Mateo 17:22-27

 Ang Santos nga Ebanghelyo sumala ni San Mateo 17:22-27 (Mon. Aug. 14, 2023)

Unya ang tanang tinun-an nagkapundok didto sa Galilea. Miingon si Jesus kanila, “Ang Anak sa Tawo hapit na itugyan ngadto sa mga tawo nga mopatay Kaniya. Apan sa ikatulo ka adlaw mabanhaw Siya.” Tungod niini nasubo pag-ayo ang mga tinun-an. Miabot si Jesus ug ang Iyang mga tinun-an didto sa Capernaum. Miduol kang Pedro ang mga kobrador sa buhis alang sa Templo ug nangutana, “Nagbayad ba ang inyong Magtutudlo sa buhis alang sa Templo ?” “Oo, nagbayad,” mitubag si Pedro. Sa pagsulod ni Pedro sa balay, miuna pagsulti si Jesus, “Simon, unsa may imong hunahuna ? Kinsa man ang magbayad ug buhis o bayranan ngadto sa mga hari niining kalibotana ? Ang mga lungsoranon ba o ang mga langyaw ?” Si Pedro mitubag, “Ang mga langyaw.” Si Jesus miingon, “Kon mao kana, ang mga lungsoranon dili kinahanglang mobayad. Apan dili kita gusto nga kining mga tawhana masilo. Busa lakaw ngadto sa lanaw ug pamasol. Biraha ang unang isda nga mokubit ug sa baba niini imong makita ang usa ka salapi nga igong ibayad sa imo ug sa Akong buhis alang sa Templo. Kuhaa kini ug bayri ang atong buhis.”

Pamalandong :

ANGAY BA KITANG MOHATAG OG SAKTONG BUHIS NGADTO SA PANGAGAMHANAN ? 

Ang ideya sa pagbayad og buhis gimugna para sa kaayohan sa bagang katawhan. Ang pundo nga matigom gikan sa buhis sa mga tawo gamiton sa pangagamhanan alang sa paghatag og maayong serbisyo sa katilingban. Tungod kay si Jesus Anak man sa Dios, wala na unta Siya'y labot sa obligasyon sa buhis. Apan gipili Niya ang paghatag og buhis ngadto sa nagdumala sa templo alang sa kaayohan ug kalamboan sa tanan. Kon atong sabton og maayo, ang pagbayad og saktong buhis maoy usa ka pamaagi sa paghigugma sa mga silingan, ilabina sa mga kabos ug nanginahanglan. Si Alain de Botton nag-ingon : “Paying tax should be framed as a glorious civic duty worthy of gratitude – not as a punishment for making money.”

pohsiBtebAyU