Lukas 12:35-38

 Ang Santos nga Ebanghelyo sumala ni San Lukas 12:35-38 (Tue. Oct. 24,  2023)

“Pag-andam kamo sa bisan unsay modangat. Baksig hugot ang inyong mga bisti ug dagkoti ang inyong mga suga sama sa mga sulugoon nga naghulat sa pagbalik sa ilang agalon gikan sa kombira sa kasal. Sa dihang moabot ug manuktok ang agalon, ablihan dayon sa mga sulugoon ang pultahan. Bulahan kadtong mga sulugoon nga makaplagan sa ilang agalon nga nagtukaw ug nag-andam ! Sultihan Ko kamo nga magbakos siya, palingkoron niya sila sa kan-anan ug silbihan. Ug bulahan sila kon makaplagan niya nga andam bisan kon moabot siya sa tungang gabii o kaadlawon na !

Pamalandong :

UNSA MAY ANGAY NATONG BUHATON ISIP MGA PINIYALAN SA DIOS ? 

Duha ka butang ang gisugyot sa atong Ebanghelyo karon. Una, si Jesus miingon, “Ibakos ang inyong bisti.” Ang mga sulugoon panahon sa Bibliya tag-as og sinina. Ang ilang hawakan kinahanglang ibakos aron sila makalihok ug makatrabaho'g maayo. Sa pag-ingon ni Jesus “ibakos ang inyong bisti”, buot Niyang dasigon ang mga tinun-an nga mag-andam kanunay sa ilang kaugalingon alang sa pagpangalagad. Ug ang ikaduha, si Jesus miingon, “Pasigaa ang inyong lampara”. Ang nagsigang lampara maoy gamiton sa pagbuntog sa kangitngit ug paglamdag sa dalan. Sa pagsugo ni Jesus “pasigaa ang inyong lampara” buot Niyang hagiton ang mga tinun-an sa pagpakigbatok sa mga daotan ug paghatag og mga maayong panig-ingnan. Matod pa ni St. Vincent Pallotti, "Remember that the Christian life is one of action ; not of speech and daydreams. Let there be few words and many deeds, and let them be done well."

pohsiBtebAyU