Juan 3:13-17

 Ang Santos nga Ebanghelyo sumala ni San Juan 3:13-17 (Thu. Sept. 14, 2023)

Ug wala pay nakasaka sa langit gawas sa Anak sa Tawo nga nanaog gikan sa langit.” Sama nga giisa ni Moises didto sa kamingawan ang bitin nga bronsi nga gibutang ug tukon, ang Anak sa Tawo kinahanglan nga iisa usab aron ang tanan nga motuo Kaniya makabaton ug kinabuhing walay kataposan. Kay gihigugma pag-ayo sa Dios ang kalibotan ug tungod niini gihatag Niya ang Iyang bugtong Anak, aron ang tanan nga motuo Kaniya dili malaglag kondili makabaton hinuon sa kinabuhing dayon. Kay wala ipadala sa Dios ang Iyang Anak nganhi sa kalibotan aron pagsilot kondili aron pagluwas niini.

Pamalandong :

UNSAON MAN NATO PAGPASIDUNGOG ANG BALAANG KRUS NI KRISTO ? 

Ang pagkulintas og Krus sa atong li-og ug ang pagpahimutang og Krus diha sa atong panimalay, sakyanan o mga lugar trabahoanan maoy usa ka pamaagi sa pagpasidungog sa Balaang Krus. Apan kining tanan mahimo lamang makahuluganon kon kita mismo mosanong sa hagit ni Kristo sa pagpas-an sa krus matag adlaw sa atong kinabuhi. Ang pagpas-an sa krus mahimo nato sa daghang paagi sama sa (1) makugihong pagbuhat sa inadlaw-adlaw’ng katungdanan, (2) matinud-anong pagtabang sa mga naglisod, (3) maisogong pag-atubang sa mga pagsulay, (4) mapaubsanong pagdawat sa mga pagpanglutos, (5) mapailobong pagpasaylo sa mga makasasala, ug (6) maalamong paggiya sa mga masalaypon ngadto sa katarong.

Atong isilsil sa atong alimpatakan nga didto sa krus sa Kalbaryo, gisakripisyo ni Jesus ang Iyang kinabuhi aron Iyang mabayran ang mga sala sa tawo. Ang krus, nga instrumento sa pagsilot ug simbolo sa kamatayon, gihimo ni Kristo nga instrumento sa pagluwas ug simbolo sa kinabuhi. Ang inilang teologo nga si Hans Urs Von Balthasar nag-ingon, “ It is to the Cross that the Christian is challenge to follow his Master : no path of redemption can make a detour around it.” Busa, hinumduman nato nga walay laing agi-anan padulong sa langit kondili ang dalan sa Krus nga gisubay ni Kristo.

pohsiBtebAyU