang Iyang inahan ug ang igsoon sa Iyang inahan, si Maria nga asawa ni Cleofas ug si Maria Magdalena. Sa pagkakita ni Jesus sa Iyang inahan ug sa tinun-an nga Iyang gimahal nga nagbarog didto, miingon Siya sa Iyang inahan, “Babaye, siya ang imong anak.” Unya miingon Siya sa tinun-an, “Siya ang imong inahan.” Sukad niadto gidala sa tinun-an si Maria aron didto na mopuyo sa iyang balay. Human niini, si Jesus nga nasayod nga ang tanan natuman na ug aron pagtuman sa kasulatan, miingon, “Giuhaw Ako.”Didto may usa ka panaksan nga puno sa suka ug gitunlob nila ang espongha sa suka ug gibutang sa usa ka sanga sa isopo ug giisa nila kini ngadto sa Iyang baba. Human makatilaw si Jesus sa suka, miingon Siya, “Natapos na !” Unya miduko Siya ug namatay. Ang kadagkoan sa mga Judio mihangyo kang Pilato nga balion nila ang mga bitiis sa mga tawo nga gilansang sa krus ug unya kuhaon sila. Gihimo nila kini kay adlaw man kadto sa Pagpangandam, ug dili sila buot nga magpabilin ang mga lawas didto sa krus sa Adlawng Igpapahulay kay ang umaabot nga Adlawng Igpapahulay balaan man kaayo. Busa nangadto ang mga sundalo ug ilang gipamali ang mga bitiis sa duha ka tawo nga gilansang sa krus uban kang Jesus. Apan sa pagduol na nila kang Jesus, nakita nila nga patay na Siya busa wala nila balia ang Iyang mga bitiis. Apan ginamit ang iyang bangkaw, giduslak sa usa sa mga sundalo ang kilid ni Jesus ug dihadiha mibuhagay ang Dugo ug Tubig. 

Pamalandong :

NGANONG ANGAY MAN KITANG MAG-INAMBITAY SA KASAKIT SA USAG-USA ?

Adunay panultihon sa Ingles nga nagkanayon, “Shared grief is half the sorrow”, nga sa ato pa, ang kagul-anan nga gi-ambitan mahimong sayon ug gaan. Ug tinuod kini sumala sa atong kasinati-an. Bisan unsa kadako ang problema, kaya natong atubangon ug pas-anon basta aduna tay kauban. Ang Birhen Maria nagpakita kanato unsa ang tiunay nga gugma – andam kini nga moambit sa kasakit sa tawong gihigugma. Didto sa tiilan sa krus, si Maria nagpabilin ug nakighiusa sa tanang pag-antos sa iyang anak nga si Hesus. Siya ang modelo sa inahan nga dili gayod mobiya sa anak, ilabina panahon sa kasakit. Busa, kon aduna tay problema, adto ta moduol ni Maria, kay siya man ang gitahasan sa Dios nga mahimo natong Inahan sa Kanunay’ng Panabang.

pohsiBtebAyU