Juan 10:1-10

 Ang Santos nga Ebanghelyo sumala ni San Juan 10:1-10 (Mon. Apr. 22, 2024)

Unya miingon si Jesus, “Sultihan Ko kamo : ang tawo nga dili moagi sa pultahan inigsulod niya sa toril apan mokatkat hinuon sa laing bahin niini, kawatan ug tulisan. Apan ang magbalantay sa mga karnero mosulod agi sa pultahan. Ug ang pultahan ablihan sa tig-abli aron makasulod siya. Mamati ang mga karnero sa iyang tingog inigtawag niya sa ilang tagsatagsa ka ngalan ug mag-una siya kanila sa ilang paggula. Kon atua na sila sa gawas, mag-una siya kanila ug ang mga karnero mosunod kaniya kay nakaila man sila sa iyang tingog. Apan dili sila mosunod sa laing magbalantay. Managan hinuon sila kay wala man sila makaila sa iyang tingog.” Gisaysay ni Jesus kanila kining sambingaya apan wala sila makasabot sa Iyang gisugilon kanila. Busa miingon si Jesus pag-usab, “Sultihan Ko kamo : Ako ang pultahan sa mga karnero. Ang tanan nga mianhi una Kanako mga kawatan ug mga tulisan. Busa wala mamati kanila ang mga karnero. Ako ang pultahan. Ang mosulod agi Kanako maluwas. Makasulod-gawas siya ug makakaplag siyag masibsib. Apan ang kawatan moanhi aron lamang pagpangawat, pagpatay ug paglaglag. Mianhi Ako aron makabaton kamo ug kinabuhing madagayaon.

Pamalandong :

KANG KINSA MANG TINGOG ANG ATONG GIPAMINAW ? 

Ning modernong panahon daghan kaayong tingog ang atong madungog. Anaa ang tingog sa “materyalismo” nga mag-agni kanato sa pagkalaog sa mga kalibotanong butang ; anaa ang tingog sa “secularismo” nga magdani kanato sa pagbiya sa mga espirituhanong kamatuoran ; anaa ang tingog sa “liberalismo” nga magdasig kanato sa pagbuhat bisan unsay atong gusto bisan kon sayop ; ug uban pa. Ang Ebanghelyo karon magpahinumdum kanato nga kita mga karnero sa Dios ug si Kristo mao ang atong Maayong Magbalantay. Aron dili kita mahisalaag, ang tingog nga angay natong paminawon sa kanunay mao ang tingog ni Kristo, dili ang tingog sa kalibotan. Adunay nagtambag : “If you can’t hear the voice of God, turn off the world’s volume.”

pohsiBtebAyU