Mateo 23:27-32

 Ang Santos nga Ebanghelyo sumala ni San Mateo 23:27-32 (Wed. Aug. 30, 2023)

“Pagkaalaot ninyong mga magtutudlo sa Balaod ug kamong mga Pariseo ! Mga tigpakaaron-ingnon ! Sama kamo sa mga lubnganan nga pinintalag puti nga maanindot tan-awon sa gawas apan sa sulod puno sa mga bukog sa mga patay ug mga hugawng butang. Sa samang paagi, sa gawas makita sa tanan nga kamo maayo apan sa sulod puno kamo sa mga pagpakaaron-ingnon ug sa mga sala. “Pagkaalaot ninyong mga magtutudlo sa Balaod ug kamong mga Pariseo ! Mga tigpakaaron-ingnon ! Nagbuhat kamo'g mga maanindot nga lubnganan alang sa mga propeta ug gidayandayanan ninyo ang mga monumento niadtong mga matarong ug kinabuhi. Nag-ingon kamo, ‘Kon kami nagpuyo pa lang sa panahon sa atong mga katigulangan, dili unta namo himoon ang ilang gibuhat o patyon ang mga propeta.’ Busa giangkon ninyo nga mga kaliwat kamo niadtong mga tawo nga mipatay sa mga propeta ! Sigi, padayon ug tiwasa ninyo ang gisugdan sa inyong mga katigulangan !

Pamalandong :

NGANONG MAGTAKOBAN MAN KITA SA ATONG KAUGALINGON ? 

Sa libro nga “Why Am I Afraid To Tell You Who I Am ?” Si John Powell miingon nga ang hinungdan sa pagpakaaron-ingnon mao ang “fear of rejection.”Magbutang kita'g maskara sa kaugalingon tungod kay mahadlok kita nga dili na moangay kanato ang atong mga higala kon mahibaw-an nila ang tinuod tang pagkatawo. Apan ang pagpakaaron-ingnon dili makaayo nato. Si Rick Warren nag-ingon : “The most exhausting activity is pretending to be what you know you aren’t.” Gisaway ni Jesus ang pagtakoban sa mga Pariseo dili aron insultohon kondili aron hagiton sila sa pagbag-o sa kaugalingon. Sa pagtakoban, malansisan nato ang tawo, apan dili ang Ginoo kay makita Niya ang atong kasingkasing. Busa, ang pagbag-o sa kaugalingon, dili ang pagtakoban, maoy angay tang buhaton. 

pohsiBtebAyU