Mateo 4:18-22

 Ang Santos nga Ebanghelyo sumala ni San Mateo 4:18-22 (Thu. Nov. 30, 2023 Kapistahan Ni San Andres, Apostol)

Samtang naglakaw si Jesus daplin sa Lanaw sa Galilea, nakita Niya ang duha ka magsoong mananagat nga namukot : si Simon nga ginganla'g Pedro ug si Andres. Si Jesus miingon kanila, “Kuyog kamo Kanako ug tudloan Ko kamo sa pagpanagat ug mga tawo.” Dihadiha gibiyaan nila ang ilang mga pukot ug mikuyog Kaniya. Mipadayon Siya paglakaw ug nakita Niya ang laing duha ka magsoon, si Santiago ug si Juan nga mga anak ni Sebedeo. Didto sila sa ilang sakayan uban sa ilang amahan, nag-ayo sa ilang mga pukot. Gitawag sila ni Jesus ug dihadiha gibiyaan nila ang ilang sakayan ug ang ilang amahan ug mikuyog sila Kaniya.

Pamalandong :

UNSA MAN ANG PAGTULON-AN NGA ATONG MAKAT-ONAN SA KAPISTAHAN NI SAN ANDRES, USA SA PINAKAUNANG SUMUSUNOD NI KRISTO ? 

Diha sa Ebanghelyo, nailhan nato si San Andres nga tigdala og mga tawo ngadto sa Dios. Pananglitan, siya ang nagdala sa iyang igsoon nga si Pedro ngadto kang Jesus ; siya ang nagpaila-ila sa usa ka pundok sa mga pagano ngadto kang Kristo ; siya usab ang nagdala sa usa ka bata nga may 5 ka pan ug 2 ka isda ngadto kang Jesus. Sumala sa atong kasinatian, dili sayon ang pagdala'g tawo ngadto sa Dios. Nanginahanglan kini'g dakong gugma ug pasensya. Adunay nag-ingon, “Your greatest contribution to the Kingdom of God may not be something you do but someone you raise.” Dinasig ni San Andres, molihok unta kita sa pagkabig og mga tawo, kapamilya ug kahigalaan, ngadto sa Ginoo.

pohsiBtebAyU