Juan 17:20-26

 Ang Santos nga Ebanghelyo sumala ni San Juan 17:20-26 ( Thu. May 16, 2024)

“Nag-ampo Ako dili lamang alang kanila kondili alang usab niadtong motuo Kanako tungod sa ilang mensahe. Nag-ampo Ako nga mausa unta sila. Amahan, mausa unta sila dinhi Kanato sama nga Ikaw ania Kanako ug Ako anaa Kanimo aron motuo ang kalibotan nga Ikaw maoy nagpadala Kanako. Gihatagan Ko sila sa samang himaya nga Imong gihatag Kanako aron sila mausa sa hingpit ingon nga Ikaw ug Ako usa ra. Ako anaa kanila ug Ikaw ania Kanako aron sila mausa ug sa ingon masayod ang kalibotan nga Ikaw nagpadala Kanako ug nga nahigugma Ka kanila sama nga Ikaw nahigugma Kanako. “Amahan, gihatag Mo sila Kanako ug buot Ko nga bisan asa Ako atua usab sila aron makakita sila sa Akong himaya, ang himaya nga Imong gihatag Kanako, kay nahigugma Ka man Kanako bisan sa wala pa buhata ang kalibotan. Amahan nga matarong, ang kalibotan wala makaila Kanimo apan Ako nakaila Kanimo ug kini sila nasayod nga Ikaw ang nagpadala Kanako. Gipaila Ko Ikaw kanila ug kini Akong padayonon pagbuhat aron mabatonan nila ang Imong gugma alang Kanako ug magpuyo usab Ako diha kanila.”

Pamalandong :

SA UNSA MANG PAAGIHA KITA MAGKAHIUSA ? 

Adunay mga tawo nga magkahiusa diha sa bisyo, sama sa pag-inom, pagpanugal, ug pangbabae. Ang uban magkahiusa sa pagpanglibak, pagpanikas, ug pagpamaligya'g druga. Dili kini maayo. Diha sa Ebanghelyo karon si Jesus nag-ampo nga kita magkahiusa sama nga Siya ug ang Iyang Amahan nahiusa sa gugma. Ang gugma maoy maghimo sa pagkahiusa nga positibong hiyas. Nindot kaayo kon kita magkahiusa sa pagbantay sa kalinaw, sa pagsulbad sa kapobrehon, sa pagpalig-on sa pamilya, sa pag-amping sa kinaiyahan, ug uban pa. Kini nga panaghiusa maoy atong himoon tungod kay pinaagi niini ang katilingban sa Dios malig-on. Hinumduman nato ang giingon ni Hans Urs Von Balthasar : “Even if a unity of faith is not possible, a unity of love is.”

pohsiBtebAyU