Lukas 6:12-19

 Ang Santos nga Ebanghelyo sumala ni San Lukas 6:12-19 (Tue. Sept. 12, 2023)

Niadtong panahona mitungas si Jesus sa usa ka bungtod aron pag-ampo ug sa tibuok gabii nag-ampo Siya sa Dios. Sa pagkabuntag na, gitawag Niya ang Iyang mga tinun-an ug gipili Niya ang 12 kanila nga ginganlan Niya'g apostoles : si Simon (nga Iyang ginganla'g Pedro) ug ang iyang igsoon nga si Andres, si Santiago ug si Juan, si Felipe ug si Bartolome, si Mateo ug si Tomas, si Santiago nga anak ni Alfeo ug si Simon (ang gitawag nga Patriyota), si Judas nga anak ni Santiago ug si Judas Iscariote, ang nahimong mabudhion. Milugsong si Jesus gikan sa bungtod kuyog sa Iyang mga apostoles. Mitindog Siya sa usa ka dapit nga patag kauban sa panon sa Iyang mga tinun-an. Didto usab may dakong panon sa mga tawo nga gikan sa tibuok Judea ug Jerusalem ug sa mga siyudad sa kabaybayonan sa Tiro ug sa Sidon. Nangadto sila kang Jesus aron pagpamati Kaniya ug aron ayohon sila sa ilang mga balatian. Nangadto usab ang gipangyawaan ug nangaayo sila. Naninguha ang tanang tawo sa paghikap kang Jesus kay gikan Kaniya migula ang gahom nga nag-ayo kanilang tanan.

Pamalandong :

NGANONG KINAHANGLAN KITANG MOTABANG SA MGA APOSTOLADO SA SIMBAHAN ?

Diha sa Ebanghelyo atong nasayran nga wala luwasa ni Jesus ang kalibotan nga nag-inusara ; nagdapit Siya’g mga tawo nga motabang sa Iyang buhat sa pagpangalagad ug pagpangluwas. Dili lang mga apostoles kondili kitang tanang mga sumusunod ni Kristo ang gidapit sa pagdala sa Iyang presensya ug sa pagpadayon sa Iyang misyon dinhi sa kalibotan. Daghan kanato igo lang mosimba matag Domingo ug mohatag og donasyon sa Simbahan. Bisan tuod ug importante kini, apan dili pa kini igo. Ang tinuod nga Kristiyano motabang sa mga apostolado diha sa Simbahan - para sa pamilya, kabatan-onan, biblia, katesismo, social action, ug uban pa. Adunay nag-ingon : “Ministry is not a job or a Sunday routine, it’s a privilege to be chosen and used by Jesus.”

pohsiBtebAyU