Lukas 8:4-15

 Ang Santos nga Ebanghelyo sumala ni San Lukas 8:4-15 (Sat. Sept. 23, 2023 )

Daghang mga tawo nga gikan sa kalungsoran ang nangadto kang Jesus ug sa nagkapundok na sila, Iyang gisugilon kining sambingaya : “May usa ka tawo nga miadto sa uma aron pagpugas ug mga binhi. Samtang nagsabod siya, pipila sa mga binhi nahulog diha sa agianan. Gitunobtunoban kini sa mga tawo ug gituka sa mga langgam. Ang uban nahulog sa yutang batoon ug sa pagturok niini, nalaya kay walay tubig ang yuta. Ang ubang binhi nahulog dapit sa mga tunokong sagbot. Ang mga tunokong sagbot mitubo uban sa binhi ug mituok niini. Ug ang ubang binhi nahulog sa maayong yuta. Mitubo kini ug namunga'g 100 ka pilo.” Unya midugang si Jesus pag-ingon, “Busa pamati kon may dalunggan kamo !” Unya nangutana ang mga tinun-an ni Jesus unsay kahulogan sa maong sambingay. Ug mitubag si Jesus, “Ang pagsabot sa mga tinago mahitungod sa paghari sa Dios gihatag na kaninyo. Apan sa uban gihatag kini pinaagi sa sambingay aron kon motan-aw sila, dili sila makakita ug kon mamati sila, dili sila makasabot. “Mao kini ang kahulogan sa sambingay : ang binhi mao ang pulong sa Dios. Ang mga binhi nga nahulog sa agianan mao kadtong mga tawo nga nakadungog sa pulong sa Dios. Apan mitungha ang Yawa ug misakmit niini gikan sa ilang kasingkasing aron dili sila motuo ug maluwas. Ang mga binhi nga nahulog sa yutang batoon mao kadtong nakadungog sa mensahe ug malipayong midawat niini. Apan wala kini makagamot. Mituo lamang sila sa makadiyot ug unya namiya sa panahon sa pagsulay. Ang mga binhi nga nahulog dapit sa mga tunokong sagbot mao kadtong namati sa pulong sa Dios. Apan ang mga kabalaka ug mga bahandi ingon man ang mga kahilayan niining kinabuhia mituok kanila ug tungod niini ang ilang mga bunga piyasot. Apan ang mga binhi nga nahulog sa maayong yuta mao kadtong nakadungog sa mensahe ug kinasingkasing nga midawat ug mituman niini ug mapailubong nagpadayon hangtod nga namunga sila.

Pamalandong :

UNSA MAN KITA KA MAAYO MAMINAW, ILABINA SA PULONG SA DIOS ? 

Adunay mga tawo nga human maminaw, ipalusot dayon ang nadungog sa pikas nga dalunggan. Aduna puy uban nga maminaw dili aron makasabot kondili aron adunay ikatubag nga argumento. Aduna pa gayo'y lain nga maminaw dili aron puy-an ang mensahe kondili aron gamiton ang mensahe ug ipasunod sa uban. Kini nga mga matang sa tigpaminaw mahisama sa yuta nga gahi, batoon ug tunokon, nga dili gayod maayo para sa mga liso nga gitanum. Ang Liso sa Pulong sa Dios manginahanglan og mga tigpaminaw nga abli sa bag-ong pagtulon-an, andam makat-on, masaligon ug dili laog sa mga butang kalibotanon. Ang mga tawo nga sama niini mahisama sa tambok nga yuta, diin ang Pulong sa Dios makaturok, molambo, ug makapamunga’g daghang kaayohan.

pohsiBtebAyU