Lukas 20:27-40

 Ang Santos nga Ebanghelyo sumala ni San Lukas 20:27-40 (Sat. Nov. 25, 2023)

May mga Saduseo nga miduol kang Jesus. (Mao kini sila ang nag-ingon nga ang mga patay dili mabanhaw.) Nangutana sila Kaniya, “Magtutudlo, nagsulat si Moises niining balaod alang kanato : ‘Kon ang usa ka tawo mamatay ug may asawa nga nahibilin apan walay anak, ang igsoon niadtong tawhana kinahanglan mangasawa sa biyuda aron manganak sila alang sa namatay.’ May pito ka magsoong lalaki. Ang kamagulangan naminyo ug namatay nga walay anak. Unya ang ikaduhang igsoon nangasawa sa biyuda ingon man ang ikatulo hangtod nga ang pito ka magsoon nakapangasawa sa babaye ug nangamatay silang tanan nga walay anak. Sa kataposan ang babaye namatay. Unya, sa adlaw nga banhawon na ang mga patay, kang kinsa man siyang asawa nga silang tanan nakapangasawa man kaniya?” Si Jesus mitubag kanila, “Magminyoay ang mga lalaki ug babaye niining panahona apan ang mga lalaki ug babaye nga angay banhawon ug magkinabuhi sa umaabot nga panahon dili na magminyoay. Mahisama na sila sa mga anghel ug dili na mamatay. Mga anak sila sa Dios kay gibanhaw man sila. Ug klaro nga gipamatud-an ni Moises nga banhawon ang mga patay. Diha sa bahin nga nagsaysay mahitungod sa sampinit nga nagdilaab, naghisgot siya mahitungod sa Ginoo nga mao ‘ang Dios ni Abraham, Dios ni Isaac ug Dios ni Jacob.’ Nagpasabot kini nga siya mao ang Dios sa mga buhi ug dili sa mga patay kay alang kaniya ang tanan buhi.” Pipila sa mga magtutudlo sa Balaod miingon, “Maayong pagkatubag, Magtutudlo !” Ug wala na sila mangahas pagpangutana kang Jesus.

Pamalandong :

ADUNA BAY PAGKABANHAW HUMAN SA KAMATAYON ? 

Ang mga Saduseo nangutana kang Jesus og kang kinsang asawa ang usa ka babaye nga naminyo sulod sa pito ka higayon inig abot sa panahon sa pagkabanhaw. Gituboy nila kining pangutana dili tungod kay gusto silang mahibalo sa kamatuoran kondili tungod kay gusto nilang kataw-an ang pagtoo nga adunay kinabuhi human sa kamatayon. Imbis masuko, gigamit ni Kristo kini nga kahigayonan sa pagsangyaw sa pagkabanhaw nga nagpaabot sa mga matoohon. Ang Ginoo dili Dios sa mga patay, kondili sa mga buhi. Ang tanan nga makig-uban Kaniya magpabiling buhi. Kining Ebanghelyo karon magdasig kanato sa pagsunod sa mga lakang ni Kristo nga mao “ang dalan, ang kinabuhi ug ang kamatuoran” aron human sa kamatayon atong madawat ang kinabuhing dayon. 

pohsiBtebAyU