Lukas 8:1-3

 Ang Santos nga Ebanghelyo sumala ni San Lukas 8:1-3 (Fri. Sept. 22, 2023)

Wala madugay, miadto si Jesus sa kalungsoran ug sa kabalangayan diin nagwali Siya sa Maayong Balita mahitungod sa paghari sa Dios. Mikuyog Kaniya ang 12 ka tinun-an ug pipila sa mga babaye nga naayo gikan sa daotang mga espiritu ug sa mga balatian. Sila mao si Maria (nga ginganla'g Magdalena) nga gikan kaniya gipagula ang pito ka yawa ; si Juana, ang asawa ni Cusa nga opisyal ni Herodes ; si Susana ug daghan pang mga babaye nga mitabang kang Jesus ug sa Iyang mga tinun-an pinaagi sa ilang katigayonan.

Pamalandong :

NGANONG ANGAY MANG RESPETOHAN ANG MGA KABABAYENHAN ? 

Si Jesus naghatag sa mga babaye og susamang pagtahod nga Iyang gihatag sa mga lalaki. Sa Ebanghelyo karon adunay mga babaye nga nag-uban kang Jesus sa Iyang ministeryo publiko. Kini nagpakita nga ang mga babaye adunay aktibong papel sa pagtukod sa Gingharian sa Dios. Sukwahi kini sa kultura sa mga Hudiyo sa Iyang panahon nga nag-isip sa mga babaye nga ubos nga sakop sa katilingban. Ang ehemplo ni Jesus maghagit kanato sa pagtahod sa mga kababayenhan ug pag-ila sa ilang bililhong papel sa Simbahan. Si San Juan Pablo Dos nag-ingon : “It is the duty of every man to uphold the dignity of every woman.” Matag higayon nga dauton sa tawo ang dignidad sa mga kababayenhan, tabla ra nga iyang gipakaubos ang iyang kaugalingon ug ang iyang bokasyon (Mulieris Dignitatem, 10).

pohsiBtebAyU