Mateo 26:14-25

 Ang Santos nga Ebanghelyo sumala ni San Mateo 26:14-25 (Miyerkoles Santo Mar. 27, 2024) 

Unya ang usa sa napulog-duha ka tinun-an, ang ginganlag Judas Iscariote, miadto sa kadagkoan sa mga pari ug miingon, “Unsa may inyong iganti kanako kon itugyan ko kaninyo si Jesus ?” Miihap sila ug katloan ka salapi nga sinsilyo ug gihatag kini kaniya. Sukad niadtong adlawa si Judas nangitag maayong higayon sa pagbudhi kang Jesus. Sa unang adlaw sa Kasaulogan sa Pan nga Walay Patubo, ang mga tinun-an miadto kang Jesus ug nangutana Kaniya, “Asa man Nimo gustong ipaandam kanamo ang panihapon sa Kasaulogan sa Pagsaylo ?” Si Jesus miingon kanila, “Adtoa ninyo ang usa ka tawo didto sa siyudad ug ingna siya, ‘Ang Magtutudlo nag-ingon, miabot na ang Akong oras. Ako ug ang Akong mga tinun-an maghimo sa Kasaulogan sa Pagsaylo didto sa imong balay.’ ”Ug gibuhat sa mga tinun-an ang giingon ni Jesus kanila ug giandam nila ang panihapon. Sa pagkagabii, si Jesus ug ang napulog-duha ka tinun-an mitambong sa kan-anan. Ug samtang nangaon sila miingon si Jesus, “Sultihan Ko kamo, usa kaninyo magbudhi kanako.” Nangaguol pag-ayo ang mga tinun-an ug ang tagsatagsa kanila nangutana Kaniya, “Ginoo, ako ba ang Imong gipasabot ?” Si Jesus mitubag, “Ang nagtuslob sa pan uban Kanako niining panaksan maoy magbudhi Kanako. Ang Anak sa Tawo mamatay sumala sa giingon sa Kasulatan apan alaot siya nga magbudhi sa Anak sa Tawo ! Maayo pa lang untag wala siya matawo !” Si Judas, ang traydor, miingon, “Magtutudlo, ako ba ang Imong gipasabot ?” Si Jesus mitubag, “Gisulti nimo.”

Pamalandong :

MAHUTDAN BA OG GUGMA ANG DIOS KANATO ? 

Kagahapon, ang Ebanghelyo ni San Juan nagsaysay sa pagbudhi ni Hudas ug sa paglimod ni Pedro. Karon, si Mateo nagsugilon usab sa pagbudhi ni Judas. Sa taas nga Pasyon sa Ginoo, gipaklaro ang kahuyang sa mga apostoles. Si Judas nagbaligya kang Jesus, si Pedro nipanghimakak Kaniya, ug ang ubang apostoles nibiya Kaniya. Bisan tulo ka tuig silang nag-uban, walay bisan usa nga nilaban kang Jesus. Gisulat kining kamatuoran dili aron hukman ug kondenahon ang mga apostoles kondili aron ipakita nga ang gugma ni Kristo nagpabilin ug mipatigbabaw luyo sa kahuyang ug kapakyasan sa mga tinun-an. Kini maoy angay'ng magdasig kanatong tanan nga mga masalaypon ug mabudhion sa Dios. Nindot ang caption : “Your sin could be as big as a ship, but God’s mercy is greater than the ocean.”

pohsiBtebAyU