Lukas 6:1-5

 Ang Santos nga Ebanghelyo sumala ni San Lukas 6:1-5 (Sat. Sept. 9, 2023)

Usa niana ka Adlaw'ng Igpapahulay naglakaw si Jesus agi sa kaumahan sa trigo. Unya ang Iyang mga tinun-an nangutlog mga uhay sa trigo ug tapos nila kini kusokusoa sa ilang mga kamot ilang gikaon ang lugas. Apan pipila sa mga Pariseo miingon, “Nganong nagbuhat man kamo niana ? Gidili kana sa Adlaw nga Igpapahulay sumala sa atong Balaod !” Si Jesus mitubag kanila, “Wala ba kamo makabasa mahitungod sa gibuhat ni David sa dihang gigutom siya ug ang iyang mga kauban ? Misulod siya sa balay sa Dios ug mikuha sa pan nga hinalad ngadto sa Dios. Unya mikaon siya niini ug gihatagan usab niya'g pan ang iyang mga kauban. Apan ang tanan gidid-an sa atong Balaod sa pagkaon sa pan nga hinalad ngadto sa Dios gawas lamang sa mga pari.” Ug si Jesus midugang sa pag-ingon, “Ang Anak sa Tawo maoy magbuot sa angay nga buhaton sa Adlaw'ng Igpapahulay.”

Pamalandong :

HANGTOD KANUS-A MAN NATO SUNDON ANG MGA BALAOD ?   

Sa ordinaryong kahimtang, ang mga maayong balaod angay gayod nga sundon. Kini tungod kay ang mga balaod gihimo man alang sa kaayohan ug kalamboan sa tawo. Apan, kon ugaling ang usa ka balaod mahimong babag sa kaluwasan sa tawo, dili na kini angay’ng tumanon. Kini ang gitudlo ni Kristo pinaagi sa pagtugot sa mga tinun-an sa pagpangutlog mga uhay sa trigo bisan tuod adlaw kadto nga Igpapahulay aron sila makakaon. Sa samang paagi, mahimo nato ang pagtrabaho sa Adlaw nga Domingo kon adunay seryosong hinungdan sa pagbuhat niini, sama sa pagluwas og kinabuhi sa atong isigkatawo. Ang Ebanghelyo karon gadasig kanato sa pagsabot sa katuyoan sa matag sugo sa Ginoo aron nga dili kita mahisama sa mga Pariseo nga magpugos sa pagpatuman sa balaod bisan kon kini dili na makatabang sa tawo. Pananglitan, dili nato angay’ng pugson ang si bisan kinsa sa pagsimba sa adlaw'ng Domingo kon siya adunay gibating sakit nga seryoso o kaha adunay mga kabilinggan nga dili gayod niya malikayan. Matod pa ni San Agustin," Right is right even if no one is doing it ; wrong is wrong even if everyone is doing it."

pohsiBtebAyU