Mateo 21:28-32

 Ang Santos nga Ebanghelyo sumala ni San Mateo 21:28-32 (Sun. Oct. 1, 2023)

“Karon, unsa may inyong hunahuna ? Dihay tawo nga may duha ka anak nga lalaki. Miadto siya sa magulang ug iyang giingnan, ‘Dong, trabaho karong adlawa didto sa parasan.' Mitubag siya, ‘Dili ko motrabaho.’ Apan nausab ang iyang hunahuna ug miadto siya sa parasan. Unya ang amahan miadto sa manghod ug mao gihapon ang iyang giingon kaniya. ‘Oo, moadto ako,’ mitubag siya. Apan wala siya moadto. Kinsa man sa duha ang mituman sa buot ipabuhat sa amahan ?” Sila mitubag, “Ang magulang.” Unya si Jesus miingon, “Sultihan Ko kamo nga ang mga kobrador sa buhis ug ang mga daotang babaye mag-una pang makadawat sa panalangin sa paghari sa Dios kay kaninyo. Kay mianhi kaninyo si Juan nga Magbubunyag aron pagtudlo sa matarong nga pagkinabuhi apan wala kamo motuo kaniya. Ang mga kobrador sa buhis ug ang mga daotang babaye hinuon maoy mituo kaniya. Apan kamo, bisag nakakita na mo niini, wala gihapon maghinulsol o motuo kaniya.”

Pamalandong :

ASA MAN KITA MAHISAMA - Sa unang anak nga nibalibad sa sugo sa amahan apan nausab ang hunahuna ug nituman, o sa ikaduhang anak, nga niingon og “Oo” apan wala diay gihimo ? 

Sa pagkatinuod, kitang tanan adunay kinaiya nga sama ning duha ka mga anak. Daghang higayon nga nidumili kita sa pagsunod sa mga sugo sa Dios, pero nakonsensya kita ug nagbag-o sa hunahuna ug binuhatan. Apan, aduna say mga higayon nga nanaad kita nga mosunod sa Iyang kabubut-on, apan napakyas tungod sa pagkatawhanon. Busa, dili kita angay mamili ning duha ka matang sa anak. Ang sambingay maghagit kanato sa pagkamasinugtanon ngadto sa Dios. Ang atong pag-ingon, “Oo Ginoo” atong ipakita sa buhat. Di bale kon kita mapakyas usahay. Ang importante nga kita maningkamot kutob sa atong mahimo aron sundon ang mga sugo sa Ginoo. Matod pa ni San Ignacio, "It is not hard to obey when we love the one whom we obey."

pohsiBtebAyU