Mateo 2:1-12

 Ang Santos nga Ebanghelyo sumala ni San Mateo 2:1-12 (Sun. Jan. 7, 2024)

Natawo si Jesus sa lungsod sa Betlehem, sa lalawigan sa Judea sa panahon nga naghari si Herodes. Unya may mga tawo nga may kaalam bahin sa mga bituon nga nangabot sa Jerusalem gikan sa sidlakan ug nangutana : “Hain man ang bata nga natawo nga maoy mahimong hari sa mga Judio ? Nakita namo ang bituon nga nagpahibalo sa Iyang pagkatawo sa pagsubang niini didto sa sidlakan ug mianhi kami aron pagsimba Kaniya.” Sa pagkahibalo ni Hari Herodes niini, wala siya mahimutang ingon man ang tibuok Jerusalem. Gitigom niya ang kadagkoan sa mga pari ug ang mga magtutudlo sa Balaod ug gipangutana niya sila, “Asa man matawo ang Mesiyas ?” Sila mitubag, “Sa lungsod sa Betlehem, sa Judea. Mao kini ang giingon sa Dios nga gisulat sa propeta : ‘Ikaw, Betlehem, sa yuta sa Juda, dili ka labing ubos sa mga dagkong lungsod sa Juda ; kay maggikan kanimo ang usa ka pangulo nga maoy magmando sa Akong katawhan, ang Israel.’ ”Busa gipatawag ni Herodes sa hilom ang mga maalamong bisita nga gikan sa sidlakan. Iyang nasayran gikan kanila ang untop nga takna sa pagsubang sa bituon. Unya gipaadto niya sila sa Betlehem nga nag-ingon, “Lakaw kamo ug pangitaa pag-ayo ang bata ug kon makaplagan na ninyo siya, pahibaloa ako aron moadto ug mosimba usab Kaniya.” Human nila paminawa ang hari, nanglakaw sila. Sa didto na sila sa dalan, nakita nila pag-usab ang bituon nga nakit-an nila sa sidlakan. Dako kaayo ang ilang kalipay sa pagkakita nila sa bituon ! Ug nag-una kini kanila hangtod nga miabot kini ug mihunong sa tungod gayod sa nahimutangan sa bata. Unya misulod sila sa balay ug nakita nila ang bata uban sa Iyang inahan nga si Maria. Nangluhod sila ug misimba sa bata. Unya giablihan nila ang ilang mga gasa ug mihalad sila Kaniyag bulawan, insenso ug mira. Pinaagi sa damgo gipahimatngonan sila sa Dios sa dili pagbalik ngadto kang Herodes busa namauli sila agi sa laing dalan.

Pamalandong :

" HINAUT UNTA NGA MAHISAMA KITA SA TULO KA TAWONG MAALAMON "

Naandan na nato nga tawgon kining adlawa nga Piyesta sa “Tulo ka mga Hari” – Melchor, Gaspar ug Baltazar. Diha sa Ebanghelyo, atong nasayran nga kining gitawag nato nga mga “hari” mga tawo diay nga makinaadmanon o Wise Men nga nagtuon sa kabitoonan aron sa pagpangita'g mga timailhan sa kalangitan. Usa ka adlaw niana, ang mga Wise Men nakakita sa talagsaong bitoon nga ilang gitoohan nga magdala kanila ngadto sa Hari sa kalibutan. Busa nibiya sila sa ilang tagsa-tagsa ka mga lugar ug panimalay aron pagsunod sa bitoon. Kining maong bitoon maoy nagtultol kanila sa usa ka lugar diin ilang nakaplagan ang usa ka inahan ug usa ka bata nga bag-ong gipanganak. Didto ilang giyukboan ang bata ug ilang gihatagan sa ilang mga gasa nga bulawan, insenso ug mira. Tungod sa ilang pagpasidungog sa bata nga Dios, ang tulo ka makinaadmanong tawo nakadawat usab sa pagpasidungog sa tibuok Kristohanong katilingban.

Atong  pamalandongan ug maayo kun unsa gayod ang kahulogan sa pulong nga “Wise.” Kanus-a man ang usa ka tawo mahimong makinaadmanon ? Unsa man ang atong gipasabot kon moingon kita nga “Wise” ang usa ka tawo ? Para sa mga kalibotanon, ang “Wise” nga tawo mao siya nga makamaong mag-inantigo o makamaong mopalusot. Sa pagkatinuod, ang mga tawo nga ingon ani og batasan angay’ng tawgon nga Wa-is, dili Wise. Ang usa ka “Wa-is nga politiko” mao kadtong makamaong mangawkaw sa kwarta sa gobyerno nga dili mahibaloan. Ang “Wa-is nga bana” mao kadtong makamaong mang-tsiks apan dili masakpan sa asawa. Ang usa ka “Wa-is nga driver” mao kadtong makamaong molusot sa mga traffic lights ug mga traffic officers. Ang “Wa-is nga estudyante” mao kadtong dili seryoso nga magtoon apan makapasar pinaagi sa pagkodego o pagpangopya. Ug ang usa ka “Wa-is nga empleyado” mao kadtong makamaong maglikay sa trabaho apan makadawat gihapon sa saktong sweldo.

Sa Ebanghelyo karon, atong masabtan nga si Herodes lahi og kinaiya sa sa tulo ka Wise Men. Si Herodes maoy modelo sa mga “Wa-is” nga mga tawo, mahugaw ang iyang mga pamaagi. Gitugon ni Herodes ang tulo ka makinaadmanon nga pahibaloon siya kon makit-an na nila ang bata kay aron siya usab kuno makahatag og pagyukbo sa batang hari. Apan sulod sa iyang kasingkasing aduna na siyay plano sa pagpatay sa bata. Lahi ang kahibalo ug pamaagi sa tulo ka Wise Men tungod kay kini pinasubay man sa kamatuoran ug katarong. Una, ang mga Wise Men nangita sa tinuod nga Ginoo. Ang tawo nga tinuod nga wise makahibalo nga adunay labaw nga makagagahom nga maoy tinubdan sa tanang mga butang. Dili mahitabo nga ang tawo maoy maghari kay ang tawo lumalabay lamang ug walay igong katakos nga makahimo sa kalibutan. Ang tawo nga wise nasayod nga kinahanglan siyang moyukbo sa Dios tungod kay Siya ang tag-iya sa tanang kinabuhi ug butang ning kalibutan. Ikaduha, ang mga Wise Men nasayod nga ang tinuod nga kalipay makab-ot diha sa pagsunod sa giya sa kahitas-an. Si Herodes wala gayod makahinong sa hayag nga bitoon kay wala man siyay panahon nga mohangad. Gusto man lang siya nga maoy hangdon sa mga tawo. Ang tinuod nga wise masayod nga pinaagi sa paghangad sa kahitas-an, ang tawo makakita sa saktong dalan ug sa kamatuoran. Sa katapusan, ang mga Wise Men nagdala sa ilang mga gasa ngadto sa Batang Manunubos. Nasayod man sila nga adunay kalipay nga ilang makab-ot pinaagi sa paghalad o pagpaambit sa ilang abot ngadto sa Dios ug sa ilang isigkatawo. Si Herodes kanunay nga gahunahuna sa iyang kaugalingong kaayohan lamang ug tungod niini siya wala gayod magmalipayon. Siya nagpabiling nga nag-inusara ug nagmahadlokon. Ang tinuod nga wise makahibalo nga adunay kalipay sa pagpakigdait ug pagtinabangay.

pohsiBtebAyU