Mateo 16:21-27

 Ang Santos nga Ebanghelyo sumala ni San Mateo 16:21-27 (Sun. Sept. 3,  2023)

Sukad niadtong higayona, giklaro na gyod ni Jesus pagsulti ngadto sa Iyang mga tinun-an : “Kinahanglang moadto Ako sa Jerusalem aron paantuson pag-ayo sa mga namunoan sa mga Judio ug sa mga pangulong pari ingon man sa mga magtutudlo sa Balaod. Patyon Ako nila apan sa ikatulo ka adlaw mabanhaw Ako. ”Tungod niini gidala Siya ni Pedro layo sa uban ug giingnan, “Dili unta kana mahitabo kanimo, Ginoo !” Miatubang si Jesus ug miingon kang Pedro, “Pahawa, Satanas ! Usa ikaw ka babag sa Akong agianan kay ang imong hunahuna, hunahuna sa tawo ug dili sa Dios !” Unya miingon si Jesus sa Iyang mga tinun-an, “Kon ang usa ka tawo buot mahimong Akong tinun-an kinahanglang dili siya magtuman sa iyang kaugalingon, pas-anon niya ang iyang krus ug mosunod siya Kanako. Kay ang gustong magluwas sa iyang kaugalingong kinabuhi mawad-an hinuon niini. Apan ang mawad-an sa iyang kinabuhi tungod Kanako makabaton niini. May makuha ba ang tawo kon maangkon niya ang tibuok kalibotan apan kawad-an siya sa iyang kinabuhi ? Wala gayod ! Walay bisan unsa nga ikahatag ang tawo aron mabawi niya ang iyang kinabuhi. Kay ang Anak sa Tawo hapit na moabot uban sa himaya sa Iyang Amahan kinuyogan sa Iyang mga anghel ug unya balosan Niya ang tagsatagsa sumala sa iyang nabuhat. 

Pamalandong :

UNSA MAY ATONG BUHATON ARON MAHIMONG TINOOD NGA SUMUSUNOD NI KRISTO ? 

Duha ka butang ang gipangayo sa Ginoo kanato. Ang una mao ang paghikalimot sa atong kaugalingon. Ang usa ka Kristiyano gitawag sa pagpangalagad sa Dios ug sa katawhan. Mahimo nato kini kon kita makat-on sa paghunahuna sa kaayohan sa uban, dili sa atong kaugalingon lamang. Pinaagi sa pagpugong sa kaugalingong kailibgon, mahatagan nato'g panahon ang Dios ug ang atong isigkaingon. Ug ang ikaduha mao ang pagpas-an sa krus. Kon kita adunay gugma, dili kita mahadlok mopas-an sa atong mga katungdanan ug suliran sa kinabuhi. Ang usa ka amahan nga may dakong gugma sa iyang pamilya dili maluya sa pagpanarbaho alang kanila. Pero, ang tawong walay gugma dili gayod makamaong magsakripisyo ug tungod niini dili usab siya makasunod sa tinuoray kang Kristo. Adunay sinultihon si Thomas S. Monson nga nagkanayon, "May we ever choose the harder right instead of the easier wrong."

pohsiBtebAyU