Marcos 1:1-8

 Ang Santos nga Ebanghelyo sumala ni San Marcos 1:1-8 (Sun. Dec. 10, 2023 Ikaduhang Domingo Sa Adbiyento)

Mao kini ang Maayong Balita mahitungod kang Jesu-Cristo, ang Anak sa Dios. Nagsugod  kini sumala sa gisulat ni propeta Isaias : “Ania ang Akong sinugo nga ipadala Ko una kanimo aron andamon niya ang imong agian. May  nagsinggit didto sa kamingawan, ‘Andama ninyo ang dalan alang sa Ginoo ; himoa ninyong tul-id ang iyang agian !’ Busa namunyag si Juan sa mga tawo didto sa kamingawan ug nagwali,“Hinulsoli ug biyai ang inyong mga sala ug pagpabunyag kamo ug pasayloon kamo sa Dios.” Ang tibuok lalawigan sa Judea ug sa siyudad sa Jerusalem nangadto kang Juan aron sa pagpamati kaniya. Gisugid nila ang ilang mga sala ug gibunyagan sila ni Juan didto sa Suba sa Jordan. Ang  bisti ni Juan hinimo gikan sa balhibo sa kamelyo, panit ang iyang bakos ug ang iyang pagkaon dulon ug dugos. Miingon siya sa katawhan, “Ang Tawo nga moanhi sunod kanako mas gamhanan kay kanako. Dili ako takos bisan sa paghubad sa higot sa Iyang sandalyas. Namunyag ako kaninyo sa tubig apan Siya magbunyag kaninyo sa Espiritu Santo.”

Pamalandong :

UNSA MAY ATONG ANDAMON ALANG SA PAG-ABOT SA GINOO ? 

Si San Juan mao ang tingog nga nagsinggit : “Andama ninyo ang dalan alang sa Ginoo, hawani ninyo ang Iyang agianan !” “Hinulsoli ug biyai ninyo ang inyong mga sala ug pabunyag kamo aron pasayloon kamo sa Dios !” Ang pagpangandam nga gipanawagan ni San Juan dili materyal kondili espiritwal. Ang dalan nga agi-an sa Ginoo mao ang dalan padulong sa atong kasingkasing nga maoy sentro sa atong kinabuhi. Sa atong pagpaabot sa Mesiyas, kinahanglan nga atong  basolan ang atong mga sala, hunongon ang kalaog, ug wagtangon ang mga kasuko ug pagdumot. Niining higayona, daghan kanato nagpahiluna na sa mga dayandayan para sa kapaskohan. Hinaot unta nga dili kita mahikalimot sa labing mahinungdanong pagpangandam nga mao ang atong pagpakighiuli sa Ginoo ug sa atong isigkatawo. Sakto kaayo ang gina-ingon," May I never neither turn left nor turn right in my journey of life, but may I go straight to Christ that I may do what is right, and I may be bright and right in His sight.

pohsiBtebAyU