Marcos 3:31-35

 Ang Santos nga Ebanghelyo sumala ni San Marcos 3:31-35 (Tue. Jan. 23, 2024)

Unya miabot ang inahan ug ang mga igsoong lalaki ni Jesus. Didto sila sa gawas sa balay ug nagpasugo nga buot sila makigkita Kaniya. Naglingkod libot kang Jesus ang pundok sa mga tawo ug miingon sila Kaniya, “Ang Imong inahan ug mga igsoon atua sa gawas ug buot sila makigkita Kanimo.” Si Jesus mitubag, “Kinsa ba ang Akong inahan ug mga igsoon ?” Unya mitan-aw si Jesus sa mga tawo nga nag-alirong Kaniya ug miingon, Ania ang Akong inahan ug mga igsoon. Kay kinsa kadtong nagtuman sa gisugo sa Dios mao ang Akong mga igsoon ug Akong inahan.”

Pamalandong :

KINSA MAN ANG MGA SAKOP SA PAMILYA SA DIOS ? 

Sa ordinaryong pagsabot, isipon nato nga kapamilya ang mga tawo nga atong kadugo. Apan, ang Kristohanong pagsabot sa pamilya mas labaw pa kaayo niini. Sa iyang sulat ngadto sa taga-Galacia, si San Pablo nagtudlo nga tungod sa pagtoo ug sa bunyag diha ni Kristo, nahimo kitang mga anak sa Dios (3:26). Ang atong pagkamanagsoon dili tungod sa dugo nga naglatay sa atong kaugatan kondili sa Espiritu sa Dios nga naghiusa kanato. Diha sa Ebanghelyo, si Kristo nagpatin-aw niini : “Si bisan kinsa nga mobuhat sa kabubut-on sa Dios ilhon nga Akong mga igsoon ug inahan.” Nga sa ato pa, ang binunyagan mahimong tinuod nga kapamilya ni Jesus kon kini magpuyo subay sa Iyang mga lakang ug kasugoan. Matod pa ni F. F. Bruce, "God bestows His blessings without discrimination. The followers of Jesus are children of God, and they should manifest the family likeness by doing good to all, even to those who deserve the opposite."

pohsiBtebAyU