Mateo 22:34-40

 Ang Santos nga Ebanghelyo sumala ni San Mateo 22:34-40 (Sun. Oct. 29, 2023)

Sa pagkadungog sa mga Pariseo nga ang mga Saduseo gilupig ni Jesus sa katarongan, nagpanon sila sa pagduol Kaniya. Unya usa kanila nga magtutudlo sa Balaod misulay pagbitik Kaniya pinaagi sa pagpangutana, “Magtutudlo, unsa man ang labing dakong sugo sa Balaod ?” Si Jesus mitubag, “ ‘Higugmaa ang Ginoo nga imong Dios sa tibuok mong kasingkasing, sa tibuok mong kalag ug sa tibuok mong hunahuna.’ Kini ang labing dako ug labing importanteng sugo. Ang ikaduha nga labing importanteng sugo sama sa una : ‘Higugmaa ang imong isigkatawo sama sa imong kaugalingon.’ Nagsukad niining duha ka sugo ang tibuok nga Balaod ni Moises ug ang mga pagtulon-an sa mga propeta.”

Pamalandong :

UNSA MAY GIPASABOT SA SUGO, “HIGUGMAA ANG DIOS SA TIBUOK MONG KALAG, KASINGKASING, UG HUNAHUNA ? 

Ang atong paghigugma sa Dios kinahanglan tininuod ug todo-todo, dili medya-medya. Dili maayo nga higugmaon nato Siya sa pulong lamang ug dili sa buhat. Ngil-ad kaayong buhaton nga higugmaon nato Siya sa sulod sa simbahan lamang, dili na sa gawas. Ug dili usab angayan nga higugmaon lamang nato Siya sa adlaw’ng Domingo, dili sa Lunes kutob Sabado. Kon gihigugma nato ang Dios sa tinuoray, ato usab nga higugmaon ang tanan nga Iyang gibuhat sama sa kinaiyahan, mga moral nga balaod, ug labaw sa tanan, mga tawo nga gihimo Niya sa Iyang hulagway ug kasamahan. Adunay nindot nga pahinumdum nga nagkanayon : “Jesus didn’t save us halfway. We shouldn’t serve him halfway.”

pohsiBtebAyU