Lukas 7:11-17

 Ang Santos nga Ebanghelyo sumala ni San Lukas 7:11-17  (Tue. Sept. 19, 2023)

Unya wala madugay, miadto si Jesus sa lungsod sa Nain. Mikuyog Kaniya ang Iyang mga tinun-an ug ang usa ka dakong panon sa mga tawo. Sa pag-abot Niya sa ganghaan sa lungsod, mao gayo'y paggula sa mga tawo aron maglubong ug minatay. Ang minatay bugtong anak nga lalaki sa usa ka biyuda ug mikuyog kaniya ang daghang mga tawo gikan sa lungsod. Sa pagkakita ni Jesus sa biyuda, naluoy Siya ug miingon sa babaye, “Ayaw paghilak.” Unya miduol si Jesus ug gihikap Niya ang lungon ug mihunong ang mga tawo nga nagyayong sa lungon. Unya miingon si Jesus, “Dong, bangon !” Mibangon ang batan-on nga patay na unta ug misulti. Ug gitugyan siya ni Jesus ngadto sa iyang inahan. Nahadlok ug nahibulong ang tanan ug gidayeg nila ang Dios nga nag-ingon, “Usa ka gamhanang propeta ang ania uban kanato ! Ang Dios mipadayag ug pagtagad sa Iyang katawhan !” Mikaylap sa tibuok Judea ug sa kasikbit nga kayutaan ang maong balita mahitungod kang Jesus.

Pamalandong :

UNSA MAY ATONG BUHATON ATUBANGAN SA KALISOD UG KAGUL-ANAN SA UBAN ? 

Gikahinagbo ni Jesus ang mga tawo nga nagdala’g patay’ng lawas sa batan-ong lalaki. Sa dihang nakita ni Jesus ang inahan sa namatay, natandog pag-ayo ang Iyang kahiladman. Gibati Siya’g dakong kalooy tungod kay ang maong babaye biyuda, nga sa ato pa, namatyan na’g bana, unya karon, nawad-an na usab og bugtong anak. Gihikap ni Jesus ang lungon ug gibanhaw Niya ang patay pinaagi sa pag-ingon, “Dong bangon !” Kining maong hitabo nagpakita kanato sa kasingkasing sa Dios, nga buot makighiusa sa kasakit sa uban ug molihok aron paghatag og kinabuhi ug kaayohan. Kita gidasig sa pagpakita’g susamang kalooy ug buhat para sa atong isigkatawo. Adunay nag-ingon, “A kind gesture can reach a wound that only compassion can heal.”

pohsiBtebAyU