Marcos 2:13-17

 Ang Santos nga Ebanghelyo sumala ni San Marcos 2:13-17 (Sat. Jan. 13, 2024)

Mibalik na usab si Jesus sa daplin sa Lanaw sa Galilea. May panon sa katawhan nga midugok Kaniya ug gitudloan Niya sila. Unya samtang naglakaw Siya, nakita Niya ang usa ka kobrador sa buhis nga si Levi, anak ni Alfeo. Naglingkod siya didto sa iyang opisina. Miingon si Jesus kaniya, “Sunod Kanako.” Mitindog si Levi ug misunod Kaniya. Daghan ang nanunod kang Jesus. Unya samtang nagkaon Siya didto sa balay Niya dihay mga maniningil sa buhis ug mga makasasala nga nakigsalo Kaniya ug sa Iyang mga tinun-an. Sa maong dapit may mga magtutudlo sa Balaod nga mga Pariseo ug nakita nila si Jesus nga nakigsalo niining mga maniningil sa buhis ug sa mga makasasala. Busa nangutana sila sa mga tinun-an ni Jesus, “Nganong nakigsalo man Siya sa mga maniningil sa buhis ug sa mga makasasala ?” Nakadungog si Jesus kanila ug mitubag, “Wala magkinahanglan ug mananambal ang mga tawo nga maayog lawas kondili ang mga masakiton lamang. Wala Ako moanhi sa pagdapit sa mga matarong kondili sa mga makasasala.”

Pamalandong :

UNSA MAY GIPASABOT SA GIINGON NI JESUS, "WALA AKO MOANHI ALANG SA MGA MATARONG KONDILI ALANG SA MGA MAKASASALA"? 

Wala kini magpasabot nga ang mga matarong dili pinangga sa Ginoo. Sa pagkatinood, ang gisulti ni Jesus usa ka Maayong Balita para kanatong tanan tungod kay kitang tanan makasasala man. Bisan ang mga matarong aduna may kahuyang ug makasala usab. Ang problema sa mga Pariseo ug Saduseo mao kini : Ilang nakita ang mga sala sa uban, apan buta sila sa ilang kasaypanan. Hinaot unta nga dili kita mahisama kanila. Angkonon nato ang atong pagkamasalaypon, apan sama ni Levi, atong biyaan ang makasasalang kahimtang ug mosunod kang Kristo. Ang Panultihon nag-ingon, “Though a righteous man falls seven times, he will get up, but the wicked will stumble into ruin.” 

pohsiBtebAyU