Lukas 2:16-21

 Ang Santos nga Ebanghelyo sumala ni San Lukas 2:16-21 (Mon. Jan. 1, 2024 Pangilin Ni Santa Maria Nga Inahan Sa Dios)

Busa midali sila pag-adto ug nakit-an nila si Maria ug si Jose ug ang bata nga naghigda sa pasungan. Sa diha nga ang mga magbalantay nakakita sa bata, gisugilon nila ang gisulti sa anghel mahitungod Kaniya. Ug ang tanang nakadungog niini nahibulong sa gibalita kanila sa mga magbalantay sa karnero. Gitipigan ni Maria kining tanan sa iyang kasingkasing ug namalandong siya pag-ayo mahitungod niining mga butanga. Unya namauli ang mga magbalantay nga nag-awit ug mga pagdayeg sa Dios tungod sa tanan nga ilang nadungog ug nakita sumala gayod sa gisugilon kanila sa anghel. Sa walo na ka adlaw ang bata, gihimo ang seremonyas sa pagtuli Kaniya. Ginganlan Siyag Jesus, ang ngalan nga gisulti sa anghel kang Maria sa wala pa ipanamkon ang bata.

Pamalandong :

Sa pinakaunang adlaw sa tuig atong gisaulog ang pangilin sa Inahan sa Dios, ang Mahal nga Birhen Maria. Pinaagi niini, gitudloan kita sa Simbahan nga aduna kitay Inahang Langitnon nga mopangga, mo-amoma ug mobantay kanato. Sa kalipay ug kasakit, si Maria anaa uban kanato. Kon kita maluya, masubo ug mahadlok, sangpiton nato ang Mahal nga Birhen kay Siya man ang gitahasan sa Dios nga mahimo natong inahan ug manlalaban. 

Sa pagsaulog ning solemnidad, gitudloan usab kita sa paghimo kang Maria nga modelo sa atong kinabuhi matag adlaw sa tibuok nga tuig. Gitawag kita nga mahisama kang Maria sa iyang pagkamasinugtanon sa Dios, pagkamaampoon, pagkamapaubsanon, pagkasimple, pagkamahigugmaon ug pagkamaalagaron. Ning modernong panahon, kanus-a ang mga tawo gidani sa kalibotanong panghunahuna, kagustohan, ug mga butang, si Maria maoy nindot nga pahimangno nga ang tinuod nga kalipay makaplagan dili sa kalibotanong kahilayan kondili diha sa pagtuman sa kabubut-on sa Dios. Ang bag-ong tuig maghatag kanato'g kahigayonan sa paghimo og bag-ong sinugdanan. Kini ang magdasig sa mga tawo sa paghimo og mga panaad (New Year’s Resolutions) aron maghimo’g kabag-ohan sa kinabuhi. Ug hinaot unta nga ato kining tumanon aron kita mausab ngadto sa kaayo, kabuotan ug katarong.

Si Pope Francis adunay listahan sa mga New Year’s Resolution nga angay natong sundon ug buhaton. Kini ang mosunod :

1.     Ayaw panglibak.

2.     Ayaw usiki ang pagkaon.

3.     Hatagi og panahon ug pagtagad ang uban.

4.     Pili-a ang simple nga palaliton.

5.     Duola, ubani ug tabangi ang mga kabos.

6.     Hunonga ang paghukom sa isigkaingon.

7.     Higalaa ug respetoha ang mga tawo nga adunay lahi nga hunahuna ug pagbati.

8.     Paghimo og pagtahan sa kinabuhi, sama sa kaminyoon.

9.     Himoong batasan ang pag-ampo ug pagpangayo og tabang ngadto sa Dios.

10.    Pagmalipayon subay sa kalipay sa Ebanghelyo.

Ang pag-usab sa kaugalingon dili sayon nga buhaton. Adunay panultihon, “Bad habits die hard.” Apan, bisan malisod, dili kini imposible tungod kay aduna may Dios nga motabang kanato sa pagbuntog sa atong mga kahuyang. Sa iyang sulat sa taga Galacia, si San Pablo nagpahinumdum : “Gipadala sa Dios ang Espiritu sa iyang Anak nganhi sa atong kasingkasing . . . Busa dili na kamo ulipon kondili mga anak na.” Pinaagi sa mga sakramento, madawat nato gikan kang Kristo ang grasya nga makapausab ug makasantos sa atong kinabuhi. Sa pagsugod ning bag-ong tuig, atong bati-on ang panalangin gikan sa basahon sa Numeros : “Panalanginan ug bantayan unta kamo sa Ginoo ! Magmaluluy-on ug magmahinatagon unta Siya kaninyo ! Kahimut-an unta kamo sa Ginoo ug hatagan kamog kalinaw !” Amen

pohsiBtebAyU