Lukas 11:37-41

 Ang Santos nga Ebanghelyo sumala ni San Lukas 11:37-41 (Tue. Oct. 17, 2023)

Sa nahuman na si Jesus ug sulti, may usa ka Pariseo nga midapit Kaniya sa pagpangaon busa miadto Siya ug nakigsalo kaniya. Natingala ang Pariseo sa pagkamatikod niya nga wala manghunaw si Jesus sa wala pa mokaon. Tungod niini miingon ang Ginoo kaniya, “Kamong mga Pariseo naghinlo sa gawas nga bahin sa tasa ug plato apan ang sulod ninyo puno sa pagpanikas ug kadaotan. Mga buang ! Dili ba ang Dios nga maoy nagbuhat sa gawas nga bahin mao usab ang nagbuhat sa sulod ? Apan ihatag ang anaa sa inyong mga tasa ug plato ngadto sa mga kabos ug mahinlo ang tanan alang kaninyo.

Pamalandong :

UNSA MAY MAS MAHINUNGDANON – ANG LIMPYO NGA MGA KAMOT O ANG LIMPYO NGA HUNAHUNA UG KASINGKASING ? 

Sa pagpangaon, importante ang limpyo nga mga kamot ; apan sa tanang panahon, mahinungdanon ang limpyo nga hunahuna ug kasingkasing. Dili kita angay’ng manundog sa mga Pariseo nga kanunay nagbaton og daotang hunahuna ug pagbati ngadto sa uban. Kini nga kinaiya maghatag og kadaot sa atong espiritu ug makahimo natong mapahitas-on, madinumtanon, ug masinahon. Si Kristo naghatag og dakong pagtagad sa pangsulod sa tawo tungod kay kini maoy tuboran sa maayong kinaiya ug binuhatan. Sakto ang giiingon : “Beauty is not about having the fairest skin or the prettiest face ; it’s about having the purest heart. So, don’t take mirrors too seriously. Your true reflection is in your heart.”

pohsiBtebAyU