Mateo 23:13-22

Ang Santos nga Ebanghelyo sumala ni San Mateo 23:13-22 (Mon. Aug. 28, 2023)

“Pagkaalaot ninyong mga magtutudlo sa Balaod ug kamong mga Pariseo ! Mga tigpakaaron-ingnon ! Gibabagan ninyo ang mga tawo sa pagsulod sa Gingharian sa Langit apan kamo mismo dili mosulod ug dili mopasulod sa mga tawo nga gustong mosulod ! “Pagkaalaot ninyong mga magtutudlo sa Balaod ug kamong mga Pariseo ! Mga tigpakaaron-ingnon ! Mopanaw kamo sa kadagatan ug mga kayutaan aron pagkabig ug tawo ug sa nakabig na siya, gihimo ninyo siya nga labi pang angay nga maimpiyerno kay kaninyo ! “Pagkaalaot ninyong mga giya nga buta ! Nagtudlo kamo nga, ‘Kon ang usa ka tawo manumpa sa Templo, dili kinahanglan nga tumanon niya ang iyang panaad. Apan kon manumpa siya tungod sa bulawan nga anaa sa Templo, obligado siya pagtuman sa iyang panaad.’ Mga buta ug mga buangbuang ! Hain may labing importante : ang bulawan ba o ang Templo nga maoy nakabalaan sa bulawan ? Nagtudlo usab kamo nga kon may manumpa atubangan sa altar dili kinahanglan nga tumanon niya ang iyang panaad. Apan kon manumpa siya atubangan sa gasa nga anaa sa altar, kinahanglan nga tumanon niya ang iyang panaad. Pagkabuta gayod ninyo ! Hain may labing importante : ang gasa ba o ang altar nga maoy nakabalaan sa gasa ? Busa kon may manumpa atubangan sa altar, nanumpa siya niini ug sa tanang gasa nga anaa sa altar. Kon may manumpa sa Templo, nanumpa siya niini ug sa Dios nga nagpuyo didto. Ug kon may manumpa sa langit, nanumpa siya sa trono sa Dios ug Kaniya nga naglingkod niini.

Pamalandong :

NGANONG SAYOP MAN ANG PAGPAKAARON-INGNON ?

Ang pagpakaaron-ingnon usa ka matang sa pagpamakak ug pagpangilad. Usa ka tigpakaaron-ingnon ang tawo nga magpakita nga siya maayo ug dalaygon apan sa sulod sa iyang kasingkasing siya salawayon. Tigpakaaron-ingnon usab ang tawo nga magtudlo sa unsay angay'ng buhaton apan siya mismo wala magbuhat sa ingon. Gitawag ni Jesus ang mga Pariseo og “tigpakaaron-ingnon” tungod kay ang ilang gipangtudlo ug ang ilang kinabuhi wala man magkatakdo. Ang ilang kasingkasing kulang sa espiritu sa kalooy, gugma, ug hustisya. Usahay, kita usab magpakaaron-ingnon aron tabonan ang atong pagkatawhanon ug aron daygon sa mga tawo. Busa, angay kitang mangayo'g pasaylo sa Dios sa mga panahon nga wala kita  nagmatinud-anon Kaniya ug sa atong isigkaingon. Matod pa ni Marcos T. Cicero, "True glory takes root, and even spreads ; all false pretences, like flowers, fall to the ground ; nor can any counterfeit last long."

pohsiBtebAyU