Lukas 24:35-48

 Ang Santos nga Ebanghelyo sumala ni San Lukas 24:35-48 (Sun. Apr. 14, 2024)

Unya gisaysay sa duha ka tawo ang nahitabo didto sa dalan ug ang pagkaila nila sa Ginoo sa Iyang pagpikaspikas sa pan. Samtang nagsugilon pa sila niini, mitungha ang Ginoo sa taliwala nila ug miingon, “Ang kalinaw mag-uban kaninyo.” Nakurat sila ug nalisang ug naghunahuna nga nakakita sila'g multo. Apan miingon Siya kanila, “Nganong nabalaka man kamo ? Nganong nagduhaduha kamo ? Tan-awa ninyo ang Akong mga kamot ug mga tiil. Ako gayod kini ! Hikapa Ako ug makita ninyo kay ang espiritu walay unod ug mga bukog sama sa nakita ninyo nga ania Kanako.” Gisulti Niya kini ug Iyang gipakita kanila ang Iyang mga kamot ug mga tiil. Apan wala gihapon sila makatuo ug hilabihan ang ilang kahibulong apan nalipay sa ilang nakita. Busa gipangutana sila ni Jesus, “Duna ba kamo'y makaon dinhi ?” Ug gihatagan nila Siya'g usa ka buok nga sinugbang isda ug gidawat kini ni Jesus ug gikaon diha sa ilang atubangan. Unya miingon Siya kanila, “Kining mga butanga mao gayod ang Akong gisulti kaninyo samtang uban pa Ako kaninyo. Kinahanglan matuman ang tanan nga nahisulat mahitungod Kanako sa Balaod ni Moises ug sa mga sinulat sa mga propeta ingon man sa mga Salmo.” Unya gipasabot Niya sila sa Kasulatan, ug miingon Siya kanila, “Kini mao ang nahisulat nga ang Mesiyas kinahanglan nga mag-antos ug unya mabanhaw sa ikatulong adlaw. Kinahanglan nga isangyaw pinaagi sa Iyang Ngalan ang mensahe mahitungod sa paghinulsol ug sa pagpasaylo sa mga sala ngadto sa tanang mga nasod, sugod sa Jerusalem. Kamo mga saksi niining mga butanga. 

Pamalandong :

UNSA MAY GUSTO SA NABANHAW’NG KRISTO NGA ATONG ISANGYAW NGADTO SA KALIBOTAN ? 

Sa Iyang pag-ingon, “Kamo mga saksi niining mga butanga,” buot ni Kristo nga pamatud-an nato ang misteryo sa Iyang kasakit ug pagkabanhaw. Siya usa ka Dios nga buhi. Gisakit Siya ug gipatay sa mga daotan, apan wala Siya magpabilin sa lubnganan. Nagmadaugon Siya batok sa sala ug sa kamatayon, ug tungod niini, kita makalaum na sa kinabuhing dayon. Dugang pa niini, buot ni Kristo nga atong isangyaw ang kapasayloan sa mga sala sa tanan nga maghinulsol tungod sa Iyang paghalad sa kinabuhi didto sa krus. Sanglit kita maoy unang nakasinati sa pasaylo sa nabanhaw'ng Ginoo, kita ang magdasig sa uban sa pagdawat sa kapasayloan sa Dios diha sa sakramento sa kompisal. Si Martin Luther King jr. nag-ingon, "We must develop and maintain the capacity to forgive. He who is devoid of the power to forgive is devoid of the power to love. There is some good in the worst of us and some evil in the best of us. When we discover this, we are less prone to hate our enemies."

pohsiBtebAyU