Lukas 13:10-17

 Ang Santos nga Ebanghelyo sumala ni San Lukas 13:10-17 (Mon. Oct. 30, 2023)

Usa niana ka Adlaw'ng Igpapahulay nagtudlo si Jesus didto sa usa ka sinagoga. Didto may babaye nga giyawaan ug tungod niini, nasakit siya sulod na sa 18 ka tuig. Nagtikuko siya ug dili na makatuyhad. Sa pagkakita ni Jesus kaniya, miingon siya sa babaye, “Naayo na ikaw sa imong sakit !” Iyang gihikap ang babaye ug dihadiha nakatuyhad ang babaye ug gidayeg niya ang Dios. Ang opisyal sa sinagoga nasuko nga si Jesus nag-ayo sa masakiton sa Adlaw'ng Igpapahulay ug miingon siya sa mga tawo, “May unom ka adlaw nga kita makatrabaho. Anhi kamo nianang mga adlawa kon gusto kamong mamaayo, apan dili sa Adlaw'ng Igpapahulay !” Mitubag ang Ginoo kaniya, “Mga tigpakaaron-ingnon kamo ! Dili ba nga sa Adlaw'ng Igpapahulay bisan kinsa kaninyo mobadbad man sa inyong baka o asno gikan sa kuwadra ug dad-on ninyo kini ngadto sa gawas aron paimnon ? Karon, aniay kaliwat ni Abraham nga gipaantos ni satanas sulod na sa 18 ka tuig. Dili ba siya mahimong ayohon sa Adlaw'ng Igpapahulay ?” Naulaw ang tanan Niyang mga kaaway sa pagkadungog nila sa tubag Niya samtang ang tanang mga tawo nalipay sa kahibulongang mga buhat ni Jesus.

Pamalandong :

UNSA MAY MAHITABO KON KITA MAKALINGKAWAS NA SA DAOTANG ESPIRITU ? 

Usa ka babaye nga nagtikubo sulod sa 18 ka tuig ang gi-ayo ni Jesus. Ang “pagtikubo” naghulagway sa makasasalang kahimtang sa maong babaye. Tungod sa sala, wala siya'y nawong nga ikapakita sa mga tawo. Human gitapi-on ni Jesus ang Iyang kamot sa babaye, naayo kini ug nakatuyhad na. Ang “pagtuyhad” naghulagway sa bag-ong kinabuhi nga naangkon sa babaye tungod sa panabang ni Jesus. Kining Ebanghelyo maghagit kanato sa pagbiya sa sala nga maoy maghatag og kabug-at sa atong kinabuhi, ug sa pagduol kang Kristo nga maoy magluwas kanato gikan sa daotang espiritu. Sakto ang giingon : “A true Christian desires to be free from sin, not to sin freely.” Kon malikayan nato ang pagpakasala, makaatubang kita sa katilingban nga walay kaulawan.

pohsiBtebAyU