Juan 1:35-42

 Ang Santos nga Ebanghelyo sumala ni San Juan 1:35-42 (Thu. Jan. 4, 2024)

Sa pagkasunod adlaw didto na usab si Juan uban sa duha niya ka tinun-an. Ug sa pagkakita niya kang Jesus nga milabay, miingon siya, “Anaa ang nating Karnero sa Dios !” Ang duha ka tinun-an nakadungog sa pagsulti niya niini ug misunod sila kang Jesus. Milingi si Jesus ug sa pagkakita Niya nga nagsunod sila Kaniya, gipangutana Niya sila, “Unsa may inyong gipangita ?” Sila mitubag, “Rabi, (nga sa ato pa, ‘Magtutudlo’) hain ka man magpuyo ?“ Dali kamo ug tan-awa ninyo,” mitubag Siya. (Mga alas kuwatro kadto sa hapon.) Busa mikuyog sila Kaniya ug nakita nila ang Iyang gipuy-an ug nagpabilin sila uban Kaniya niadtong adlawa. Usa niadtong duha nga nakadungog kang Juan ug mikuyog kang Jesus mao si Andres nga igsoon ni Simon Pedro. Gipangita dayon ni Andres ang iyang igsoon nga si Simon ug giingnan, “Nakita namo ang Mesiyas” (nga sa ato pa, “Cristo”). Unya gidala niya si Simon ngadto kang Jesus. Mitutok si Jesus kaniya ug miingon, “Ikaw si Simon nga anak ni Juan. Apan sukad karon nganlan ka nag Cefas” ( nga sa ato pa, Pedro).

Pamalandong :

UNSA MAY INYONG GIPANGITA ? 

Sa atong pagsugod og bag-ong tuig, angay usab natong pamalandongan kining pangutana ni Jesus ngadto sa duha ka tinun-an. Sa atong kabahin, unsa man pud ang gusto natong makaplagan ? Unsa may atong gustong mahuptan ning tuiga, kon dili man gani ning kinabuhia ? Sa katilingban nga kalibotanon, daghang tawo ang mangandoy og kwarta, materyal nga butang, kaanyag, gahom ug dungog. Kini ang ilang gitoohan nga maghatag og kalipay ug katagbawan. Apan sa pagkatinood, kining mga butanga lumalabay lamang ug mawala ra sa pagdagan sa panahon. Mas maayo pa nga mangandoy kita sa mga butang nga molungtad sama sa gugma, panagdait ug kalinaw nga makaplagan lamang diha sa atong pagpakig-uban kang Cristo. Matod pa ni Margaret Lawrence, " It's not what we have in life but who we have in our life that matters."

pohsiBtebAyU