Lukas 12:54-59

 Ang Santos nga Ebanghelyo sumala ni San Lukas 12:54-59  (Fri. Oct. 27, 2023)

Miingon usab si Jesus sa mga tawo, “Inigkakita ninyo ug dag-om nga naggikan sa kasadpan, moingon dayon kamo, ‘Moulan dili madugay,’ ug moulan gayod. Ug sa pagkamatngon ninyo sa hangin nga naghuros gikan sa habagatan moingon kamo, ‘Moinit karon,’ ug moinit gayod. Mga tigpakaaron-ingnon ! Makamao kamong mosabot sa kahulogan sa dagway sa yuta ug sa langit apan nganong dili man kamo makasabot sa kahulogan niining panahona ? “Ug nganong dili man kamo mismo makahukom unsay angay buhaton ? Kon may mokiha kanimo, paningkamot sa pagpakig-uli kaniya samtang anaa pa kamo sa dalan aron dili ka niya dad-on ngadto sa maghuhukom ug itugyan ka niya ngadto sa polis ug ibalhog ka niya ngadto sa bilanggoan. Timan-i kini : dili ka gayod buhian hangtod kabayran mo ang kataposang usa ka dako sa imong multa.”

Pamalandong :

NGANONG ANGAY MANG BANTAYAN ANG MGA TILIMAD-ON SA PANAHON ? 

Ang mga mag-uuma magbantay sa mga tilimad-on sa panahon aron sila mahibalo sa saktong higayon alang sa pagtanum, pag-abuno, ug pag-ani. Ang mga marino magbantay sa mga tilimad-on sa panahon aron malikayan ang katalagman diha sa kadagatan. Sa espirituhanong kinabuhi, angay usab kitang magbantay sa mga tilimad-on aron atong malikayan ang pagkadugmo ug kaparotan. Atong susihon kanunay ang atong relasyon uban sa Ginoo ug sa isigkatawo. Nag-anam ba kita kaduol sa Dios o nagkalayo ? Nag-anam ba kita kamahigugmaon sa atong  isigkaingon o nagpabiling madinumtanon ? Sakto ang giingon sa usa ka magsasangyaw : “Being a Christian is more than just an instantaneous conversion. It is a daily process whereby you become more and more like Christ.”

pohsiBtebAyU