Mateo 18:21-35

 Ang Santos nga Ebanghelyo sumala ni San Mateo 18:21-35 (Sun. Sept. 17, 2023)

Unya miduol si Pedro kang Jesus ug nangutana, “Ginoo, kon ang akong igsoon kanunay makasala kanako, hangtod kapila ko man siya pasayloon ? Kapito ba ?” Si Jesus mitubag, “Dili kay kapito ra, kondili kapitoan ka pito. Kay ilalom sa pagmando sa Dios ang kahimtang sama sa usa ka hari nga naghusay sa mga utang sa iyang mga sulugoon. Sa diha nga nagsugod siya paghusay, gidala ngadto kaniya ang usa ka sulugoon nga nakautang kaniya'g dako kaayong kantidad. Wala siya'y igong ikabayad sa iyang utang. Busa misugo ang iyang agalon nga ibaligya siya lakip ang iyang asawa ug ang iyang mga anak ug ang tanan nga iyaha aron makabayad siya sa utang. Miluhod ang sulugoon sa atubangan sa iyang agalon ug nagpakiluoy nga nag-ingon, ‘Sir, ayaw intawon ako apikiha kay mobayad ra unya ko sa tanan kong utang !’ Naluoy kaniya ang agalon busa gipapas niya ang utang sa sulugoon ug iyang gipalakaw. “Milakaw kining maong sulugoon ug gikasugat niya ang usa sa iyang mga kaubang sulugoon nga nakautang kaniya ug gamay ra kaayong kantidad. Iya dayon kining gilabni, gituok ug giingnan, ‘Bayri na ko sa imong utang !’ Ang iyang kaubang sulugoon miluhod ug nagpakiluoy kaniya, ‘Ayaw intawon ako apikiha kay mobayad ra unya ko nimo !’ Apan wala siya mosugot. Gipapriso hinuon niya kini hangtod nga makabayad sa utang. Sa pagkakita sa ubang sulugoon sa nahitabo, nasubo sila pag-ayo. Nangadto sila sa ilang agalon ug gisuginlan nila siya sa tanan. Busa gipatawag sa agalon ang sulugoon ug giingnan, ‘Wala kay puangod ! Gipapas ko ang tanan mong utang kay nagpakiluoy ka man kanako. Angay ka untang maluoy sa imong isigkasulugoon, sama nga ako naluoy kanimo !’ Nasuko pag-ayo ang agalon ug gipapriso niya ang sulugoon aron silotan hangtod nga makabayad siya sa tanang utang.” Ug gitapos ni Jesus ang sambingay sa pag-ingon, “Ingon usab niana ang buhaton kaninyo sa akong Amahan nga atua sa langit kon dili kamo mopasaylo sa inyong isigkatawo sa kinasingkasing gayod.”

Pamalandong :

NGANONG KINAHANGLAN MAN KITANG MAGPASAYLO SA UBAN ? 

Si C.S. Lewis nag-ingon, “Everyone thinks forgiveness is a lovely idea, until they have something to forgive.” Tinuod, ang pagpasaylo nindot lamang hunahunaon, apan lisod buhaton, ilabina kon kita masakitan pag-ayo sa laing tawo. Apan, si Kristo nagtudlo kanato karon pinaagi sa sambingay nga kinahanglan mopasaylo gayod kita sa atong isigkatawo tungod kay ang Dios maoy unang nagpasaylo kanato. Bisan lisod buhaton, atong himoon ang pagpasaylo tungod kay kini ang maghatag kanato’g kaluwasan dili lamang sa umaabot nga kinabuhi kondili sugod karon. Matod pa ni St. Augustine, "There are many kinds of alms ; the giving of which helps us to obtain pardon for our sins ; but none is greater than that by which we forgive from our heart a sin that someone has committed against us."  Isilsil nato sa atong alimpatakan nga  pinaagi sa pagpasaylo, ang ato mismong kaugalingon maoy nahimong gawasnon ug nabulahan.

pohsiBtebAyU