Lukas 17:1-6

 Ang Santos nga Ebanghelyo sumala ni San Lukas 17:1-6 (Mon. Nov. 13, 2023)

Unya giingnan ni Jesus ang Iyang mga tinun-an, “Ang mga butang nga makaangin sa mga tawo sa pagpakasala mahitabo gayod apan alaot ang tawo nga tungod kaniya mahitabo kining mga butanga. Maayo pa kaniya nga hiktan ang iyang liog sa usa ka dako nga galingang bato ug itambog siya ngadto sa dagat kay sa makaangin sa usa niining gagmayng mga bata sa pagpakasala. Busa pagmatngon kamo ! Kon ang imong isigkatawo makasala, badlonga siya ug kon maghinulsol, pasayloa. Kon makasala siya kanimo sa makapito sulod sa usa ka adlaw ug sa matag higayon moanha siya kanimo ug moingon, ‘Naghinulsol ako,’ kinahanglan imo siyang pasayloon.” Ang mga apostoles miingon sa Ginoo, “Dugangi ang among pagtuo.” Ug ang Ginoo mitubag, “Kon duna kamoy pagtuo nga sama sa gidak-on sa liso sa mustasa, makasugo kamo sa kahoy nga sikomoro, ‘Maibot ug mabalhin ka ngadto sa dagat !’ ug kini motuman kaninyo.

Pamalandong :

UNSA MAY KAPAINGNAN SA DAOTANG PANIG-INGNAN ? 

Gipahimangnoan ni Jesus ang mga tinun-an sa dili paghatag og daotang ehemplo sa uban. Ang magbuhat sa ingon angay nga “hiktan ang liog sa usa ka dakong galingang bato ug itambog ngadto sa dagat.” Kining panultihon nagpasabot lamang sa kadako sa sala sa tawo nga maghatag og dili maayong panig-ingnan sa katilingban. Kon magdasig kita sa usa ka tawo sa pagpakasala pinaagi sa pulong ug sa binuhatan, siya magtudlo usab sa laing mga tawo sa pagpakasala, ug kini sila mao na pud ang makaingon sa daghan pang uban nga makabuhat og daotan. Busa, dili daotang ehemplo kondili saktong panig-ingnan ang atong ipakita sa uban, ilabi na sa atong mga kabataan. Adunay nag-ingon, “Live so that when your children think of fairness, caring and integrity, they think of you.”

pohsiBtebAyU