Marcos 1:29-39

 Ang Santos nga Ebanghelyo sumala ni San Marcos 1:29-39 (Wed. Jan. 10, 2024)

Gikan sa sinagoga miadto dayon si Jesus sa balay ni Simon ug ni Andres. Kauban Niya si Santiago, si Juan ug ang ubang tinun-an. Niining higayona, ang ugangang babaye ni Simon gihilantan ug naghigda. Sa pag-abot gayod ni Jesus didto, gisuginlan dayon Siya mahitungod sa masakiton. Giduol siya ni Jesus, gikuptan ang iyang kamot ug gipabangon. Dihadiha gihuwasan sa hilanat ang masakiton ug unya misilbi siya kanila. Sa pagsalop na sa adlaw, gidala sa mga tawo ngadto kang Jesus ang tanang masakiton ug ang mga giyawaan. Ang tanang tawo sa lungsod nagpundok didto sa atubangan sa balay. Unya giayo ni Jesus ang daghang mga tawo nga nag-antos sa nagkalainlaing mga sakit. Gipagula usab Niya ang daghang mga yawa gikan sa mga giyawaan. Wala Niya tugoti ang mga yawa sa pagsulti kay nakaila man sila Kaniya. Kaadlawon pa gani, mibangon na si Jesus ug migawas sa balay. Miadto Siya sa usa ka dapit nga mingaw ug nag-ampo didto. Apan si Simon ug ang mga kauban nangita Kaniya. Nakit-an nila Siya ug giingnan, “Ang tanan nangita Kanimo.” Apan mitubag si Jesus, “Mangadto kita sa silingang mga lungsod. Kinahanglan sangyawan Ko usab sila. Mianhi Ako alang niining maong katuyoan.” Busa  gilibot ni Jesus ang tibuok Galilea. Nagwali Siya sulod sa mga sinagoga ug gipagula Niya ang mga yawa gikan sa mga giyawaan.

Pamalandong :

UNSA MAY ANGAY’NG MAGTUKLOD KANATO SA PAGDUOL SA DIOS ? 

Daghang mga masakiton ug giyawaan ang gipang-ayo ni Jesus. Tungod niini nahimo Siyang inila ug pinangita sa mga tawo. Gusto nila Siyang hawiran sa ilang lugar. Apan gipadayag ni Jesus kanila nga kinahanglan Niyang moadto sa laing dapit aron magsangyaw. Atong masabtan sa Ebanghelyo nga si Jesus walay gusto sa panatikong paagi sa pagsunod Kaniya. Nasayod Siya nga daghan ang moduol Kaniya aron lamang mangayo ug aron matuman ang ilang kagustohan. Dili kini mao ang angay’ng mahitabo sa mga sumusunod. Moduol kita kang Jesus dili aron magsigi’g pangayo kondili aron makasabot sa kabubut-on sa Dios ug makasunod sa Iyang panig-ingnan. Kini ang katuyoan nga angay’ng magdasig kanato sa pagsunod kang Jesus. Matod pa ni Elder Dallin H. Oaks,  "Following Christ is not a casual or occasional practice but a continuous commitment and way of life."

pohsiBtebAyU