Marcos 16:1-7

 Ang Santos nga Ebanghelyo sumala ni San Marcos 16:1-7 (Sabado Santo / Black Saturday  Mar. 30, 2024 )

Sa paglabay sa Adlaw'ng Igpapahulay, si Maria Magdalena, si Maria nga inahan ni Santiago ug si Salome namalit ug mga pahumot aron idihog sa lawas ni Jesus. Ug sayo kaayo sa Domingo sa buntag, sa misubang na ang adlaw, miadto sila sa lubnganan. Sa ilang pagpanglakaw, nag-ingnanay sila, “Kinsa may atong paligiron sa bato aron pag-abli sa lubnganan ?” (Dako kaayo kining batoha.) Unya sa pagtan-aw nila, ilang nakita nga naligid na ang bato nga gitabon sa lubnganan. Ug sa pagsulod nila sa lubnganan, nakita nila didto ang usa ka batan-ong lalaki. Naglingkod siya sa tuo nga daplin ug nagsul-ob ug puting sapot nga taas. Ug nangalisang sila. Apan miingon siya kanila, “Ayaw kamo kahadlok ! Nangita kamo kang Jesus nga taga-Nazaret, ang gilansang sa krus ? Wala na Siya dinhi. Nabanhaw Siya ! Tan-awa ang ilang gibutangan Kaniya. Lakaw hinuon kamo ug suginli ang Iyang mga tinun-an, lakip si Pedro, nga si Jesus nag-una kaninyo sa Galilea. Didto inyo Siyang makita sumala sa Iyang gisulti kaninyo.” 

Pamalandong :

UNSA MAY ANGAY NATONG BATI-ON NING SABADO SANTO ?

Ang Sabado Santo pagatawgon og “Black Saturday” tungod kay ning adlawa nagsubo kita sa kamatayon ni Kristo. Apan, tawgon usab kini'g “Joyous Saturday” tungod kay gitoohan nga ning adlawa samtang ang lawas ni Kristo nagpahulay sa Hades (lugar sa mga patay), ang Iyang Espiritu nagtrabaho aron sa pagluwas sa mga kalag nga nabilanggo didto. Busa, ning Sabado Santo, managsagol ang gibati sa Simbahan – kaguol ug kahinangop. Karong gabii angay kitang motambong sa Misa sa Bihilya Paskwal tungod kay kini ang pinakadakong Misa sa tibuok tuig. Dinhi makighiusa kita sa Simbahan sa tibuok kalibotan sa pag-atong sa lubnganan ni Kristo ug sa pagpaabot sa Iyang pagkabanhaw. Tinuod ang giingon : “Earth’s saddest day and gladest day were just 3 days apart.”

pohsiBtebAyU