Marcos 3:1-6

 Ang Santos nga Ebanghelyo sumala ni San Marcos 3:1-6 (Wed. Jan. 17, 2024)

Unya miadto na usab si Jesus sa sinagoga ug didtoy tawo nga kimay ang kamot. May mga tawo usab didto nga naniid pag-ayo kon ayohon ba ni Jesus ang maong tawo sa Adlawng Igpapahulay aron aduna silay ikasumbong batok Kaniya. Si Jesus miingon sa tawo nga kimay, “Dali ngari !” Unya Iyang gipangutana ang mga tawo, “Unsa bay gitugot sa atong Balaod nga angay buhaton sa Adlawng Igpapahulay ? Ang pagtabang ba o ang pagdaot ? Ang pagluwas ba sa kinabuhi sa tawo o ang pagpatay ?” Apan wala sila motubag. Gitan-aw sila ni Jesus uban ang kalagot ug kasubo tungod sa ilang pagkagahig ulo. Unya Iyang giingnan ang tawo, “Ituy-od ang imong kamot.” Ug gituy-od sa tawo ang iyang kamot ug naayo kini. Busa namiya sa sinagoga ang mga Pariseo ug nakigkita dayon sa mga sakop sa pundok ni Herodes ug naglaraw sila sa pagpatay kang Jesus.

Pamalandong :

DAOTAN BA ANG PAGBATI'G KASUKO SA ATONG ISIGKATAWO ? 

Ang Ebanghelyo naghisgot sa pipila ka higayon nga si Jesus nasuko : una, sa dihang Iyang gipangbugaw ang mga namaligya didto sa templo ; ikaduha, sa dihang gipugngan sa mga tinun-an ang mga bata nga buot moduol Kaniya ; ug ikatulo, diha sa Ebanghelyo karon, diin naglagot Siya sa kagahi’g ulo sa mga Pariseo nga naghunahuna og ngil-ad sa Iyang pagbuhat og kaayohan panahon sa Adlaw’ng Igpapahulay. Atong makita nga ang kasuko ni Jesus dili para sa Iyang kaugalingon kondili para sa kaayohan sa uban – sa mga kabos, mga bata, ug mga masakiton. Si Benjamin Franklin nag-ingon : “Anger is never without a reason, but seldom with a good one.” Sa sunod higayon nga kita masuko, hinaot unta nga sama kang Kristo aduna kitay sakto ug maayong hinungdan.

pohsiBtebAyU