Lukas 18:35-43

 Ang Santos nga Ebanghelyo sumala ni San Lukas 18:35-43 (Mon. Nov. 20, 2023)

Sa nagkaduol si Jesus sa Jerico, may usa ka buta nga naglingkod ug nagpakilimos diha sa daplin sa dalan. Sa pagkadungog niya sa paglabay sa panon sa mga tawo, nangutana siya, “Unsa man karon ?” “Si Jesus nga taga-Nazaret molabay dinhi,” miingon sila kaniya. Unya misinggit siya, “Jesus ! Anak ni David ! Kaluy-i intawon ako !” Tungod niini gikasab-an siya sa mga tawo nga nag-una ug gipahilom siya. Apan mikusog hinuon siya pagsinggit, “Anak ni David ! Kaluy-i intawon ako !” Busa mihunong si Jesus ug misugo nga ang buta dad-on ngadto Kaniya. Sa nahiduol na siya, nangutana si Jesus kaniya, “Unsa may buot mong buhaton Ko alang kanimo ?” Mitubag siya, “Sir, gusto unta ako nga makakita pag-usab.” Ug giingnan siya ni Jesus, “Makakita ka ! Ang imong pagtuo maoy nakaayo kanimo.” Ug dihadiha nakakita siya ug misunod kang Jesus ug nagpasalamat sa Dios. Sa pagkakita niini sa mga tawo, gidayeg nilang tanan ang Dios.

Pamalandong :

UNSA MAN NGA MATANG ANG ATONG PAGKABUTA ? 

Ang makililimos sa Ebanghelyo usa ka buta, apan aduna siyay espirituhanong panan-aw –- nakita niya ang Dios diha kang Jesus. Ang mga tawo makakita, pero buta sila sa espirituhanong kamatuoran – wala nila nakita ang dakong panginahanglan ug Dios sa usa ka tawo. Matag usa kanato adunay lain-laing klase sa pagkabuta. Ang mga sikolohista nagtudlo nga matag tawo adunay “blindspots.” Adunay dili makakita sa iyang mga sayop ; adunay buta sa gugma ; ug naa puy buta sa mga lihok sa Dios. Si Antoine de Saint-Exuspery nag-ingon : “It is only with the heart that one can see rightly. What is essential is invisible to the eye.” Atong hangyoon si Jesus nga ayohon unta Niya ang atong kasingkasing aron makakita kita sa mga butang nga bililhon sa kinabuhi.

pohsiBtebAyU